ރާއްޖޭގެ އެންމެ ބޮޑު އޯޕަން ވޯޓާ ފެތުމުގެ މުބާރާތް ކަމަށްވާ ދިރާގު މާލެ އޯޕަން 2026ގައި ބައިވެރިވާ ފެތުންތެރިންނަށް ރޭސް ކިޓް މިއަދުން ފެށިގެން ދޫކުރަން ފަށާފައިވާ ކަމަށް ދިރާގުން ބުނެފިއެވެ.

ރޭސް ކިޓް ހަވާލުކުރުން ކުރިއަށް ގެންދަނީ 18 އިން 20 އޮގަސްޓާ ހަމައަށް ދިރާގު ހެޑް އޮފީހުގައި ބާއްވާ ޑީއެމްއޯ އެކްސްޕޯގައި ކަމަށް ދިރާގުން ބުނެއެވެ. ކޮންމެ ދުވަހެއްގެ ހަވީރު 5:00 އިން ރޭގަނޑު 10:00 އާ ދެމެދު ކިޓް ނެގޭނެ ކަމަށާއި ކިޓުގައި މުބާރާތުގެ ރަސްމީ ޓީޝާޓާއި ސްވިމް ކެޕް ހިމެނޭ ކަމަށް ދިރާގުން ބުނެއެވެ.

ސްވިމް މޯލްޑިވްސް އިން އިންތިޒާމުކުރާ މި މުބާރާތް އޮގަސްޓް 21 އަދި 22 ވަނަ ދުވަހު މާލޭ ރަސްފަންނު ސަރަޙައްދުގައި ބާއްވާ އިރު މި ފަހަރު އެއް ކިލޯމީޓަރު 500 މީޓަރު އަދި 250 މީޓަރުގެ ކެޓެގަރީތަކުގެ އިތުރުން 500 މީޓަރުގެ ޓީމް ރިލޭ ކެޓެގަރީއެއް ވެސް ވަނީ އަލަށް ތަޢާރަފުކޮށްފައެވެ. ދިރާގުން ބުނީ ޓީމް ރިލޭގެ ސަބަބުން ރައްޓެހިންނާއި އާއިލާ އަދި ފަތާ ކްލަބުތަކުގެ ފެތުންތެރިންނަށް އެކުގައި ޓީމެއްގެ ގޮތުގައި ވާދަކުރެވޭނެ ކަމަށެވެ.

އޯޕަން ވޯޓާ ފެތުން ރާއްޖޭގައި ކުރިއެރުވުމާއި މި ކުޅިވަރަށް ޝައުޤުވެރިކަން އިތުރުކުރުމުގެ އިތުރުން ރާއްޖޭގެ ކަނޑުތައް ރައްކާތެރިކުރުމަށް ހޭލުންތެރިކަން އުފެއްދުމަކީ މި މުބާރާތުގެ މައިގަނޑު މަޤުޞަދު ކަމަށް ދިރާގުން ބުނެއެވެ. ދިރާގަކީ ދުޅަހެޔޮ ދިރިއުޅުމާއި އިޖުތިމާޢީ ގުޅުން ބަދަހިކުރެވޭ ކުޅިވަރު ހަރަކާތްތަކަށް އެހީތެރިކަން ފޯރުކޮށްދެމުން އަންނަ ކުންފުންޏެކެވެ.