މި ސަރުކާރާމެދު ރައްޔިތުން ދުށް ހުވަފެންތައް ބިލާހަކަށްވެ ނިމިއްޖެ ކަމަށާއި އުއްމީދުކުރި ފެހި ސިގްނަލްތައް ނިވި ރަތްވެފައިވާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ދަތިވެއްޖެ ނަމުގައި އިދިކޮޅު އެމްޑީޕީން ރޭ ބޭއްވި މުޒާހަރާ ފައްޓަވަމުން ދެއްކެވި ވާހަކަފުޅުގައި ޝާހިދު ވިދާޅުވީ، ސަރުކާރުން ރައްޔިތުންނަށް ގެނެސްދޭންބުނި ހަމަ އެއްވެސް ކަމެއް ހާސިލްނުވި ނަމަށާއި ނަތީޖާއަކީ މިއަދު ރައްޔިތުންނަށް އެތައް ގޮތަކުން ދަތިވުންކަމަށެވެ.

ރާއްޖޭގެ އިގްތިސާދާއި އާންމުންގެ ދިރިއުޅުން ނިހާޔަތަށް ދަތިވެފައިވާކަން ފާހަގަކުރައްވަމުން ޝާހިދު ވިދާޅުވީ، މިދިޔަ އަހަރުތަކުގައި ރާއްޖޭގެ އިންފްލެޝަން ނުވަތަ ބާޒާރުގައި މުދަލާއި ތަކެތީގެ ހިދުމަތް އެންމެ މައްޗަށް ގޮސްފައިވަނީ މިދިޔަ އަހަރު ކަމަށެވެ. އެގޮތުން ބާޒާރުގައި އާންމުން އެންމެބޮޑަށް ބޭނުންކުރާ ތަކެތީގެ ބާވަތްތަކުގެ އަގުތައް އިންތިހާއަށް މައްޗަށްގޮސްފައިވާކަން ޝާހިދު ފާހަގަކުރެއްވިއެވެ.

ޝާހިދު ވިދާޅުވީ ތަކެތީގެ އަގުތައް މައްޗަށް ދިޔައީމާ ރައްޔިތުން މިއަދު ގޮވަމުންދަނީ ދަތިވެއްޖެ ކަމަށާއި އެކަން އިސްލާހްކޮށްދިނުމަށް ކަމަށެވެ. ނަމަވެސް ދިމާވެފައިވާ މައްސަލަތައް ހައްލުކުރުމަށް ނިކަމެތި ރައްޔިތުންނަށް ނިކަމެތިގޮތް ހެދުން ނޫން ކަމެއް އަދި ނުފެންނަކަން ޝާހިދުގެ ވާހަކާގައި ފާހަގަކުރެއްވިއެވެ. އެގޮތުން ސަރުކާރުގެ ހަރަދުތައް ކުޑަކުރުމަށް ވަޒީފާތަކުން ކަނޑަމުންދަނީ ނިކަމެތި ރައްޔިތުން ކަމަށާއި، ސިޔާސީ މަގާމްތަކަށް އަދިވެސް މީހުން އިތުރުކުރަމުންކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ މި ސަރުކާރުން ރައްޔިތުންނަށް އެދޭ ހެވެއް ނެތްކަމަށާއި، ސަރުކާރު މިއަދު ވަނީ ބޮޑުތަނުން ފެއިލްވެފައިކަމަށެވެ. އެހެންކަމުން ރައްޔިތުންގެ ހައްޤުގައި މި ސަރުކާރު ބަދަލުކުރުން ނޫންގޮތެއް އެމްޑީޕީއަށް ނެތްކަމަށް ޝާހިދު ފާހަގަކުރެއްވިއެވެ.