ދިވެހިރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ރިސޯޓުތަކަށް ލިބޭ އާމްދަނީގެ 40 އިންސައްތަ ޑޮލަރު، ރާއްޖޭގެ ބޭންކުތައް މެދުވެރިކޮށް ދިވެހި ރުފިޔާއަށް މާރުކުރަން ލާޒިމްވާ ގޮތަށް ޤާނޫނަށް އިސްލާޙު ގެނެސް ރައްޔިތުންގެ މަޖިލީހުން މިއަދު ފާސްކޮށްފިއެވެ.

ސަރުކާރުގެ ފަރާތުން ހޮޅުދޫ ދާއިރާގެ މެންބަރު އަބްއްސައްތާރު މުހައްމަދު ބޭރު ފައިސާ އާ ބެހޭ ބިލަށް ހުށަހެޅުއްވި އިސްލާހް ކޮމެޓީން ފާސްކުރުމަށް ފަހު ތަޅުމަށް ފޮނުވާފައި ވަނިކޮށް ބިލަށް އިތުރު އިސްލާހުތަކެއް ގެނައުމަށް އަލުން ކޮމެޓީ އަށް ވަނީ ފޮނުއްވާފައެވެ. 

މަޖިލީހުގެ މިއަދުގެ ޖަލްސާގައި ބޭރު ފައިސާއާ ބެހޭ ގާނޫނުގެ ކޮމިޓީ ރިޕޯޓަށް މި އިސްލާހް ހުށަހެޅުއްވީ ފުނަދޫ ދާއިރާގެ ޕީއެންސީ މެންބަރު މުޙައްމަދު މަމްދޫޙް ޔޫނުސްއެވެ.

މި ބިލު ފާސްކުރީ ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 47 މެންބަރުންގެ އަޣުލަބިއްޔަތުންނެވެ. އަދި މި އިސްލާޙާ ދެކޮޅަށް ވޯޓު ދެއްވީ 11 މެންބަރުންނެވެ.

މަމްދޫހު ހުށަހެޅުއްވި އިސްލާހް ތަކުގައި ވަނީ؛ 

1) ޓޫރިސްޓު ހޮޓާ އަދި ގެސްޓުހައުސް ފަދަ ތަންތަނަށް އަންނަ ކޮމެން ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭ ބޭރު ފައިސާގެ އާމްދަނީގެ %20 މާރުކުރަން

2) ޓޫރިސްޓު ހިދުމަތްދޭ ތަންތަނާއި މާލީ އިދާރާތަކުގެ އިތުރުން ބޭރު ފައިސާ އިން އާމްދަނީ ލިބޭ މީހުންގެ ތެރެއިން15 މިލިއަން ޑޮލަރަށް ނިސްބަތްވާ އަދަދެއް ލިބޭ މީހުންގެ އާމްދަނީގެ %40 ވެސް މާރު ކުރަން

3) ނަމަވެސް އެފަދަ ތަންތަނަކީ %100 ދިވެހިން ހިއްސާވާތަނެއް ނަމަ މާރުކުރަން ޖެހޭނީ މަހެއްގެ ތެރޭ ބޭރު ފައިސާ އިން ލިބޭ އާމްދަނީގެ %7

މި އިސްލާޙު ހުށަހަޅުއްވާނެކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަޙުމަދު މުނައްވަރު ވަނީ އެންމެފަހުން ބޭއްވި ނޫސްވެރިންގެ ބައްދަލުވުމުގައި އިއުލާންކުރައްވާފައެވެ.

އެގޮތުން ވިދާޅުވީ، ޤާނޫނުގައި ކުރިން 20 އިންސައްތައިގެ ގޮތުގައި ކަނޑައެޅިފައި އޮތް ނިސްބަތް 40 އިންސައްތައަށް މަތިކުރުމަކީ ރާއްޖޭގެ އިޤްތިޞާދަށް މުހިންމު ބަދަލެއް ކަމަށެވެ.

"މިހާރު ގެނެސްފައި އިން އިސްލާހަށް އިތުރު އިސްލާހެއް ގެންނަން މި މަސައްކަތް ކުރަނީ. ކުރީގައި އިން 20 އިންސައްތައިގެ ބަދަލުގައި 40 އިންސައްތައަށް އިތުރުކުރަން. އޭރުން އަޅުގަނޑުމެންނަށް މި ޓީޓީއަށް ދެވޭވަރު އިތުރުކުރެވޭނީ،" ގަވަރުނަރު މުނައްވަރު ވިދާޅުވިއެވެ.