މި ސަރުކާރުން ދަރަނި ދެއްކީ އެމްޑީޕީ ސަރުކާރުން އެއްކުރި ފައިސާއިން ކަމުގައި ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އިދިކޮޅު އެމްޑީޕީން "ދަތިވެއްޖެ" ނަމުގައި މިރޭ ބޭއްވި މުޒާހާރާގައި ވާހަކަ ދައްކަވަމުން ނަޝީދު ވިދާޅުވީ ސަރުކާރުން ދަރަނި ދެއްކީ ރިޒާވްގައި ހުރި ފައިސާކޮޅު ހުސްކޮށްލައިގެން ކަމަށެވެ. އަދި އަތުގައި ހުރި މަދު ފައިސާކޮޅު ހުސްކޮށް ނުލާން އެމްޑީޕީން ތަކުރާރުކޮށް އެދިފައި ވަނިކޮށް ކަމަށެވެ.
ނަޝީދު ވިދާޅުވީ ދަރަނި ދައްކަން ރިޒާވްގައި ހުރި ފައިސާއަކީ ނިމިދިޔަ އެމްޑީޕީ ސަރުކާރުން އެއްކޮށްފައި ހުރި ފައިސާ ކަމަށެވެ.
"މި ދަރަނި އަދާކުރުމަށް އެއްކޮށްފައި ހުރި ފައިސާއަކީ ކުރީގެ އެމްޑީޕީ ސަރުކާރުން އެއްކޮށްފައިވާ ރިޒާވް. އަދި އެހެންވެސް ސަރުކާރު އަތުގައި އޮތް ފައިސާއަކީ ކުރީގެ ސަރުކާރުން އެއްކޮށްފައި އޮތް އެ ސަރުކާރުގެ ރިޒާވް,"
ނަޝީދު ވަނީ ދަރަނި ދައްކަން ރިޒާވްގައި ހުރި ޑޮލަރު ހުސްކޮށްލުމުން ޑޮލަރުގެ އަގު ދުވަހެއް ދުވަހަކަށް އުފުލެމުންދާ ކަމަށް ވިދާޅުވެފަ އެވެ. އަދި ޑޮލަރުގެ އަގު އުފުލެމުންދާ ވަރަކުން ތަކެތީގެ އަގު ދަނީ ބޮޑުވަމުން ކަމުގައި ވިދާޅުވި އެވެ.
އެމަނިކުފާނު ވަނީ ކުރިއަށް އޮތް 10 ދުވަހުގެ ތެރޭައި ކަޅު ބާޒާރުގައި ޑޮލަރު ލިބޭ އަގު 19 ރުފިޔާއަށް ތިރިކުރުމަށް ފިޔަވަޅު އެޅުމަށް ގޮވާލައްވާފަ އެވެ. އެކަން ކުރުމަށް އެމްއެމްއޭއިން ބެންކުތަކަށް އެ އަދަދަށް ޑޮލަރު ދޫކުރަން ޖެހޭ ކަމުގައި ވިދާޅުވި އެވެ.
"އެވަރަށް ތިބޭފުޅުންގެ އަތުގައި ޑޮލަރު ނެތްނަމަ އެ ވާހަކަވެސް ވިދާޅުވާށޭ,"
ނަޝީދު ވިދާޅުވީ އެމްޑީޕީއަށް ޑޮލަރުގެ މައްސަލަ ހައްލު ކުރެވޭނެ ގޮތް އެނގޭ ކަމަށެވެ. އަދި އެ މައްސަލަ ހައްލުކުރުމަށް އެ ކަމަށް ބޭނުންވާ ފައިސާ ރާއްޖެއަށް ގެންނަން އެމްޑީޕީން ފަރިތަ ކަމަށް ވިދާޅުވި އެވެ.
މީގެ އިތުރުން ނަޝީދު ވަނީ ރިސޯޓްތަކަށް ލިބޭ ބޭރު ފައިސާގެ އާމްދަނީން 20 ޕަސެންޓް މާރުކުރަން މަޖުބޫރުކުރުވައިފިނަމަ އެއީ ވަރަށް ބޮޑު ގޮންޖެހުމަކަށްވާނެ ކަމަށާ އެކަމުގެ ސަބަބުން ރިސޯޓްތައް ހަދަން އެ ރިސޯޓްތަކުގެ ވެރީން ނަގާފައިވާ ދަރަނި ދައްކަން ދަތިވާނެ ކަމަށް ވިދާޅުވެފަ އެވެ.
މި ސަރުކާރުން ގެންގުޅޭ ސިޔާސަތުގެ ސަބަބުން ޑޮލަރުގެ މައްސަލަ ވާނީ އިތުރަށް ގޯސް ކަމުގައި ވިދާޅުވި އެވެ.
މި ސަރުކާރުން ވަނީ ދަރަނި ދެއްކުމަށް ބިލިއަނެއްހާ ޑޮލަރު ހޭދަކޮށްފަ އެވެ.
މި ސަރުކާރުން ދަރަނި ދެއްކީ އެމްޑީޕީ ސަރުކާރުން އެއްކުރި ފައިސާއިން ކަމުގައި ކުރީގެ ރައީސް މުހައްމަދު ނަޝީދު ވިދާޅުވިނަމަވެސް ރައީސް ސޯލިހްގެ ސަރުކާރާއި ދެކޮޅަށް މަޖިލީހުގައި ވާހަކަ ދައްކަވަމުން ނަޝީދު ވަނީ 53 މިލިއަން ޑޮލަރު ކަމުގައި ވިދާޅުވެފަ އެވެ. އަދި ގައުމު ބަނގުރޫޓްވަމުންދާ ކަމަށް ތަކުރާރުކޮށް ވިދާޅުވި އެވެ.
ރައީސް މުޢިއްޒު ވެސް ވަނީ އެމަނިކުފާނު ވެރިކަމާއި ހަވާލުވެވަޑައިގެންނެވިއިރު ސޮވްރިން ޑިވެލޮޕްމަންޓް ފަންޑުގައި ހުރީ ދެ މިލިޔަން ޑޮލަރުގައި ކަމަށް ވިދާޅުވެފަ އެވެ. އެމްޑީޕީ ސަރުކާރު ހަވާލުވިއިރު ރައީސް ޔާމީންގެ ސަރުކާރުން ވަނީ ސޮވްރިން ފަންޑުގެ އަދަދު 500 މިލިއަން އެމެރިކާ ޑޮލަރަށްވުރެ މައްޗަށް ގެންގޮސްފަ އެވެ.
Advertisement
This content is created and paid for by advertisers and does not involve Voice Journalists
