ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ އަންޑަރގްރެޖުއޭޓް ދަރިވަރުންގެ ދިރާސީ މަސައްކަތްތައް ދައްކާލުމަށް ބާއްވާ "އަންޑަރގްރެޖުއޭޓް ސްޓޫޑެންޓް ރިސާޗް ސިމްޕޯޒިއަމް" (ޔޫއެސްއާރްއެސް) ގެ ދެވަނަ އެޑިޝަން މިއަދު ކާމިޔާބުކަމާއެކު ބާއްވައިފިއެވެ.
މި ސިމްޕޯޒިއަމަކީ އަންޑަރގްރެޖުއޭޓް ފެންވަރުގައި ތަޢުލީމު ހާސިލުކުރަމުންދާ ދަރިވަރުންގެ ދިރާސާތައް އެކަޑަމިކް މާޙައުލެއްގައި ހުށަހަޅައި، ލެކްޗަރާއިންނާއި، އިވެލުއޭޓަރުން އަދި އެހެން ދަރިވަރުންނާ ޚިޔާލު ބަދަލުކުރުމުގެ ފުރުޞަތު ފަހިކޮށްދިނުމުގެ މަޤްޞަދުގައި ބޭއްވި ޙަރަކާތެކެވެ.
އެމްއެންޔޫއިން މަޢުލޫމާތު ދެއްވި ގޮތުގައި މިއަހަރުގެ ސިމްޕޯޒިއަމަށް 31 އެބްސްޓްރެކްޓް ބަލައިގެންފައިވާއިރު، އޭގެ ތެރެއިން 19 ދަރިވަރަކު ވަނީ މި އިވެންޓުގައި އެ ދަރިވަރުންގެ ދިރާސާތައް ހުށަހަޅާފައެވެ. މި ޕްރެޒެންޓޭޝަންތައް ތަފާތު އެކި ދާއިރާތަކަށް އަމާޒުކުރެވިފައިވާއިރު، މިއިން ދައްކުވައިދެނީ އެމްއެންޔޫގެ ދަރިވަރުންގެ މެދުގައި އޮތް ދިރާސީ ޝައުޤުވެރިކަމާއި އެކި ދާއިރާތަކުން ދިރާސާކުރުމުގެ ޤާބިލުކަން ކަމަށް އެ ޔުނިވަރސިޓީން ފާހަގަކުރެއެވެ.
މި ސިމްޕޯޒިއަމްގެ ސަބަބުން ދަރިވަރުން ހޯދި ހޯދުންތައް ޢާންމުކުރުމުގެ އިތުރުން، ދާއިރާގެ ތަޖުރިބާކާރުންނާއި ޔުނިވަރސިޓީގެ އެކަޑަމިކް މުވައްޒަފުންގެ ފަރާތުން އަގުހުރި ފީޑްބެކް ލިބިގެންދިޔައެވެ. އަދި އެކަޑަމިކް ޕްލެޓްފޯމެއްގައި އަމިއްލަ ޚިޔާލުތަކާއި ދިރާސާތައް ހުށަހެޅުމުގެ އަގުހުރި ތަޖުރިބާ ލިބި، ދަރިވަރުންގެ އަމިއްލަ ނަފްސަށް އޮންނަ އިތުބާރު ބޮޑުވެ، އިތުރު ދިރާސާތަކަށް ޝައުޤުވެރިކަން އުފެދިގެންދިޔައެވެ.
އެމްއެންޔޫއިން ބުނި ގޮތުގައި ޔޫއެސްއާރްއެސް އަކީ ދަރިވަރުންގެ މެދުގައި ދިރާސާކުރުމުގެ ވަރުގަދަ ސަޤާފަތެއް ޤާއިމުކުރުމަށާއި، ތަޢުލީމީ ޙަޔާތުގެ ކުރީކޮޅުން ފެށިގެން ދިރާސީ މަސައްކަތްތަކުގައި ބައިވެރިވުމަށް ހިތްވަރު ދިނުމުގެ ގޮތުން ސިލްސިލާކޮށް ކުރިއަށްގެންދާ މަސައްކަތެކެވެ. މީގެ އިތުރުން، މި ޙަރަކާތުގެ ސަބަބުން ދަރިވަރުންނަށް އެ ބޭފުޅުންގެ މުސްތަޤްބަލުގެ ކެރިއަރަށާއި މަތީ ތަޢުލީމަށް މަގުފަހިވާނެ ފަދަ ނެޓްވަރކިންގ ފުރުޞަތުތައްވެސް ވަނީ ފަހިވެފައެވެ.
ދިވެހިރާއްޖޭގެ ޤައުމީ ޔުނިވަރސިޓީން އަބަދުވެސް މަސައްކަތް ކުރަމުންދަނީ ދަރިވަރުންގެ މެދުގައި އުފެއްދުންތެރިކަމާއި އެކަޑަމިކް ފެންވަރު މަތިކޮށް، މުޖުތަމަޢަށް ފައިދާހުރި ދިރާސާތައް ކުރުމަށް ފުރުޞަތުތައް ފަހިކޮށްދިނުމަށެވެ. އެގޮތުން ޔޫއެސްއާރްއެސް ފަދަ ޕްލެޓްފޯމްތައް މެދުވެރިކޮށް އިލްމު ކުރިއެރުވުމަށް އެމްއެންޔޫއިން އަބަދުވެސް މަސައްކަތް ކުރަމުން ގެންދާނެ ކަމަށް އެ ޔުނިވަރސިޓީން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
