ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ޔުނިސެފް މޯލްޑިވްސް އަދި މިނިސްޓްރީ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓް ގުޅިގެން، ބައިނަލްއަގުވާމީ ޒުވާނުންގެ ދުވަހާ ގުޅުވައިގެން ޚާއްސަ "ޕޮލިސީ ޑައިލޮގް" އެއް ބާއްވައިފިއެވެ.

"ސްކިލްސް ފޯ އަ ޝެއަރޑް ފިއުޗަރ: ބިލްޑިންގ ފިއުޗަރ-ރެޑީ ކޮމްޕިޓެންސީސް އެންޑް ސްޓްރެންތެނިންގ ލާރނިންގ-ޓު-އާރނިންގ ޓްރާންސިޝަންސް" ގެ ނަމުގައި ބޭއްވި މި މަޝްވަރާ ބައްދަލުވުމުގެ މައިގަނޑު މަގްސަދަކީ، ތައުލީމީ ދާއިރާއިން މަސައްކަތުގެ ބާޒާރަށް ޒުވާނުން ނުކުންނަ މަގު ފަހިކޮށްދިނުމާއި، މުސްތަގުބަލަށް ބޭނުންވާ މުހިންމު ހުނަރުތައް އުނގަންނައިދިނުމާ ގުޅޭގޮތުން މަޝްވަރާ ކުރުމެވެ.

މި ބައްދަލުވުމުގައި ސަރުކާރުގެ ކަމާބެހޭ އިދާރާތަކާއި، ތައުލީމީ މުއައްސަސާތަކާއި، ވަޒީފާދޭ ފަރާތްތަކުގެ އިތުރުން މަދަނީ ޖަމިއްޔާތަކާއި ޒުވާނުން ވަނީ ބައިވެރިވެފައެވެ. މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ ތައުލީމީ ނިޒާމާއި މަސައްކަތުގެ ބާޒާރާ ދެމެދު ހުރި ހުސްކަން ފޫބެއްދުމަށާއި، ޑިޖިޓަލް ހުނަރާއި، ފާޑުކިޔުންތެރި ވިސްނުމާއި، ލީޑަރޝިޕް އަދި މަސައްކަތުގެ މާހައުލަށް ބޭނުންވާ ތަމްރީނުތައް އިތުރުކުރުމުގެ މައްޗަށެވެ.

ބައްދަލުވުން ފައްޓަވައިދެއްވަމުން އެމްއެންޔޫގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމް ވިދާޅުވީ، ބަދަލުވަމުންދާ ދުނިޔެއަށް ޒުވާނުން ތައްޔާރުކުރުމުގައި މަތީ ތައުލީމުގެ ދައުރު ނުހަނު ބޮޑު ކަމަށެވެ. އަދި އެމްއެންޔޫގެ ނިންމުންތަކަކީ ހޯދުންތަކުގެ މައްޗަށް ބިނާވެފައިވާ ނިންމުންތަކެއްކަން ފާހަގަކުރައްވައި، ކުރިއަށް އޮތް ސެމިސްޓަރގައި "އެމްއެންޔޫ ފިއުޗަރ ރެޑީ ސީރީޒް" ގެ ނަމުގައި ކެރިއަރ ގައިޑެންސް ޕްރޮގްރާމެއް ފަށާނެކަން އިއުލާނު ކުރެއްވިއެވެ.

މި ބައްދަލުވުމުގެ ތެރެއިން "ލޮސްޓް އިން ޓްރާންސިޝަން" ގެ ނަމުގައި އެމްއެންޔޫއިން ތައްޔާރުކޮށްފައިވާ ދިރާސާ ރިޕޯޓެއްވެސް ވަނީ ނެރެފައެވެ. މީގެ އިތުރުން، އަތޮޅުތެރޭގެ ޒުވާނުންނަށް މަސައްކަތުގެ ފުރުސަތުތައް ހޯދައިދިނުމާއި، އަމިއްލަ މަސައްކަތްކުރުން ނުވަތަ އެންޓްރަޕްރިނިއަރޝިޕް ކުރިއެރުވުމާ ގުޅޭގޮތުން ޚާއްސަ ޕެނަލް ޑިސްކަޝަންތަކެއް ވަނީ ކުރިއަށް ގެންގޮސްފައެވެ.

މި މަޝްވަރާތަކުން ނުކުންނަ ނަތީޖާތަކުގެ އަލީގައި، ޔުނިސެފް މޯލްޑިވްސްގެ ކުރިއަށް އޮތް ފަސް އަހަރުގެ ޕްލޭން އެކުލަވާލުމަށާއި، ޒުވާނުންގެ ވަޒީފާގެ ފުރުސަތުތައް އިތުރުކުރުމަށް ސަރުކާރުން އެކުލަވާލާ ސިޔާސަތުތަކަށް ބޮޑެތި އެހީތެރިކަމެއް ލިބިގެންދާނެއެވެ.