ދިވެހި އިނގިރޭސި ބަސްފޮތް ލިޔުއްވައި އެކުލަވާލަމުން ގެންދިޔައިރު ފޮތާ ގުޅޭގޮތުން ޑރ.ހަސަން ހަމީދާ ވާހަކަދައްކާލުމުގެ ފުރުސަތު 2023 ވަނަ އަހަރު އަޅުގަނޑަށް ލިބުނެވެ. މިހާބޮޑު އަދި ކަވި މަސައްކަތެއް ކުރަން ހިތުލި ސަބަބާއި އަދި އޭރު މި މަސައްކަތް ގޮސްފައިވާ ހިސާބާ ގުޅޭގޮތުންނެވެ. އޭރު ބަސްފޮތް ތައްޔާރުކުރުމުގެ މަސައްކަތް އޮތީ މެދަކާ ހަމައަށްގޮސް، މުޅި މަސައްކަތުގެ ދެބައިކުޅަ އެއްބައި ނިމިފައެވެ.

މިފަދަ މުހިންމުކަންބޮޑު މަސައްކަތެއް ކުރައްވަން ނިންމެވި މައިގަނޑު ސަބަބު އެދުވަހު ޑރ. ހަސަން ވިދާޅުވިއެވެ. ދިވެހިރާއްޖޭގެ ތަޢުލީމީ ނިޒާމުންނާއި ދައުލަތުގެ މުއައްސަސާތަކުން ދިވެހިބަހަށްދޭ ބޭއަހްމިއްޔަތުކަމުން، ދިވެހިބަސް ކުރިއެރުވުމަށް ބަޔަކު ހިތްވަރާއެކު ނުނިކުމެއްޖެނަމަ، ދިވެހިބަސް، އަދި ދިވެހި ޤައުމިއްޔަތު ނެތިގެން ހިނގައިދާނެތީއެވެ.

މަސައްކަތުގެ ބާވަތުގެ ގޮތުން މިއީ ވަރަށް ކަވި އަދި ގިނަވަގުތުތަކެއް އެކަމަށް ދޭންޖެހޭ ކަމެކެވެ. ފޮތުގެ މުސައްނިފުގެ ވާހަކައިން އިނގުނީ އެކަނި މީހަކު މިކަމަށް ހުސްވެގެން ދުވާލަކު 8 ގަޑިއިރު މަސައްކަތް ކޮށްފިނަމަ، މައިގަނޑު އަކުރެއް ނިންމާލުމަށް ދެމަހެއްހާ ދުވަސް ނަގާނޭކަމެވެ. އެހެންކަމުން ހަމައެކަނި މިކަމަށް އެކަނި ބަލާލިނަމަވެސް މިކަމުގެ ބުރަކަން ވަޒަން ކުރެވެއެވެ. އެހެނީ ޑރ.ހަސަން ފާހަގަކުރެއްވި ބީދައިން ދުވާލަކު 8 ގަޑި އިރު ވަންދެން ޓައިޕްކުރާނަމަ، އިނގިލިތަކަށް ގެއްލުން ލިބޭނެއެވެ. އެހެންކަމުން އެއީވެސް ސަމާލުކަންދޭންޖެހޭ ވަރަށް މުހިންމު ކަމެކެވެ.

މީގެ އިތުރުން މިފަދަ މަސައްކަތެއް ކުރާ މީހަކީ އިލްމީ އަދި ފަންނީ ގޮތުންވެސް ނުހަނު ގާބިލް މީހަކަށް ވާން ޖެހެއެވެ. ޓައިޕްކުރުމުގެ އިތުރުން މިކަން ކުރާމީހަކު އެތައް އެތައް ކަމަކަށް ވިސްނަންޖެހެއެވެ. އެގޮތުން ދިވެހިބަސް ރަނގަޅަށް އެނގުމާއި އިނގިރޭސިބަހަށް ފާގަތިވާން ޖެހެއެވެ. ގިނަ ބަޔަކު އިއްތިފާގުވާ ގޮތުގައި މިފަދަ މަސައްކަތެއް އެންމެ ރަނގަޅަށް ތަރުތީބުން ކުރެވޭނެ އެއް ބޭފުޅަކީވެސް ޑރ.ހަސަން ހަމީދެވެ. 

ދިވެހި ބަސްފޮތް ވުޖޫދަށް ގެނައުމަށް ޑރ.ހަސަން ވަނީ ވަރަށް ބުރަ މަސައްކަތްތަކެއް ކުަރައްވާފައެވެ. މިކަން މުޅިން ނިންމާލުމަށް ޑރ.ހަސަން ވަނީ އެތައް އަހަރެއް ހޭދަކުރައްވާފައެވެ. އެހެންކަމުން މިކަމުންވެސް މި މަސައްކަތުގެ ކަވިކަމާއި ބުރަކަން ކިތަންމެ ރަނގަޅަކަށްވެސް އެނގެއެވެ. ވަޒަން ކުރެވެއެވެ.

ޑރ.ހަސަން ހަމީދުގެ އިނގިރޭސި ދިވެހި ބަސްފޮތުގައި ހިމެނޭ "އެލް" އަކުރުގެ ބައެއް...

އިނގިރޭސި ދިވެހި ބަސްފޮތް އެކުލަވާލާފައިވަނީ، ދިވެހި ބަސްފޮތުގައިވާ ހުރިހާ ލަފްޒެއް އިނގިރޭސި ލަފުޒުތަކާ ގުޅޭ ތަނުގައި ލިޔެ، އިހުގެ ބޯދާ އަދި ނާދިރު ދިވެހި ލަފުޒު ތައްވެސް ހިމަނައިގެންނެވެ. މިފޮތް ރަސްމީކޮށް ނެރެފައިމިވަނީ ޑރ.ހަސަން މީގެ ކުރިން ވިދާޅުވިފަދައިން މުޅިން ނިންމައިގެންނެވެ.

" އަޅުގަނޑުގެ ގަސްދުކުރަނީ އިނގިރޭސި ދިވެހި ބަސްފޮތް އިންޓަރނެޓް މެދުވެރިކޮށް މީހުންނަށް ފެންނާނެ ގޮތް ހެދުން. ނަމަވެސް، ބަސް ދަސްކުރުމަށް އެންމެ މުހިއްމީ، ކަރުދާހުގައި ޗާޕުކޮށްފައި ހުންނަ ގަނޑު. ދެމެހެއްޓެވި އެއްޗެއްގެ ގޮތުގައި، ކުރިއަށް އޮތް ޖީލްތަކަށް ފޮތް އޮންނާނީ ޗާޕުކުރުމުން ކަމަށްވާތީ" ޑރ.ހަސަން ހަމީދު ވިދާޅުވިއެވެ.

ދިވެހި އިނގިރޭސި ބަސްފޮތް މިއަދު ރަސްމީކޮށް ތައާރަފްކޮށް ނެރެދެއްވީ ޤައުމީ ޔުނިވަރސިޓީގެ މަރުކަޒީ އިދާރާގެ އޮޑިޓޯރިއަމްގައި ބޭއްވި ހާއްސަ ޖަލްސާއެއްގައި ކުރީގެ ރައީސް އަލްއުސްތާޛް މައުމޫން އަބްދުލް ޤައްޔޫމެވެ. މިފޮތް ނެރޭ ދުވަހު ވިއްކުމަށް ކަނޑައެޅި އަގަކީ 1،500 ރުފިޔާއެވެ. މި ފޮތުގައި 2.1 ކިލޯ ހުންނައިރު މިއީ ރާއްޖޭގައި މިހާތަނަށް ނެރުނު އެންމެ ބޮޑު ފޮތެވެ.