ދިވެހީންގެ ދީނީ ހޭލުންތެރިކަމަށް އެންމެ ފުޅާ ދާއިރާއެއްގައި މަސައްކަތް ކުރާ "މަންފާ" އިން ބާއްވާ ފުރަތަމަ ޤުރުއާން ކޭމްޕްގެ އޮފިޝަލް މީޑިއާ ޕާޓްނަރަކަށް ވޮއިސް ހަމަޖައްސައިފި އެވެ.

އެކަމުގެ އެއްބަސްވުމުގައި ސޮއިކުރުމަށް މިއަދު ވޮއިސް އޮފީހުގައި ވަނީ ރަސްމިއްޔާތެއް ބާއްވާފަ އެވެ. ވޮއިސްގެ ފަރާތުން ސޮއިކުރެއްވީ ވޮއިސްގެ ޗީފް އެޑިޓަރު ޝަފްރާޒް އަހްމަދު އެވެ. މަންފާގެ ފަރާތުން ސޮއިކުރެއްވީ މަންފާގެ ރައީސް އަލީ ރަމީޒެވެ.

"މަންފާ ޤުރުއާން ކޭމްޕް" އަކީ ކޮންމެ އަހަރަކު ރަށެއްގައި ސިލްސިލާކޮށް ކުރިއަށް ގެންދަން ނިންމާފައިވާ ކޭމްޕެކެވެ. ފުރަތަމަ ކޭމްޕް ބޭއްވުމަށް ހަމަޖެހިފައިވަނީ މަހިބަދޫގައި އޮގަސްޓް 26 އިން 28 އަށެވެ. އެހެން ކަމުން ކޭމްޕްގެ މުހިންމު ހަބަރުތަކާއި ހަރަކާތްތަކުގެ މައުލޫމާތާއި ފޮޓޯއާ ވީޑިއޯތައް ވޮއިސްއިން ގެނެސްދޭނެ އެވެ.

މި ފަހަރުގެ ކޭމްޕްގައި ރާއްޖޭގެ އެންމެ މަޝްހޫރު ޤާރީން ބައިވެރިވާނެ އެވެ. އޭގެ ތެރޭގައި;

* އަލްޤާރީ މުހައްމަދު ތައުފީޤް ޢަލީ

* އަލްޤާރީ އިބްރާހިމް ޝިފާއު

* އަލްޤާރީ އަހްމަދު ތައުފީޤް

* އަލްޤާރީ އަބްދުލް ވާހިދު

* އަލްޤާރީ އިބްރާހިމް ރަމްޒީ

* އަލްޤާރީ އަހްމަދު ލާޝީން

* އަލްޤާރީ މުހައްމަދު ޝިނާން މުނީރު

* އަލްޤާރީ މުޙައްމަދު ވަހީދު

* އަލްޤާރީ އަހްމަދު ރިޔާޒް 

* އަލްޤާރީ މުހައްމަދު ނަޢީމް އަހްމަދު ފިކުރީ

* އަލްޤާރީ އާދަމް ނަސީރު އަލީ

މަންފާ ޤުރުއާން ކޭމްޕްގައި ބައިވެރިވާ ޤާރީން --

މި ކޭމްޕާއި ގުޅޭގޮތުން ވޮއިސްއާ ވާހަކަ ދައްކަވަމުން ކޭމްޕް ކުރިއަށް ގެންދިއުމުގައި އިސްކޮށް ހުންނެވި މަންފާ އެކަޑަމީގެ ނާއިބު ރައީސް އަލްޤާރީ މުހައްމަދު ތައުފީޤް ވިދާޅުވީ މިއީ ވަރަށް ތަފާތު ކޭމްޕެއް ކަމަށާ ތަފާތު އެތައް ހަރަކާތެއް މި ކޭމްޕްގެ ތެރެއިން ކުރިއަށް ގެންދިއުމަށް ހަމަޖެހިފައިވާ ކަމަށެވެ.

ޤާރީ ތައުފީޤު ވިދާޅުވީ "މަންފާ ޤުރުއާން ކޭމްޕް" ގައި ޤުރުއާން މުބާރާތްތަކެއް ކުރިއަށް ގެންދަން ނިންމާފައިވާ ކަމަށެވެ. އެގޮތުން ތިން މުބާރާތެއް ކުރިއަށް ގެންދާނެ އެވެ.

އެއް މުބާރާތަކީ މުޅި އދ އަތޮޅަށް ހުޅުވާލައިގެން ބާއްވާ މުބާރާތެކެވެ. މުބާރާތް ކުރިއަށް ގެންދާނީ ފަސް އުމުރުފުރައަކަށް ބަހާލައިގެންނެވެ. މުބާރާތުގައި ބައިވެރިވުމުގެ ފުރުސަތު މިހާރުވެސް ވަނީ ހުޅުވާލާފަ އެވެ. އެކަމަށް ޚާއްސަ އެޕްލިކޭޝަން މެދުވެރިކޮށް މުބާރާތަށް ކިޔެވުން ފޮނުވޭނެ އެވެ.

މުބާރާތަށް ފޮނުވާ ކިޔެވުންތަކަށް ފަނޑިޔާރުން އިންސާފު ކުރުމަށް ފަހު ފައިނަލް ރައުންޑަށް 30 ބައިވެރީން ހޮވާނެ އެވެ. ފައިނަލް ބުރުގެ ކިޔެވުންތައް އޮންނާނީ މަހިބަދޫގަ އެވެ.

މީގެ އިތުރުން އުމުރުން 30 އަހަރުން މަތީގެ މީހުންނަށް ޚާއްސަކޮށްގެން ވެސް ޤުރުއާން މުބާރާތެއް އޮންނާނެ އެވެ. މިއީ މަހިބަދޫގެ ރައްޔިތުންނަށް ޚާއްސަ މުބާރާތެކެވެ. އަދި އުމުރުން ހަ އަހަރުން ދަށުގެ ކުދީންނަށް ޚާއްސަ މުބާރާތެއް ވެސް ބާއްވަން ވަނީ ނިންމާފަ އެވެ.

ތަޢުފީޤު ވިދާޅުވި ގޮތުގައި މި މުބާރާތުގައި ބަލާނީ އެންމެ ރަނގަޅަށް އަކުރުކިޔޭ ކުދީންނާއި ކަނޑައެޅިފައިވާ ވަގުތުގައި އެންމެ ގިނަ ކަލިމަ ކިޔާ ދަރިވަރުންނެވެ. 

ތިން މުބާރާތަށްވެސް އިނާމް ހުށައަޅާފައިވާކަން ތަޢުފީޤު ފާހަގަ ކުރެއްވި އެވެ. އެގޮތުން:

* މުޅި މުބާރާތުން އެއްވަނަ - 25,000 ރުފިޔާ

* މުޅި މުބާރާތުން ދެވަނަ - 15,000 ރުފިޔާ

* މުޅި މުބާރާތުން ތިންވަނަ - 10,000 ރުފިޔާ

މަންފާ އިން ވަނީ "މަންފާ ޤުރުއާން ކޭމްޕް" ގައި ބައިވެރިވުމުގެ ފުރުސަތު އދ އަތޮޅުގެ ހުރިހާ ރައްޔިތުންނަށް އޮތްކަން ފާހަގަކޮށް ހަރަކާތްތަކުގައި ބައިވެރިވުމަށް ދައުވަތު ދީފަ އެވެ.

އެ ޖަމިއްޔާއިން ބުނީ "މަންފާ ޤުރުއާން ކޭމްޕް" ގެ ހަރަކާތްތަކުގައި ބައިވެރިވާ އެންމެންގެ މެދުގައި ހާއްސަ ގުރުއަތުލުމެއް ކުރިއަށް ގެންދަން ނިންމާފައިވާ ކަމަށެވެ. އަދި ގުރުއަތުން ހޮވޭ ފަރާތަކަށް ޢުމްރާ ދަތުރެއް ދިނުމަށް ނިންމާފައިވާ ކަމަށެވެ.

މިއީ ރާއްޖޭގައި ޤުރުއާނަށް ޚާއްސަކޮށް މިފަދަ ހަރަކާތެއް މިހާ ފުޅާކޮށް ބާއްވާ ފުރަތަމަ ފަހަރެވެ.