މާލޭ އިއްޒުއްދީން ފާލަމާ ދިމާ ބޭރުން ލޯންޗަކާއި ދޯންޏެއް ޖެހި ހިނގި ނުރައްކާތެރި އެކްސިޑެންޓަށްފަހު މަޑުނުކޮށް ފިލި ދޯނި ހޯދައި، އެ ދޯނީގެ ކެޕްޓަންގެ ލައިސަންސް ހިފަހައްޓައިފިއެވެ.
2026 ޖުލައި 9 ވަނަ ދުވަހުގެ ރޭ އިއްޒުއްދީން ފާލަމާ ދިމާ ބޭރުން "ލީޖަން 1" ނަމަކަށް ކިޔާ ލޯންޗަކާއި ދޯންޏެއް ޖެހި އެކްސިޑެންޓެއް ހިނގާފައިވާއިރު މި ހާދިސާއަށްފަހު އެ ދޯނި މަޑުނުކޮށް ފިލައިގެން ވަނީ ގޮސްފައެވެ.
އެހެންކަމުން، އެ އުޅަނދު ދެނެގަނެ ހޯދުމުގެ މަސައްކަތް ފުލުހުންގެ ތަހުގީގުގެ ތެރެއިން ކުރިއަށް ގެންގޮސްފައިވާ ކަމަށް ފުލުހުން މިއަދު ބުންޏެވެ
ފުލުހުން ކުރި މަސައްކަތުން، އެ ދޯނި ފެނިފައިވަނީ 2026 އޯގަސްޓް 22 ވަނަ ދުވަހުގެ ހަވީރު 17:52 އެހައިކަންހާއިރު ހުޅުމާލެ ފަޅުގައި އަޅާފައި އޮއްވައި ކަމަށް ފުލުހުން ބުނެއެވެ.
ފުލުހުން ބުނިގޮތިގައި މި އުޅަނދު ފެނުމާ ގުޅިގެން ފުލުހުން ވަނީ އެ ދޯނި ބަލައި ފާސްކޮށް، މައްސަލައިގެ ތަހުގީގަށް ބޭނުންވާ މުހިންމު މައުލޫމާތުތައް އެއްކޮށްފައެވެ.
އަދި ކަށަވަރުކުރަންޖެހޭ ކަންކަން ކަށަވަރުކުރުމަށްފަހު، އެކްސިޑެންޓް ހިނގި ވަގުތު ދޯނި ދުއްވަން ހުރި ކެޕްޓަނާ ސުވާލުކޮށް، ތަހުގީގީ މަރުހަލާގެ ތެރެއިން އޭނާގެ ލައިސަންސް މިހާރު ވަނީ ހިފަހައްޓާފައެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
