ވަކިވަކިން ކުރާ މަސައްކަތަށްވުރެ ގުޅިގެން އެންމެން އެކުގައި ކުރާ މަސައްކަތުން ނުކުންނަ ނަތީޖާ ބޮޑުތަނުން ރަނގަޅުވާނެ ކަމުގައި ކަމުގައި އިސްލާމީ ޔުނިވާސިޓީގެ ވައިސް ޗާންސެލާ ޑރ. ޢަލީ ޒަހީރު ބިން ސަޢީދު ޤާސިމް ވިދާޅުވެއްޖެއެވެ.

ޑރ. ޢަލީ ޒާހިރު މިފަދައިން ވިދާޅުވީ، ޖަމިއްޔަތުއް ސަލަފުން އިންތިޒާމްކޮށްގެން ކުރިއަށް ގެންދާ މަދަނީ ޖަމިއްޔާ ތަކުގެ މަހާސިންތާ ފެށުމުގެ ޖަލްސާ ޝަރަފުވެރިކޮށްދެއްވައި، ވާހަކަދައްކަވަމުންނެވެ. މިފަހަރުގެ މަހާސިންތާގެ ޝިޢާރަކީ “ގުޅިގެން އޯގާތެރި މުޖުތަމަޢަކަށް” އެވެ. 

ރޭ ދާރުލް އާސާރުގައި ބޭއްވި މި ޖަލްސާގައި ޖަމިއްޔަތުއްސަލަފްގެ އިސްވެރިންނާއި ޢިލްމުވެރިން ބައިވެރިވެވަޑައިގެންނެވިއެވެ. އަދި، ރާއްޖޭގެ އެކިކަންކޮޅުތަކުން މި މަހާސިންތާގައި ބައިވެރިވި 40 ޖަމިއްޔާގެ މެންބަރުން ބައިވެރިވިއެވެ. 

އެ ސަބަބަށްޓަކައި އެކުވެރިކަމާއި އެއްބައިވަންތަކަމުގެ މައްޗަށް އިސްލާމްދީނުގައި ވަރަށް ބޮޑަށް ބާރުއަޅާފައިވާކަން ޑރ. ޢަލީ ޒާހިރު ފާހަގަކުރެއްވިއެވެ. އަދި އެއް އުއްމަތެއްގެ ގޮތުގައި އޮތުމަށްޓަކައި ގުޅިގެން މަސައްކަތް ކުރުމަކީ ވަރަށް ބޭނުންތެރި ކަމެއް ކަމަށްވެސް ވިދާޅުވިއެވެ. 

މިއާއެކު ޑރ. އަލީ ޒާހިރު ވަނީ ގުޅިގެން ސުންނަތުގެ އަލީގައި، ގުޅިގެން މަސައްކަތް ކުރުމުން ނުކުންނަ ނަތީޖާ ރަނގަޅުވާކަން ހާމަކުރެއްވުމަށް ހިޖުރައިގެ ދަތުރުގެ މައްޗަށް އަލިއަޅުވާލައްވާފައެވެ. އެގޮތުން އެ ދަތުރުގެ ކަންކަން އެންމެ ރަނގަޅު ގޮތުގައި ކުރިއަށް ގެންދިޔުމަށް އެކި ބޭފުޅުންނާ އެކި މަސައްކަތް ހަވާލުކުރެއްވި ކަން ފާހަގަކުރެއްވިއެވެ.

އެހެންކަމުން، ހުރިހާ ޖަމިއްޔާތަކެއް އެކުގައި މަސައްކަތްކޮށް، އެއްބައެއްގެ ހުނަރު އަނެއް ބަޔަކަށް ދަސްކޮށްދީގެން ގުޅިގެން ކުރިއަށް ދިޔުމަށް ޑރ. ޢަލީ ޒާހިރު އެދިވަޑައިގެންނެވިއެވެ. 

ކޮންމެ ދެއަހަރަކުން އެއްއަހަރު ބޭއްވުމަށް ހަމަޖެހިފައިވާ މަދަނީ ޖަމްޢިއްޔާތަކުގެ މަހާސިންތާ ބާއްވާ މިއީ ދެވަނަ ފަހަރެވެ. އެންމެ ފުރަތަމަ މަހާސިންތާ 20 ޖަމްޢިއްޔާއާއެކު ބާއްވާފައިވަނީ 3 ފެބްރުއަރީ 2024 ގައި އއ. މަތިވެރީގައެވެ.