ދެކުނު ޗައިނާ ކަނޑުގައި މިލްކުވެރިކަމާމެދު ދެބަސްވުން އުފެދިފައިވާ ސަރަޙައްދެއް ކަމަށްވާ ޕެރަސެލް ޖަޒީރާތަކުގެ އެންޓިލޯޕް ފަރުގައި ޗައިނާއިން ބިންހިއްކައިގެން ތަރައްޤީކުރާ ރަށުގެ ފުރަތަމަ ފިޔަވަހީގެ މަސައްކަތް ނިންމާލައިފިކަން ސެޓެލައިޓް މަންޒަރުތަކުން ދައްކާކަމަށް ރޮއިޓަރސް އިން ރިޕޯޓްކޮށްފިއެވެ.

ރޮއިޓަރސްއިން ބުނާ ގޮތުގައި، މިއީ ޗައިނާއިން އެ ސަރަހައްދުގައި ބިނާކުރާ އެންމެ ބޮޑު އަސްކަރީ މަރުކަޒަށް ވެގެންދާނެކަމަށް މާހިރުން ލަފާކުރެއެވެ. ޖުލައި މަހު ނަގާފައިވާ ސެޓެލައިޓް މަންޒަރުތަކުން ފެންނަ ގޮތުގައި، ގާތްގަނޑަކަށް 6 ކިލޯމީޓަރުގެ ދިގުމިން ހުރި މި ރަށުގައި، 3 ކިލޯމީޓަރަށް ވުރެ ދިގު ރަންވޭއެއް ހެދުމުގެ މަސައްކަތް މިހާރު ވަނީ ފަށާފައެވެ. އޭގެ އިތުރުން 680 މީޓަރުގެ ފާލަމަކާއި، ބޮޑެތި ބޯޓުފަހަރަށް ގާތްކުރެވޭ ފުން ބަނދަރެއްގެ އިތުރުން ހެލިކޮޕްޓަރު ޖައްސާނެ ހެލިޕޭޑެއް ވެސް އެތަނުގައި ވަނީ ހަދާފައެވެ.

ޗައިނާގެ ދައުލަތުގެ މީޑިއާއިން ބުނެފައިވަނީ މިއީ މޫސުމާބެހޭ މަޢުލޫމާތު ހޯދުމަށާއި ސައިންޓިފިކް ދިރާސާތައް ކުރުން ފަދަ މަދަނީ ބޭނުންތަކަށް ބޭނުންކުރުމަށް ހަދާ ތަނެއް ކަމަށެވެ. ނަމަވެސް ސަލާމަތީ ކަންކަމާބެހޭ މާހިރުން ބުނާ ގޮތުގައި މިއީ ޓައިވާނާ ދެމެދު ހަމަނުޖެހުމެއް އުފެދިއްޖެ ހާލަތެއްގައި ބޭނުންކުރުމަށާއި، ދެކުނު ޗައިނާ ކަނޑުގެ އުތުރު ސަރަޙައްދުގައި ޗައިނާގެ އަސްކަރީ ބާރު ގަދަކުރުމަށް ހަދާފައިވާ މަރުކަޒެކެވެ. މިގޮތުން ޗައިނާގެ ސްޓްރެޓީޖިކް ބޮންއަޅާ ބޯޓުތައް ފަދަ ހަތިޔާރުތައް މިތަނުގައި ބެހެއްޓުމުގެ ފުރުސަތު ބޮޑުކަމަށް ރިޕޯޓުތައް ބުނެއެވެ.

މި އައު ރަށް ހަދާފައިވާ ސަރަހައްދަކީ ޓައިވާނާއި ވިއެޓްނާމް ފަދަ ޤައުމުތަކުން ވެސް އެގައުމުތަކުގެ ސަރަހައްދެއް ކަމަށް ދަޢުވާކުރާ ތަނެކެވެ. ޗައިނާއިން ޕެރަސެލް އައިލެންޑްސް އެއްކޮށް ކޮންޓްރޯލް ކުރަމުން ދަނީ 1974 ވަނަ އަހަރު ދެކުނު ވިއެޓްނާމުގެ ސިފައިން އެތަނުން ބޭރުކޮށްލުމަށް ފަހުގައެވެ.