މުހިންމު މަސައްކަތް ނުނިމި ހުރި ކަމަށް ބުނެ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު މި މަހުގެ 20 ވަނަ ދުވަހުގެ ނިޔަލަށް ދަންމާލުމަށް މިއަދު ފާސްކޮށްފިއެވެ.

މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި، މަޖިލީހުގެ ރައީސް ޢަބްދުއްރަޙީމް ޢަބްދުالله ވަނީ ދައުރު ދަންމާލުމުގެ މައްސަލަ ރިޔާސަތުން ހުށަހަޅުއްވާފައެވެ.

މި ހުށަހެޅުމަށް މަޖިލީހުގައި ތިއްބެވި މެންބަރުންގެ މެދުގައި ނެގުނު ފެންނަ ނުފެންނަ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާޤުން ވަނީ ދައުރު ދަންމާލުމަށް ފާސްވެފައެވެ.

މަޖިލީހުގެ ގަވާއިދުގައިވާ ގޮތުން ދައުރުގެ އެންމެ ފަހު ޖަލްސާ ބޭއްވުމަށް ކުރިން ތާވަލުކުރެވިފައި އޮތީ މި މަހުގެ 13 ވާ ބުރާސްފަތި ދުވަހަށެވެ. 

ދައުރު ދަންމާލަން ފާސްކުރިއިރު، ކައުންސިލުތަކުގެ އިޚްތިޞާޞްގައި ހިމެނޭ ބިންތައް ސަރުކާރަށް ނެގޭ ގޮތަށް ލާމަރުކަޒީ ޤާނޫނަށް ހުށަހަޅާފައިވާ އިޞްލާޙުގެ މަސައްކަތް ނުނިމި އެބަ އޮތުމެވެ. މި ބިލު މިހާރު އޮތީ ކޮމިޓީ މަރުޙަލާގައެވެ. މި ބިލާ ގުޅިގެން ޢާންމުންގެ ކަންބޮޑުވުންތަކެއް ހުރިއިރު، ބިލާ ދެކޮޅަށް ތައްޔާރުކޮށްފައިވާ ޕެޓީޝަނެއް ވެސް މިހާރު ވަނީ މަޖިލީހަށް ހުށަހަޅާފައެވެ.