ރައީސުލްޖުމްހޫރިއްޔާގެ އޮފީހުން ނީލަމުގައި ވިއްކާލި ކަމަށް ބުނެ ސޯޝަލް މީޑިއާގައްޔާއި ބައެއް މީޑިއާތަކުގައި ދައުރުވަމުންދާ ފޮޓޯގައިވާ މޭޒަކީ، ދިވެހިރާއްޖޭގެ އެއްވެސް ރައީސަކު އެއްވެސް ދުވަސްވަރެއްގައި ބޭނުންފުޅުކުރައްވާފައިވާ ރަސްމީ މޭޒުކޮޅެއް ނޫން ކަމަށް ރައީސް އޮފީހުން ހާމަކޮށްފިއެވެ.

ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް ނެރުއްވި ނޫސް ބަޔާނެއްގައި ވިދާޅުވެފައިވަނީ، މީޑިއާގައި ދައުރުވަމުންދާ ފޮޓޯގައިވާ މޭޒު އެ އޮފީހުން ނީލަމަށް ލާފައިވަނީ ކަތުރުފަނި އެޅުމުގެ ސަބަބުން ބޭނުން ނުކުރެވޭ ވަރަށް ހަލާކުވެ، ބަލަހައްޓަން ދަތިވުމާ ގުޅިގެން ކަމަށެވެ. އަދި އެ މޭޒު ނީލަމަށް ލާފައިވަނީ ދައުލަތުގެ މިފަދަ މުދާ ނީލަމަށް ލުމަށް ހަމަޖެހިފައިވާ އުޞޫލުތަކާއި އިޖުރާއަތުތަކާ އެއްގޮތްވާ ގޮތުގެ މަތިން ކަމަށްވެސް އެ ބަޔާނުގައި ފާހަގަކުރައްވާފައިވެއެވެ.

ތަރުޖަމާނު އިތުރަށް ވިދާޅުވީ، ރައީސް އޮފީހުން ނީލަމަށްލާ ކޮންމެ ފަރުނީޗަރެއްވެސް ނީލަމަށްލަނީ ދައުލަތުގެ ނިޝާން ހަރުކޮށްފައިވާނަމަ، އެ ނިޝާން ނައްޓައިލުމަށްފަހުގައި ކަމަށެވެ. ނަމަވެސް، ޚަބަރުތަކާއި ފޮޓޯތަކުން ފެންނަ މޭޒަށް ކޮންމެވެސް ފަރާތަކުން ބަދަލުތަކެއް ގެނެސް، އެއީ ކުރީގެ ރައީސުން ބޭނުންކުރެއްވި ރަސްމީ މޭޒުކޮޅެއްގެ ގޮތުގައި ދައްކަން މީޑިއާ މެދުވެރިކޮށް މަސައްކަތް ކޮށްފައިވާ ކަމަށް ބަޔާނުގައި ވެއެވެ.

މިކަމާ ގުޅިގެން ރައީސް އޮފީހުން ވަނީ، މިފަދަ ޚަބަރުތައް މީޑިއާގައި ޝާއިޢުކުރުމުގެ ކުރިން ސީދާ ކަމާބެހޭ ރަސްމީ އިދާރާއަކުން އެކަމުގެ ޞައްޙަ މަޢުލޫމާތު ހޯދުމަށް އިލްތިމާސްކޮށްފައެވެ. އަދި ރަސްމީގޮތުން ކަށަވަރުކުރުމެއް ނެތި، ޙަޤީޤަތާ ޚިލާފަށް އަދި ރައްޔިތުންނަށް އޮޅުންއަރާ ގޮތަށް މިފަދަ މަޢުލޫމާތު ޢާއްމުނުކުރުމަށްވެސް ވަނީ އެދިފައެވެ.