ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ވެރިރަށް އިސްލާމްއާބާދުގެ ޝިފާ އިންޓަނޭޝަނަލް ހޮސްޕިޓަލުގައި ބޭސްފަރުވާގެ ޗެކަޕެއް ހެދުމަށްފަހު މިއަދު އަނބުރައި ޖަލަށް ގެންގޮސްފިއެވެ.

ޢުމުރުން 73 އަހަރުގެ އިމްރާން ޚާން ހުކުރު ދުވަހުގެ ހެނދުނުގެ ވަގުތެއްގައި ރާވަލްޕިންޑީގެ އަޑިއާލާ ޖަލުން ވަރުގަދަ ސެކިއުރިޓީގައި ހޮސްޕިޓަލަށް ގެންދިޔައީ ސުޕްރީމް ކޯޓުން އަންގާރަ ދުވަހު ނެރުނު އަމުރެއްގެ ދަށުންނެވެ. އެ އަމުރުގައި ވަނީ، އިމްރާން ހޮސްޕިޓަލަށް ބަދަލުކޮށް މިނިވަން މެޑިކަލް ބޯޑަކުން ހާލު ބެލުމަށެވެ. އަދި އޭނާގެ އަމިއްލަ ޑޮކްޓަރު ހިމެނުމަށް އޮތީ އަންގައިފައެވެ. ހޮސްޕިޓަލުގައި މަދު ގަޑިއިރެއް ހޭދަކުރެއްވުމަށްފަހު އޭނާ ވަނީ ޖަލަށް ގެންގޮސްފައެވެ.

ހިތުގެ ޑޮކްޓަރަކާއި ލޮލުގެ ޑޮކްޓަރެއް އަދި އެހެން ބޭސްވެރިޔަކު ހިމެނޭ ޚާއްޞަ ޓީމަކުން ޗެކަޕް ހެދުމަށްފަހު "ޞިއްޙީ ގޮތުން ރަނގަޅު" ކަމަށް ނިންމާފައިވާ ކަމަށް ޕާކިސްތާނުގެ މަޢުލޫމާތާ ބެހޭ ވަޒީރު ތަރާރު ބުންޏެވެ. ޗެކަޕް ހެދި ވަގުތު އިމްރާން ޚާންގެ ދައްތާ ޢުޒުމާ ޚާން ހާޒިރުވެ ހުންނެވި ކަމަށް ވެސް ތަރާރު ބުންޏެވެ.

ސުޕްރީމް ކޯޓުގެ މި ނިންމުން ނިންމީ ޖަލުގެ ސްޕްރިންޓެންޑެންޓް ހޯމަ ދުވަހު ކޯޓަށް ހުށަހެޅި ރިޕޯޓަކާ ގުޅިގެންނެވެ. އެ ރިޕޯޓުގައި އޮގަސްޓް 10 ގައި ކާޑިއެކް ބޯޑަކުން ހެދި ޗެކަޕެއްގައި ލޭގެ ޕްރެޝަރު މައްޗަށް ދިޔުމާއި ޢާއިލާއާ ބައްދަލު ކުރެވުން މަދުވުމާ ގުޅިގެން ހާސްކަން އިޙުސާސް ކުރެވޭ ކަމަށް ބަޔާންކޮށްފައިވެއެވެ. ފާއިތުވި އަހަރެއްހައި ދުވަހު ޚާންގެ ކަނާތު ލޮލުގެ ފެނުމާ މެދު ވެސް ކަންބޮޑުވުން ފާޅުކޮށްފައިވެއެވެ.

ސަރުކާރުން އެ އަމުރާ ދެކޮޅު ހެދި ނަމަވެސް ބުރާސްފަތި ދުވަހު ބަދަލުކުރުމުގެ ތައްޔާރީތައް ފުރިހަމަކުރެވުނެވެ. ހޮސްޕިޓަލް ސަރަޙައްދުގައި އެތައް ސަތޭކަ ފުލުހުންނާއި ޕެރެމިލިޓަރީ ސިފައިން ރުކުރުވާލީ ސެކިއުރިޓީ ވަރުގަދަކުރުމުގެ ގޮތުންނެވެ.

ފެބްރުއަރީ މަހުން ފެށިގެން ދެ ފަހަރެއްގެ މަތިން އިމްރާން ޚާން ހޮސްޕިޓަލަށް ބަދަލުކޮށްދިނުމަށް ހުށަހެޅި ނަމަވެސް ކޯޓުތަކުން ވަނީ އެ އެދުން ބޭރުކޮށްލައިފައެވެ. އެއް ފަހަރެއްގައި އިސްލާމްއާބާދު ހައި ކޯޓުން ނިންމީ ހޮސްޕިޓަލަށް ބަދަލުކުރުމުގެ ބަދަލުގައި މެޑިކަލް ބޯޑަކުން ހާލު ދެނެގަތުމަށެވެ.

އިމްރާން ޚާން 2022 ވަނަ އަހަރުގެ އެޕްރީލް މަހު މަޖިލީހުން ވޯޓެއް ނަގައިގެން މަގާމުން ވަކިކުރެވުނެވެ. ބޮޑުވަޒީރުކަމުގައި ހުންނެވިއިރު ލިބިވަޑައިގެންނެވި ދައުލަތުގެ ހަދިޔާތައް ވިއްކެވި ކަމުގެ ކުށުގައި 2023 ވަނަ އަހަރުގެ އޮގަސްޓް މަހުން ފެށިގެން ޖަލުގައި ހުންނެވި އިރު ކުރީގެ ކްރިކެޓް ތަރީގެ މައްޗަށާއި އޭނާގެ އަނބިކަނބަލުން ބުޝްރާ ބީބީގެ މައްޗަށް އިތުރު އެތައް މައްސަލައެއްގައި ކުށް ސާބިތުވެފައިވެއެވެ. ޚާންގެ ޕާކިސްތާން ތެހެރީކޭ އިންސާފް (ޕީޓީއައި) ޕާޓީން ބުނެފައި ވަނީ މި ދައުވާތަކަކީ ސިޔާސީ ބޭނުމެއްގައި ކުރާ ދައުވާތަކެއް ކަމަށެވެ.