ޣައްޒާ ޤަތުލްޢައްމުގައި ކުޑަކުދިންނަށް ލިބެމުންދާ އަނިޔާގެ ރަމްޒެއްގެ ގޮތުގައި ދުނިޔެ ދެކެމުން އައި ފަސް އަހަރުގެ ހިންދު ރަޖަބު ޝަހީދުކޮށްލި ހާދިސާއަށް ދެ އަހަރަށް ވުރެ ގިނަ ދުވަސް ވީފަހުން އިސްތިއުމާރީ އިސްރާއީލުގެ އަސްކަރިއްޔާއިން އެ ކުއްޖާ ޝަހީދު ކޮށްލި ކަމަށް އެއްބަސްވެއްޖެއެވެ. އަދި އެކަމާ ގުޅޭ ތަހުގީގެއް ކުރާ ކަމަށް ނިރުބަވެރިން ބުނެފައިވެއެވެ. 

އިސްރާއީލުގެ އަސްކަރިއްޔާއިން ބުދަ ދުވަހު ނެރުނު ބަޔާނެއްގައި ބުނީ ހޯދުންތައް މުރާޖަޢާ ކުރުމަށް ފަހު ފަލަސްޠީނު ރެޑް ކްރެސެންޓުގެ އެމްބިއުލެންސް ދަތުރުގެ ކޯޑިނޭޝަނުގައި ހެދިފައިވާ ކަމަށް ބެލެވޭ ގޯސްތަކާ ގުޅިގެން ޖިނާއީ ތަޙުޤީޤެއް ފެށުމަށް ނިންމީ ކަމަށެވެ. މީގެ ކުރިން އިސްރާއީލުން ހިންދު ޝަހީދުކޮށްލި ސަރަޙައްދުގައި އެ އެ ޖަމާއަތުގެ ސިފައިން ތިބި ކަމަށް ވެސް އިންކާރު ކުރިއެވެ.

ނޫސްވެރިންގެ ތަޙުޤީޤުތަކާ ގުޅިގެން ފަހުން އެމީހުންގެ އަސްކަރިއްޔާއިން ބުނީ އެ ދުވަހު ޣައްޒާ ސިޓީގައި "ޓެރަރ ޓާގެޓް" ތަކަށް ރެއިޑް ކުރި ކަމަށެވެ.

ހިންދުގެ ޢާއިލާ ގަދަކަމުން ޣައްޒާ ސިޓީން ބޭރުކުރުމަށް ފަހު 2024 ވަނަ އަހަރުގެ ޖެނުއަރީ 29 ވަނަ ދުވަހުގެ ރޭގަނޑު 7:30 ހާއިރު ހިންދު ޢާއިލާ މެންބަރުން ޝަހީދު ކޮށްލީ ކާރެއްގައި ތިއްބައެވެ. އިސްރާއީލުގެ އެންގުމަށް ސަރަޙައްދު ދޫކޮށް ދިޔުމުގެ މަގުމަތީގައި ހިންދުގެ ބޮޑުބޭބެ ދުއްވި ކަޅު ކާރަށް 300 އަށް ވުރެ ގިނަ ވަޒަން ޖެހިއެވެ. ކާރުގައި އިން 15 އަހަރުގެ ލަޔާން ވެސް ފަލަސްޠީނު ރެޑް ކްރެސެންޓް ޖަމިއްޔާ (ޕީއާރުސީއެސް) ގެ މުވައްޒަފުންނާ ފޯނުން ވާހަކަ ދައްކަމުން ދަނިކޮށް ޝަހީދުކޮށްލެވުނެވެ.

ހިންދު ރަޖަބް އާއު އާއިލާ މީހުން ތިބި ކާރު

ޕީއާރުސީއެސް ގެ ޕެރެމެޑިކުން ހިންދު ސަލާމަތް ކުރުމަށް އެމްބިއުލެންސެއް ފޮނުވި ނަމަވެސް އިސްރާއީލުގެ ފައުޖުތަކުން އެ ޓީމަށް ހުރަސް އެޅިއެވެ. ބުދަ ދުވަހު އެ ޖަމާއަތުގެ އަސްކަރިއްޔާއިން ބުނީ ސިފައިންނާ ދިމާއަށް ދުއްވާފައި އައި އުޅަނދަކަށް ހަމަލާ ދިން ކަމަށެވެ. ކާރަށް ބަޑިޖެހި ކަމަށް އިސްރާއީލުން އެއްބަސްވި މިއީ ފުރަތަމަ ފަހަރެވެ.

ހިންދު ރަޖަބު ފައުންޑޭޝަނުގެ ރައީސް ދިޔާބް އަބޫ ޖަހްޖަހް އެ ތަޙުޤީޤުން ޢަދުލު އިންސާފު ލިބޭނެ ކަމަށް އިތުބާރު ނުކުރާ ކަމަށް ބުންޏެވެ.

"އިސްރާއީލުގެ ޢަދުލުގެ ނިޒާމަށް އަހަރެމެން އިތުބާރެއް ނުކުރަން. މި ވަކި މައްސަލައިގައި ވެސް އިސްރާއީލުގެ ޢަދުލުގެ ނިޒާމު މުޅިންހެން ވަނީ އިސްރާއީލުގެ ޖަރީމާތަކުގައި ބައިވެރިވެފައި" އޭނާ އަލް ޖަޒީރާއަށް ދިން އިންޓަވިޔުއެއްގައި ބުންޏެވެ.

ހިންދުގެ މާމަ ބުނީ މި ތަޙުޤީޤު އެކަށީގެންވާ ވަރާ ގާތަށް ވެސް ނުފޯރާނެ ކަމަށެވެ.

"ޙަޤީޤަތް ހާމަކޮށް ޒިންމާ ވާ ފަރާތްތައް ޖަވާބުދާރީ ކުރުވުމަށް ބައިނަލްއަޤުވާމީ ތަޙުޤީޤެއް ބޭނުންވޭ. އަހަރެމެން ޢަދުލު އިންސާފަށް ގޮވައިލަނީ ހަމައެކަނި ހިންދަކަށް ނޫން. ޣައްޒާގެ ހުރިހާ ކުޑަކުދިންނަށް" އޭނާ ބުންޏެވެ.

ޖިނާއީ ތަޙުޤީޤު ހިންގުމަށް ނިންމި އިޢުލާނުގައި 2025 ވަނަ އަހަރުގެ މާރިޗު މަހު 15 ފަލަސްޠީނު ޞިއްޙީ މަސައްކަތްތެރިއަކު ޝަހީދުކޮށްލި ހާދިސާ ވެސް ބަލާނެ ކަމަށް ބުންޏެވެ.