ނިޝާން ދިޔަމިގިލީގެ ޝަރަފުގެ ޢިއްޒަތް، ދިވެހިބަހާއި އަދަބިއްޔާތުގެ ދާއިރާގެ އިތުރުން ދިވެހި ދައުލަތަށް 41 އަހަރަށްވުރެ ދިގު މުއްދަތެއްގައި ހިދުމަތްކުރެއްވި އަލްއުސްތާޛު ކަށިމާ އަޙްމަދު ޝާކިރަށް އަރުވައިފިއެވެ.
ނިޝާން ދިޔަމިގިލީގެ ޝަރަފުގެ ޢިއްޒަތް ކަޝިމާ ޝާކިރަށް އެރުވީ ހއ.އުތީމްގައި ބެއްވި ޤައުމީ ދުވަހުގެ ރަސްމީ ޖަލްސާގައެވެ.
ކަށިމާ އަޙްމަދު ޝާކިރަކީ ދިވެހި ބަހާއި، އަދަބިއްޔާތު، އަދި ތާރީޚުގެ ރޮނގުން 60 އަހަރަށްވުރެ ގިނަ ދުވަހު ޤައުމީ ޚިދުމަތް ކުރައްވާފައިވާ، ދައުލަތުގެ އެންމެ މަތީ ޢިއްޒަތް އަރުވާފައިވާ ބޭފުޅެކެވެ. 1969 ވަނަ އަހަރު ސަރުކާރުގެ ޗާޕުޚާނާއިން ޚިދުމަތް ފެއްޓެވި ޝާކިރަކީ "ވިހިވަނަ ޤަރުނުގެ ތެރޭގައި ދިވެހިރާއްޖެ" ފޮތް ހިމެނޭހެން، ރާއްޖޭގެ ތާރީޚާއި، ސިޔާސީ ދާއިރާއާއި، މުހިންމު ޝަޚުޞިއްޔަތުތަކުގެ ބައޮގްރަފީ ހިމެނޭ ގިނަ ފޮތްތަކެއް ލިޔުއްވާފައިވާ މާހިރެކެވެ.
ތަޢުލީމީ ގޮތުން އުމުރުން 69 އަހަރުގައި މާސްޓާޒް އޮފް ޝަރީޢާ ހާސިލުކުރައްވައި، ޤާނޫނީ ވަކީލެއްގެ ގޮތުގައިވެސް މަސައްކަތް ކުރައްވާފައިވާ ޝާކިރަކީ، ވާހަކަދެއްކުމާއި، ޅެންވެރިކަމާއި، ނޫސްވެރިކަމުގެ ރޮނގުން އެތައް ފަހަރަކު ޤައުމީ އިނާމު ހާސިލުކުރައްވާފައިވާ ބޭފުޅެކެވެ. މީގެ އިތުރުން ޙައްޖު ކޯޕަރޭޝަންގެ އިދާރީ އިންތިޒާމުތައް ރޭވުމުގައާއި ބައިނަލްއަޤުވާމީ ފެންވަރުގައި ތާރީޚީ ކަންކަމުގައި ރާއްޖެ ތަމްސީލުކުރެއްވުމުގައިވެސް އޭނާ ވަނީ ފާހަގަކޮށްލެވޭ މަސައްކަތްތަކެއް ކުރައްވާފައެވެ.
Advertisement
This content is created and paid for by advertisers and does not involve Voice Journalists
