މާތް ނަބިއްޔާ މުޙައްމަދު ﷺ ދެކެ ލޯބިވުމުގެ އެންމެ މުހިންމު ޢަލާމާތަކީ އެކަލޭގެފާނުގެ ސީރަތުން ނަމޫނާ ލިބިގަނެ އެކަލޭގެފާނުގެ މަތިވެރި ސުންނަތަށް ފުރިހަމައަށް ތަބާވުންކަމަށް މިއަދުގެ ހުކުރު ޚުތުބާގައި ބުނެފިއެވެ.

ޚުތުބާގައި ފާހަގަކޮށްފައިވާ ގޮތުގައި މާތް الله ގެ ޙަޟުރަތުގައި ޤަބޫލުވެގެންވާ ހަމައެކަނި ދީނަކީ އިސްލާމްދީނެވެ. ނަބީކަމާއި ރަސޫލުކަމާއިގެން މުޙައްމަދު ﷺ ފޮނުއްވުމުގެ ކުރީގައި ދުނިޔެ އޮތީ ނުހަނު އަނދިރި ޒަމާނެއްގައި ކަމަށާއި މަދު ބައަކު ފިޔަވައި ބުދަށާއި ގަސްގަހާގެއްސަށާއި އަލިފާނަށާއި ހިލައަށް މީސްތަކުން އަޅުކަންކުރި ކަމަށް ޚުތުބާގައި ބަޔާންކޮށްފައިވެއެވެ.

އެ ދުވަސްވަރު ވިޔަފާރި މުދަލެކޭ އެއްފަދައިން ބާޒާރުގައި އިންސާނުން ގަނެވިއްކުމާއި އަންހެން ދަރީން ދިރިތިއްބައި ވަޅުލުމާއި ރާބުއިމާއި ޖުވާކުޅުން ފަދަ މުންކަރާތްތައް ފެތުރިފައި އޮތް ކަމަށް ޚުތުބާގައި ފާހަގަކޮށްފައިވެއެވެ. މި ފަދަ ދަށު ދަރަޖައަކަށް އިންސާނިއްޔަތު ވެއްޓިފައި ވަނިކޮށް މުޅި އިންސާނިއްޔަތު ސަލާމަތްކުރެއްވުމަށް ޓަކައި މާތް الله ފޮނުއްވި ރަސޫލުބޭކަލަކީ މުޙައްމަދު ﷺ ކަމަށް ޚުތުބާގައި ބުނެފައިވެއެވެ.

އެކަލޭގެފާނަށް އީމާންވުމުގެ މާނަ ތަފްސީލުކޮށްދެމުން ޚުތުބާގައި ބުނެފައިވާ ގޮތުން އީމާންކަން ފުރިހަމަވާނީ އެ މީހެއްގެ އަމިއްލަ ނަފުސާއި މުދަލާއި އަނބިދަރީންނަށް ވުރެ ބޮޑަށް އެކަލޭގެފާނު ދެކެ ލޯބިވެ އެކަލޭގެފާނުގެ ސުންނަތަށް ނަޞްރު ދީގެންނެވެ. އެކަލޭގެފާނަށް ނަފުރަތުކުރުމާއި ކުޑައިމީސް ބަސް ބުނެ ފުރައްސާރަކުރުމަކީ އީމާންކަމުގެ ދާއިރާއިން ބޭރުވާނެ ކަންކަން ކަމަށް ޚުތުބާގައި އިންޒާރު ދީފައިވެއެވެ.

ނަބީބޭކަލުންނާއި ރަސޫލުބޭކަލުންނަށް ފުރައްސާރަކުރުމަކީ އިއްޔެއަކު އަދަކު ކުރިމަތިވެގެން އުޅޭ ކަމެއް ނޫން ކަމަށާއި ނަމަވެސް މާތް الله އެ ފަދަ ފުރައްސާރަވެރީން ނިކަމެތިކުރައްވައި އެކަލާނގެ ނަބިއްޔާއަށް ނަޞްރު ދެއްވި ކަން ޚުތުބާގައި ހަނދާންކޮށްދީފައިވެއެވެ.

މާތް ނަބިއްޔާ ﷺ ދެކެ ލޯބިވާ މީހާ ޢިބާދާތާއި މުޢާމަލާތާއި އަޚުލާޤިއްޔާތުގައި ވެސް އެކަލޭގެފާނު ނަމޫނާއެއް ކަމުގައި ބަލަންޖެހޭ ކަމަށް ޚުތުބާގައި ބާރު އަޅައިފައިވެއެވެ. ތެދުބަސް ބުނުމާއި ކެތްތެރިވުމާއި ޢަދުލުވެރިވުމާއި އެއްބަޔަކު އަނެއް ބަޔަކަށް އިޙުތިރާމުކުރުމާއި މަޑުމޮޅިވުން ފަދަ ސިފަތަކުން ޒީނަތްތެރިވުމަށް ޚުތުބާގައި ގޮވައިލައިފައިވެއެވެ.

އެކަލޭގެފާނަށް ކިޔަމަންގަތުމާ ގުޅޭ ގޮތުން ޚުތުބާގައި ގެނެސްފައިވާ ޙަދީޘެއްގެ މާނައިގައިވެއެވެ: "ތިމަންކަލޭގެފާނުގެ އުންމަތުގެ އެންމެން ސުވަރުގެއަށް ވަންނާނެއެވެ. ދެކޮޅުހަދައިފި މީހާ މެނުވީއެވެ." އެ ހިނދު އަޞްޙާބުބޭކަލުން ދެކޮޅުހަދާނީ ކާކުތޯ ދެންނެވުމުން ޙަދީޘްކުރެއްވީ: "ތިމަންކަލޭގެފާނަށް ކިޔަމަންގެންފި މީހާ ސުވަރުގެއަށް ވަދެއްޖެއެވެ. އަދި ތިމަންކަލޭގެފާނަށް އުރެދިއްޖެ މީހާ ދެކޮޅުހަދައިފިއެވެ."

ޚުތުބާ ނިންމައިލީ މާތް الله އަށް ތަޤުވާވެރިވެ ބިރުވެތިވުމަށާއި ކީރިތި ރަސޫލާ ﷺ އިސްލާމީ އުންމަތަށް ދޫކުރެއްވި ތަރިކަ ކަމުގައިވާ ކީރިތި ޤުރްއާނާއި ސުންނަތުގައި ވަރުގަދައަށް ހިފެހެއްޓުމަށް ގޮވައިލަމުންނެވެ.