ރަށު ކައުންސިލްތަކާއި ސިޓީ ކައުންސިލްތަކުގެ އިހުތިސޯސްގެ ދަށުގައި ހުރި ބިންތައް ސަރުކާރާ ހަވާލުކުރުމަށް އެއްބަސްނުވެ އެ ބިންތައް ދިގު މުއްދަތަކަށް އިންވެސްޓަރުންނަށް ދޫކޮށްލުމަށް ކުރީގެ ރައީސް އަބްދުالله ޔާމީން ގޮވައިލައްވައިފިއެވެ.
ކައުންސިލް ތަކުގެ ބިންތަކާއި ފަޅުތައް، ސަރުކާރުގެ ބޭނުމަށް ނެގޭގޮތަށް ލާމަރުކަޒީ ގާނޫނު އިސްލާހު ކުރަން މަޖިލީހުގެ އަމިއްލަ މެންބަރަކު ވަނީ ބިލެއް ހުށަހަޅުއްވާފައެވެ.
ތިނަދޫ ދެވަނަ ފަހަރަށް އާބާދުވީތާ 60 އަހަރު ފުރުން ފާހަގަކުރުމުގެ ގޮތުން ރޭ ބޭއްވި އެ ޖަލްސާގައި އެކަމަށް އަލިއަޅުވާލައްވައި ވާހަކަދައްކަވަމުން ޔާމީން ވިދާޅުވީ ލާމަރުކަޒީ ޤާނޫނަށް ހުށަހެޅި އިސްލާހު މެދުވެރިކޮށް ސަރުކާރުން ކުރަމުންދާ ކަމަކީ ރައްޔިތުންގެ ބިން ފޭރުމެއް ކަމަށެވެ. އެ ކަމާ ދެކޮޅަށް ކައުންސިލްތަކުން ބަޔާންތައް ނެރެ އިހުތިޖާޖު ކުރުމަށް ހިތްވަރު ދެއްވައި އެއީ ޤައުމީ ފެންވަރުގެ ޖިހާދެއްގެ ގޮތުގައި ސިފަކުރެއްވިއެވެ.
"މި ރަށްރަށުން ތިބޭފުޅުންގެ އިހުތިސޯސްގެ ތެރެއިން ތިބޭފުޅުންގެ ބިން އަތުލާފައި ސަރުކާރުން ބޭނުން ކަމަކަށް ބިން އަތުލަން މި އުޅެނީ ކޮން ކަމެއްގައިކަން ވެސް ނޭނގެ. ނަގަނީ ކޮން ބޭނުމެއްގައިކަން ނޭނގެ. ބިން ނަގަންޏާ އެއީ މައްސަލައެއް" އެ މަނިކުފާނު ވިދާޅުވިއެވެ.
ބިން ސަރުކާރަށް ނެގުމާ ދެކޮޅު ހެއްދެވުމުގެ އިތުރުން ރަށްރަށުގައި ނުލިބި ހުރި ޚިދުމަތްތައް ޤާއިމުކުރުމަށްޓަކައި ބޭރުގެ ފަރާތްތައް ވެސް ހިމެނޭހެން އިންވެސްޓަރުންނަށް ބިން ހުޅުވައިލުމަށް ޔާމީން ބާރުއެޅުއްވިއެވެ.
"އެ މީހުން މި ރަށުގައި ކުއަލިޓީ އެޑިއުކޭޝަން ދޭ ކޮލެޖެއް އެޅުމަށް ފަހު ރާއްޖެ ދޫކޮށް ދާއިރު ލަޖެގަށް އެ ތަން ލައިގެނެއް ނުދެވޭނެ. އެ ތަން ހުންނާނެ ދިގު މުއްދަތަކަށް ފަހު މި ރަށުގެ ރައްޔިތުންނަށް މި ރަށުގެ ތަރިކައެއްގެ ގޮތުގައި. އެމީހުން ގެނެސްގެން، އެމީހުންގެ ފައިސާ ބެނުންކޮށްގެމް އަދި އެމީހުންގެ ރިސޯސް ބޭނުންކޮށްގެން މި ތަނުގައި އިންވެސްޓްމަންޓް ހަދާ ނަމަ ދީލަތި ވާށޭ. ބިން ދިނުމުގައި، ބިމުގެ މުއްދަތުގައި، ބިމުގެ ޓެނެންސީ ރައިޓް ދިނުމުގައި ދީލަތިވާށޭ. އެމީހުން މަސައްކަތް ފެށުމަށްފަހު އިތުރު ހުރަސް ކުރިމަތި ނުކުރުވާށޭ" އެ މަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
