މާލެ ސަރަހައްދުގައި ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގި ކަމުގެ ތުހުމަތުގައި ބަންގްލަދޭޝްގެ 19 އަހަރުގެ ޒުވާނަކު ހައްޔަރުކޮށް ތަހުގީގު ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އިއްޔެ އަމުރުކޮށްފިއެވެ.
ހައްޔަރުކުރީ ސިއަމް ބެޕަރި ނަމަކަށް ކިޔާ މީހެކެވެ. އޭނާގެ މައްޗަށް ކުރަނީ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމާއި ޖެހުމާއި މުދަލަށް ގެއްލުން ދިނުމުގެ ތުހުމަތެވެ.
ކޯޓު އަމުރުގައިވާ ގޮތުން އެ ކުށް ކުރި ކަމަށް ބެލެވޭ މިންވަރަށް ހެކި ހުށަހެޅިފައި ހުއްޓެވެ. ހެކީގެ ގޮތުގައި ހިމެނެނީ އިންޓެލިޖެންސް ރިޕޯޓާއި އަނިޔާގެ ފޮޓޯތަކާއި ބަޔާންތައް ކަމަށް އެ އަމުރުގައި ބަޔާންކޮށްފައިވެއެވެ.
އެ ހާދިސާގައި މީހަކަށް ޖިސްމާނީ ގޮތުން ބޮޑެތި އަނިޔާތަކެއް ލިބުނު ކަމާއި ތުހުމަތު ކުރެވޭ ސިއަމް ބެޕަރިއަށް ވެސް އަނިޔާވެފައިވާ ކަން ކޯޓު އަމުރުން އެނގެއެވެ.
ބަންދު އަމުރު ނެރެފައި ވަނީ ގޭންގުތައް މެދުވެރިކޮށް ހިންގާ ކުށްތަކާއި ނުރައްކާތެރި އެހެނިހެން ކުށްތައް ހުއްޓުވުމުގެ ޤާނޫނުގެ ދަށުންނެވެ. އެ މާރާމާރީއާ ގުޅޭ އިތުރު ތަފްސީލެއް ފުލުހުންގެ ފަރާތުން އަދި ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
