ރައްޔިތުންގެ މަޖިލީހަށް ހުށަހަޅާފައިވާ އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދުގެ އިތުބާރު ނެތްކަމުގެ މައްސަލައިގައި ދިފާޢުގައި ވާހަކަ ދެއްކެވުމަށް އެއް ގަޑިއިރުގެ ފުރުޞަތެއް ދިނުމަށް މަޖިލީހުގެ އާންމު ކޮމިޓީން މިއަދު ނިންމައިފިއެވެ.

އާންމު ކޮމިޓީން މިއަދު ބޭއްވި ބައްދަލުވުމުގައި ފާސްކުރީ މި މައްސަލައާ ގުޅޭ ބަހުސަށް ޖުމްލަ ދެ ގަޑިއިރު ކަނޑައެޅުމަށެވެ.

އެ ދެ ގަޑިއިރުގެ ތެރެއިން ވަޒީރަށް ދިފާޢުގައި ވާހަކަ ދެއްކެވުމަށް ލިބޭނީ އެއް ގަޑިއިރެވެ. ބާކީ އެއް ގަޑިއިރު ހާއްސަ ކޮށްފައި ވަނީ މަޖިލީހުގެ ގަވާއިދުގެ ތެރެއިން ސިޔާސީ ޕާޓީތަކަށް ބެހުމަށެވެ.

ވަޒީރު ސައީދާ ދެކޮޅަށް މި މައްސަލަ ހުށަހެޅީ 13 މެންބަރެއްގެ ސޮޔާ އެކު މި މަހުގެ ފުރަތަމަ ދުވަހު އެމްޑީޕީންނެވެ. ސަބަބެއް ކަމަށް ބަޔާންކޮށްފައި ވަނީ ޤާނޫނުއަސާސީގެ 132 ވަނަ މާއްދާގެ ދަށުން ހަވާލުކޮށްފައިވާ މަސްއޫލިއްޔަތު އަދާކުރުމުގައި ޤާނޫނުއަސާސީއާ ކަނޑައެޅިގެން ޚިލާފުވުމާއި 134 ވަނަ މާއްދާގެ ދަށުން މަޖިލީހަށް ޖަވާބުދާރީވުމުގައި އިހުމާލުވުމާއި 136 ވަނަ މާއްދާގެ ދަށުން ވަޒީރުން ކުރުން މަނާ ކަންކަން ހިންގާފައިވާ ކަމަށެވެ.

ނަމަވެސް އެ ވާހަކަތަކަށް ތަފްސީލީ ހެކި ހުށަހަޅާފައި ނުވާ ކަމަށް ބުނެ ކޮންގްރެސް ޕާޓީގެ ނައިބު ރައީސް އަދި ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެފައި ވަނީ އެ މައްސަލަ ފެއިލްކޮށްލާނެ ކަމަށެވެ.

މި މައްސަލައިގެ ބަހުސް ބާއްވާނެ ތާރީޚެއް މަޖިލީހުން އަދި އިޢުލާނު ކޮށްފައެއް ނުވެއެވެ.