ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ހުސްވެފައިވާ މެންބަރުކަމުގެ މަގާމަށް ޝަންމޫން ހަމީދު އައްޔަންކުރުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

އެޗްއާރުސީއެމަށް މެންބަރަކު އައްޔަންކުރަން ނިންމީ އެ ކޮމިޝަނުގެ މެންބަރު ސަމާއު އަހުމަދު ނަޖީބުގެ ދައުރު ހަމަވާތީއެވެ. އެ މަގާމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުއްވީ ޝަންމޫން ހަމީދު އަދި ސަމާއު އަހުމަދު ނަޖީބުގެ ނަންފުޅެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ޝަންމޫން އެ މަގާމަށް އައްޔަންކުރަން ފާސްކުރީ ވޯޓުގައި ބައިވެރިވެވަޑައިގެންނެވި 57 މެންބަރުންގެ އިއްތިފާގުންނެވެ.

މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން އެ ދެ ބޭފުޅުންނާ އިންޓަވިއު ކުރުމަށްފަހު އެކުލަވާލި ރިޕޯޓް މަޖިލީހުގެ ތަޅުމަށް ހުށަހެޅިއިރު، އެންމެ މަތީ މާކްސް ލިބިވަޑައިގެންފައިވަނީ ޝަންމޫނަށެވެ. އެގޮތުން ޝަންމޫނަށް 92 މާކްސް ލިބިވަޑައިގެންނެވި އިރު، ސަމާއުއަށް ލިބިވަޑައިގެންނެވީ 86 މާކްސެވެ.

މިއަދުގެ ޖަލްސާގައި މި މައްސަލައަށް ބަހުސްކުރައްވަމުން އިދިކޮޅު މެންބަރުން ވަނީ ކަންބޮޑުވުން ފާޅުކުރައްވާފައެވެ. އިދިކޮޅު މެންބަރުން ވިދާޅުވީ، ދެ ބޭފުޅުންގެ ތައުލީމީ ދާއިރާއަށް ބެލުމެއްނެތި، ރައީސް ފޮނުއްވި ލިސްޓުގެ ކުރީގައި އޮތް ނަން ފާސްކުރަން ވެރިކަން ކުރާ ޕީއެންސީގެ މެންބަރުން މަސައްކަތް ކުރެއްވީ ވަކި ކޮޅަކަށް ބުރަވެ ތިބެގެން ކަމަށެވެ. ނަމަވެސް ޕީއެންސީގެ ފަރާތުން ޕީޖީ ލީޑަރު ފަލާހް ވަނީ ކޮމިޓީ މަރުހަލާގައި އެކަންތައް ދިޔަގޮތް ސާފްކޮށްދެއްވާފައެވެ.