އެމްއެމްއޭއިން ކަނޑައަޅާފައިވާ ރޭޓަށް ވުރެ މަތީ އަގުގައި ބޭރު ފައިސާ ގަނެވިއްކާ ކަމުގެ މަޢުލޫމާތު މީޑިއާ މެދުވެރިކޮށް ނުވަތަ އެ ނޫން ވެސް ގޮތަކަށް ޢާންމުކުރުން ކުށަކަށް ހެދުމަށް ބޭރު ފައިސާއާ ބެހޭ ބިލަށް ގެނައި އިސްލާހު ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ފާސްކޮށްފިއެވެ.
ފުނަދޫ ދާއިރާގެ ޕީއެންސީ މެންބަރު މުޙައްމަދު މަމްދޫޙު ހުށަހެޅުއްވި މި އިސްލާހުގައި ބަޔާންކޮށްފައިވާ ގޮތުން މަރުކަޒީ ބޭންކުން އިޢުލާނުކޮށްފައިވާ ރޭޓު ނުވަތަ ބޭންޑުގެ ބޭރުން ހިންގާ ފައިސާގެ މުޢާމަލާތްތައް ޕްރޮމޯޓުކުރުމާއި ޑިޖިޓަލް ވަސީލަތެއް ނުވަތަ އެ ނޫން ވެސް ގޮތަކުން އެ ފަދަ ރޭޓެއް ނުވަތަ އަގެއް ޢާންމުންނަށް ފެންނާނެހެން ހާމަކޮށް ފެތުރުމާއި ތަކުރާރުކޮށް ފޯރުކޮށްދިނުމަކީ ކުށެކެވެ.
އޮތޯރިޓީން ކަނޑައަޅާފައިވާ ރޭޓާ ޚިލާފަށް ބޭރުފައިސާ އިޝްތިހާރުކުރުމާއި ޕްރޮމޯޓްކުރުމަކީ ކުށެއް. އިޝްތިހާރު ކުރުމާއި ޕްރޮމޯޓްކުރުން ކަމަށް ބުނެފައި އެވަނީ ބޭރުފައިސާ ގަނެވިއްކުމަށް އޮތޯރިޓީން ރަސްމީކޮށް ކަނޑައަޅާފައިވާ ރޭޓް ނުވަތަ ބޭންޑަށްވުރެ މަތީ ރޭޓެއްގައި ނުވަތަ ކަނޑައަޅާފައިވާ ބޭންޑުގެ ބޭރުން ކުރާ ވިޔަފާރިއާ ގުޅޭ ރޭޓެއް ނުވަތަ އަގެއްގައި ބޭރުފައިސާ ގަނެވިއްކުން އިޝްތިހާރު ކުރުމާއި، ނުވަތަ އެކަމަށް ހިތްވަރު ދިނުމަށްޓަކައި، ނުވަތަ އެކަން ފެތުރުމަށް ޑިޖިޓަލް ވަސީލަތަކުން، ނުވަތަ ޕްލެޓްފޯމަކުން ނުވަތަ އެހެންވެސް ވަސީލަތަކުން އާއްމުކޮށް އެމގޭނެހެން އެފަދަ މައުލޫމާތު ހާމަކުރުމާއި ޝާއިއުކުރުމާ ފެތުރުމާ ތަކުރާރު ކުރުމާ ފޯރުކޮށްދިނުން
އިސްލާހް ހުށަހަޅުއްވަމުން މަމްދޫހް ވިދާޅުވިއެވެ.
މި ކުށް ކޮށްފި އާދައިގެ ފަރާތެއް 25000ރ. އާއި 500000ރ. އާ ދެމެދުގެ ޢަދަދަކުން ޖޫރިމަނާ ކުރެވޭ އިރު ޤާނޫނީ ޝަޚުޞެއް ނުވަތަ ރަޖިސްޓްރީކޮށްފައިވާ ވިޔަފާރިއެއް ނަމަ 100000ރ. އާއި ފަސް މިލިއަން ރުފިޔާއާ ދެމެދުގެ ޢަދަދަކުން ޖޫރިމަނާ ކުރެވޭނެއެވެ.
މީގެ އިތުރުން ބިލަށް ގެނައި ބަދަލުތަކުގެ ތެރޭގައި ބޭރު ފައިސާ ގަނެވިއްކުމުގެ ހުރިހާ މުޢާމަލާތެއް ހިންގަން ޖެހޭނީ އެމްއެމްއޭއިން ކަނޑައަޅައި ޢާންމުކޮށްފައިވާ ރޭޓު ނުވަތަ ބޭންޑުގެ ހުދޫދުގެ ތެރޭގައި ކަމަށް ލާޒިމުކުރާ މާއްދާއެއް ވެސް ހިމެނެއެވެ. އެ ރޭޓަށް ވުރެ ބޮޑުކޮށް ބޭރު ފައިސާ ވިއްކައިފި ނަމަ ކުށުގެ ކުޑަބޮޑުމިނަށް ބަލައި 25000ރ. އާއި އެއް މިލިއަން ރުފިޔާއާ ދެމެދުގެ ޖޫރިމަނާއެއް ކުރެވޭ ގޮތަށް ވެސް ވަނީ އިސްލާހުކޮށްފައެވެ.
މި އިސްލާހުތައް ކޮމެޓީން ފާސްކޮށްފައިވާ އިރު ދެން ބިލު ދާނީ ރައްޔިތުންގެ މަޖިލީހުގެ ތަޅުމުގައި ވޯޓަށް އެހުމަށެވެ.
ސަރުކާރުގެ ފަރާތުން ހޮޅުދޫ ދާއިރާގެ ޕީއެންސީ މެންބަރު ޢަބްއްސައްތާރު މުޙައްމަދު ފުރަތަމަ ހުށަހެޅުއްވި މި ބިލުގައި އޮތީ ރިސޯޓުތަކުން ފަތުރުވެރިއެއްގެ ބޮލަކަށް 500 ޑޮލަރު މާރުކުރެވޭ ގޮތަށް އޮތް އިޚުތިޔާރު އުވައިލައި އެ ރިސޯޓެއްގެ އާމްދަނީގެ 20 އިންސައްތަ މާރުކުރުން ލާޒިމުކުރުމެވެ.
ކޮމެޓީން ފާސްކޮށް ތަޅުމަށް ފޮނުވުމަށް ފަހު އިތުރު އިސްލާހުތައް ގެނައުމަށް ޓަކައި އިއްޔެގެ ޖަލްސާގައި ބިލު ވަނީ އަނބުރާ ކޮމެޓީއަށް ފޮނުވައިފައެވެ.
ކަޅު ބާޒާރުގައި ޑޮލަރު ވިއްކާ އަގު ޕްރޮމޯޓް ކުރާ ނަމަ ޖޫރިމަނާ ކުރާ އިސްލާހެއް ހުށަހަޅާފައި ވާއިރު ދާދިފަހުން އިކޮނޮމިކް މިނިސްޓަރު މުޙައްމަދު ސަޢީދު ވަނީ ކަޅު ބާޒާރުގައި ޑޮލަރުގެ އަގު ކޮންމެ ދުވަހަކު އުފުލެނީ ބައެއް ނޫސްތަކުން ޖަހާ ސުރުޚީތަކުގެ ސަބަބުން ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
