މި އަހަރުގެ ޖެނުއަރީ މަހުން ފެށިގެން ޖުލައި މަހުގެ ނިޔަލަށް ފުލުހުން ހިންގި އެކި އޮޕަރޭޝަންތަކުގައި 121 މިލިއަން ރުފިޔާގެ އަގުހުރި މަސްތުވާތަކެއްޗާއި ބަނގުރާ އަތުލައިގެންފައިވާ ކަމަށް ފުލުހުން ހާމަކޮށްފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ޑްރަގް އެންފޯސްމަންޓް ޑިޕާޓްމަންޓުގެ ވެރިޔާ، ސުޕްރިޓެންޑެންޓު އޮފް ޕޮލިސް އަހުމަދު މުސްލިމް ވިދާޅުވީ، މިދިޔަ ހަތް މަސްދުވަހުގެ ތެރޭގައި މަސްތުވާތަކެއްޗާ ދެކޮޅަށް މުޅި ރާއްޖޭގައި 1،140 އަށްވުރެ ގިނަ އޮޕަރޭޝަން ހިންގާފައިވާ ކަމަށެވެ. މިއީ އެވްރެޖްކޮށް ދުވާލަކު 5 އޮޕަރޭޝަނެވެ.

މި މުއްދަތުގެ ތެރޭގައި މާލެ ސަރަހައްދުގައި 530 އަށްވުރެ ގިނަ އޮޕަރޭޝަން ހިންގާފައިވާއިރު، ރާއްޖޭގެ ދެކުނުގެ އަތޮޅުތަކުގައި 281 އޮޕަރޭޝަން އަދި އުތުރުގެ އަތޮޅުތަކުގައި 329 އޮޕަރޭޝަން ވަނީ ހިންގާފައެވެ. މީގެ ތެރެއިން 260 އޮޕަރޭޝަނަކީ 17 އަތޮޅެއްގައި ފުލުހުން ދުރާލާ ރާވައިގެން ހިންގި ހާއްސަ އޮޕަރޭޝަންތަކެކެވެ.

މަސްތުވާތަކެތީގެ މައްސަލަތަކުގައި ޖުމްލަ 1,875 މީހުން ހައްޔަރުކޮށްފައިވެއެވެ. އެއީ ދުވާލަކު އެވްރެޖްކޮށް 8 މީހުންނެވެ. ހައްޔަރުކުރި މީހުންގެ ތަފްސީލަކީ:

މާލެ ސަރަހައްދުން: 760 އަށްވުރެ ގިނަ މީހުން

ދެކުނުގެ އަތޮޅުތަކުން: 530 އަށްވުރެ ގިނަ މީހުން

އުތުރުގެ އަތޮޅުތަކުން: 570 އަށްވުރެ ގިނަ މީހުން

މީގެ އިތުރުން، ތުހުމަތުކުރެވިގެން 23,249 މީހަކު މަގުމަތިން ހުއްޓުވައި ބަލައި ފާސްކޮށްފައިވާއިރު، ރާއްޖޭގެ އެކި ސަރަހައްދުތަކުން 7,300 އަށްވުރެ ގިނަ ތަންތަން ވަނީ ބަލައި ފާސްކޮށްފައެވެ.

ފުލުހުންގެ ޑްރަގް އެންފޯސްމަންޓުން އެކަނި ހިންގި އޮޕަރޭޝަންތަކުގައި 177 ކިލޯއަށްވުރެ ގިނަ މަސްތުވާތަކެތި އަތުލައިގަނެފައިވެއެވެ. މުޅި ރާއްޖެއިން އަތުލައިގަނެވުނު ތަކެތީގެ ތަފްސީލަކީ:

މާލެ ސަރަހައްދުން: 137.8 ކިލޯގެ މަސްތުވާތަކެތި

ދެކުނުން: 3 ކިލޯއަށްވުރެ ގިނަ މަސްތުވާތަކެތި

އުތުރުން: 3.4 ކިލޯއަށްވުރެ ގިނަ މަސްތުވާތަކެތި

ބަނގުރާ: 180,056 ފުޅި (މީގެ ތެރެއިން 845 ފުޅިއަކީ ޑީ.އީ.ޑީ އިން އަތުލައިގަތް ތަކެތި)

އަތުލައިގަނެވުނު މަސްތުވާތަކެތީގެ މަގުމަތީ އަގު 120 މިލިއަނަށް އަރާއިރު، ބަނގުރާ ފުޅިތަކުގެ އަގު 960,000 ރުފިޔާއަށް އަރައެވެ. ޖުމްލަ މި ތަކެތީގެ އަގަކީ 121 މިލިއަން ރުފިޔާއެވެ.

މި މުއްދަތުގައި ޖުމްލަ 1,533 މައްސަލައެއް ތަހުގީގުކޮށްފައިވެއެވެ. މީގެ ތެރެއިން 634 މައްސަލައެއްގައި ދައުވާކުރުމަށް ޕީޖީ އޮފީހަށް ފޮނުވާފައިވެއެވެ. މީގެ ތެރޭގައި ޑްރަގް ޓްރެފިކިންގެ 94 މައްސަލައެއް ހިމެނޭއިރު، އޭގެ ތެރެއިން 84 މައްސަލައެއްގެ ތަހުގީގު ނިންމައި ދައުވާކުރަން ވަނީ ފޮނުވާފައެވެ.

އިތުރު ފިޔަވަޅުތަކުގެ ގޮތުން، މަސްތުވާތަކެތީގެ މައްސަލަތަކުގައި ހިމެނޭ 116 ބިދޭސީއަކު އިމިގްރޭޝަނާ ހަވާލުކޮށް ރާއްޖެއިން ފޮނުވާލާފައިވެއެވެ. އަދި މަސްތުވާތަކެތި ބޭނުންކުރާ 37 މީހަކު ފަރުވާއަށް ހަވާލުކޮށްފައިވާއިރު، މާލޭގައި ޑްރަގް އައްޑާގެ ގޮތުގައި ބޭނުންކުރި 6 ތަނެއް ވަނީ ބަންދުކޮށްފައެވެ.