ތަރައްޤީވަމުން އަންނަ ކުދި ޖަޒީރާ ޤައުމުތައް (ސިޑްސް) ގެ އިޤުތިޞާދުތައް މޫސުމީ ނާޒުކުކަމުގެ ލޯގަނޑުން ބެލުމުގެ ބަދަލުގައި އީޖާދާއި ވިޔަފާރީގެ ފުރުޞަތުތަކެއްގެ ގޮތުގައި ދެކުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.

އެމަނިކުފާނު މި ވާހަކަފުޅު ދެއްކެވީ އޮގަސްޓު 23 އިން 25 އަށް ރާއްޖޭގައި ކުރިއަށްގެންދާ ސިޑްސް ގްލޯބަލް ބިޒްނަސް ނެޓްވަރކް (ޖީބީއެން) ފޯރަމް ހުޅުއްވައިދެއްވަމުންނެވެ. އެ ރަސްމިއްޔާތުގައި ރައީސް ފާހަގަކުރެއްވި ގޮތުގައި ވެށީގެ ނާޒުކުކަމަކީ ކުދި ޖަޒީރާ ޤައުމުތަކުގެ ވާހަކައިގެ އެންމެ ބާބެކެވެ. ބާކީ ބައިގައި އޮތީ ގޮންޖެހުންތައް އުފެއްދުންތެރިކަމަށް ބަދަލުކޮށް ހުރަސްތައް އީޖާދީ ޚިޔާލުތަކަށް ފުރޮޅައިލައި ޖަޒީރާތަކުގެ ދެމެދުގައިވާ ދުރުމިން ގާތްކަމަށް ބަދަލުކުރާ ހިންމަތްތެރިކަމުގެ ވާހަކަ ކަމަށް އެމަނިކުފާނު ވިދާޅުވިއެވެ.

ޕްރައިވެޓް ސެކްޓަރުގެ ދައުރަށް އަލިއަޅުއްވާ ލައްވައި ވާހަކަދައްކަވަމުން ރައީސް ވިދާޅުވީ ކުދި ޖަޒީރާ ޤައުމުތަކުގެ ހިންމަތްތެރިކަން އެންމެ ބޮޑަށް ފެންނަނީ އެ ދާއިރާއިން ކަމަށެވެ. ޚާއްޞަކޮށް ކުދި އަދި މެދު ފަންތީގެ ވިޔަފާރިތައް (އެމްއެސްއެމްއީ) ވެފައިވަނީ ސަރުކާރުތަކުން ޙައްލު ހޯދަން ދަތިވާ ކަންކަމަށް ޢަމަލީ ޙައްލު ހޯދައިދޭ އިންޖީނުތަކަކަށް ކަމުގައި ވިދާޅުވިއެވެ. ހަމައެހެންމެ ކުދި ޖަޒީރާ ޤައުމުތަކުގެ ކުޑަކަމުންވެސް ފައިދާ ނެގިދާނެ ކަމަށާއި އެ ޤައުމުތައް ފަންނިއްޔާތާއި އީޖާދު ތަޙުލީލުކުރާ ލެބޯޓަރީތަކަކަށް ހެދިދާނެ ކަމަށް ރައީސް ވިދާޅުވިއެވެ.

ސުމޭކު ގުޅުންތައް މިހާރު ހަމައެކަނި މުވާސަލާތުގެ ވަސީލަތެއް ނޫން ކަމަށާއި ވިޔަފާރިއާއި މާލީ ޚިދުމަތާއި ފަތުރުވެރިކަމާއި އުފެއްދުންތެރިކަމުގެ ސިނާޢަތަށް ބާރުދޭ އިޤުތިޞާދީ ބިނާރަކަށް އެ ގުޅުންތައް ވެފައިވާ ކަމަށް އެމަނިކުފާނު ވިދާޅުވިއެވެ. މޯލްޑިވްސް 2.0 ގެ އެޖެންޑާ މެދުވެރިކޮށް ޤައުމުގެ ޖޯގުރަފީ ގޮންޖެހުންތައް ނައްތައިލުމަށް ސުމޭކު ފަންނިއްޔާތު ރާއްޖޭގައި ބޭނުންކުރަމުންދާކަންވެސް ރައީސް ފާހަގަކުރެއްވިއެވެ. މީގެ އިތުރުން ޒުވާން ވިޔަފާރިވެރިންނާއި ސްޓާޓް-އަޕްތަކަށް ޚާއްޞަކޮށް އަންހެނުން އިސްވެ ކުރާ ވިޔަފާރިތަކަށް މާލީ އެހީ ފޯރުކޮށްދެމުންދާ ކަމަށާއި ޒަމާނާ އެއްގޮތަށް އިޞްލާޙުކޮށްފައިވާ ފޮރިން އިންވެސްޓްމަންޓް ޤާނޫނާއި 2027 ގައި ޤާއިމުކުރުމަށް ހަމަޖެހިފައިވާ ޓްރޭޑް އެކްސެލެރޭޝަން ޒޯނާ ބެހޭ ގޮތުންވެސް ރައީސް ވާހަކަފުޅު ދެއްކެވިއެވެ.

ރައީސްގެ ވާހަކަފުޅު ނިންމަވައިލެއްވީ ކުދި ޖަޒީރާ ޤައުމުތަކުގެ އުންމީދީ ޚިޔާލުތައް ވިޔަފާރިއާއި މާލީ އެހީއާއި ބާޒާރުތަކާ ގުޅުވައިދޭ މަރުކަޒީ މަންސައެއްގެ ގޮތުގައި ޖީބީއެން ތަރައްޤީކުރުމަށް އދ. ގެ ޔޫއެން-އޯއެޗްއާރުއެލްއެލްއެސް އަށް ގޮވާލައްވަމުންނެވެ. މި ފޯރަމްގައި ސިޑްސް ތަމްސީލުކުރައްވާ ވަޒީރުންނާއި ސަރުކާރުތަކުގެ އިސް އޮފިޝަލުންނާއި ޑިޕްލޮމެޓުންގެ އިތުރުން ރާއްޖޭގެ ވަޒީރުންގެ މަޖިލީހުގެ މެންބަރުން ބައިވެރިވެވަޑައިގެންނެވިއެވެ.