ސްރީލަންކާގެ ތަޢުލީމާ ބެހޭ ޕާލަމެންޓް ކޮމިޓީން އެ ޤައުމުގެ ސްކޫލްތަކަށް ދިމާވެފައިވާ މުދައްރިސުންގެ ދަތިކަން ޙައްލުކުރުމާއި ތަޢުލީމީ ދާއިރާ އިޞްލާޙުކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފިއެވެ.

މި ބައްދަލުވުން ޕާލަމެންޓުގައި ބާއްވާފައިވަނީ ބޮޑުވަޒީރު އަދި ތަޢުލީމާއި މަތީ ތަޢުލީމާއި ފަންނީ ތަޢުލީމާ ބެހޭ ވަޒީރު ޑރ. ހަރިނީ އަމަރަސޫރިޔާގެ ރިޔާސަތުގެ ދަށުންނެވެ. މިއަދު ބޭއްވި މި ބައްދަލުވުމުގައި ސްކޫލް ތަޢުލީމުގެ ފެންވަރު މަތިކުރުމާއި ހުސްވެފައިވާ މުދައްރިސުންގެ މަޤާމުތައް ފުރުމާއި މުދައްރިސުން ބަދަލުކުރުމުގެ ނިޒާމު ހަރުދަނާ ކުރުމާ ގުޅޭ ކަންކަން ކުރުމަށް ވަނީ އެޖެންޑާކޮސްފައެވެ. އޭގެ އިތުރުން ހިންގުމުގައި ދަތި ސަރަޙައްދުތަކުގެ ސްކޫލްތަކަށް ބޭނުންވާ ވަސީލަތްތައް ފޯރުކޮށްދިނުމާ ގުޅޭ ގޮތުންވެސް މަޝްވަރާކޮށްފައިވެއެވެ.

ސައެންސާއި ހިސާބު ފަދަ މާއްދާތަކަށް ބޭނުންވާ މުދައްރިސުންގެ ޢަދަދު މަދުވެފައިވާތީ އައު މުދައްރިސުން ނެގުމުގެ މަރުޙަލާ އަވަސް ކުރުމަށް ކޮމިޓީން ވަކިން ބޮޑު އިސްކަމެއް ދީފައިވެއެވެ. ހަމައެއާ އެކު މުދައްރިސުންގެ ޢަދަދު ފުރިހަމަ ނުވެ އޮތް ސަރަޙައްދުތައް ދެނެގަނެ ފިޔަވަޅު އެޅުމުގެ ބޭނުންތެރިކަން ފާހަގަކޮށްފައިވެއެވެ.

ސްރީލަންކާގެ އުތުރު އަދި އިރުމަތީ ޕްރޮވިންސްތައް ހިމެނޭ ގޮތުން މުދައްރިސުން މަދު ސްކޫލްތަކަށް ޚާއްޞަ ސަމާލުކަމެއް ދޭންޖެހޭ ކަމަށްވެސް ބައްދަލުވުމުގައި ބާރު އަޅާފައިވެއެވެ. މި މަޝްވަރާތަކުގެ ނަތީޖާއެއްގެ ގޮތުން ތަޢުލީމީ ދާއިރާގެ ހިންގުން ހަރުދަނާކުރުމުގެ މަސައްކަތް ކުރިއަށް ގެންދާނެ ކަމަށް ބެލެވޭކަމަށް ސްރީލަންކާގެ މީޑިއާތަކުން ވަނީ ރިޕޯޓްކޮށްފައެވެ.