އެމްއެމްއޭއިން ކަނޑައަޅާ ރޭޓަށްވުރެ މަތިން ބޭރު ފައިސާ ވިއްކުމާއި ކަޅުބާޒާރުގައި ބޭރު ފައިސާ ވިއްކާ އަގު އިސްތިހާރުކުރުން ޖިނާއީ ކުށެއްގެ ގޮތުގައި ކަނޑައެޅުމަށް ބޭރު ފައިސާއާ ބެހޭ ޤާނޫނަށް ގެނައި އިސްލާހުތައް ރައްޔިތުންގެ މަޖިލީހުން މިއަދު ފާސްކޮށްފިއެވެ.

ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 47 މެންބަރުން ބިލާ އެއްކޮޅަށް ވޯޓު ދެއްވިއިރު 12 މެންބަރަކު ބިލާ ދެކޮޅަށް ވޯޓު ދެއްވައިފައިވެއެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދެވެ. ކޮމިޓީ މަރުހަލާގައި ބިލަށް މުހިންމު ބަދަލުތަކެއް ގެނެސްފައިވެއެވެ.

މި ޤާނޫނީ ބަދަލުގެ ދަށުން އެމްއެމްއޭ އިން ކަނޑައެޅި ރޭޓު ނުވަތަ ބޭންޑު ފަހަނައަޅައި އަގެއްގައި ބޭރު ފައިސާ ވިއްކާ ފަރާތެއް ނުވަތަ ވިއްކުމަށް މަސައްކަތްކުރާ ފަރާތެއް 25000 ރުފިޔާ އާއި އެއް މިލިޔަން ރުފިޔާއާ ދެމެދުގެ ޢަދަދަކުން ޖޫރިމަނާ ކުރެވޭނެއެވެ.

ހަމައެހެންމެ ޑިޖިޓަލް ވަސީލަތެއް ނުވަތަ އެ ނޫން ގޮތަކުން ވިޔަސް އެ ރޭޓުތައް ޕްރޮމޯޓުކުރާ ފަރާތެއް 25000 ރުފިޔާ އާއި 500000 ރުފިޔާއާ ދެމެދުން ޖޫރިމަނާ ކުރެވޭ ގޮތަށް ވަނީ ހަމަޖައްސައިފައެވެ. ޤާނޫނީ ޝަޚުޞެއް މި ކުށުގައި ބައިވެރިވެއްޖެ ނަމަ ޖޫރިމަނާ 100000 ރުފިޔާ އާއި ފަސް މިލިޔަން ރުފިޔާއާ ހަމައަށް އެރުމުގެ ފުރުޞަތު އެ ބިލުގައި ހުޅުވައިލައިފައިވެއެވެ.

އިސްލާހުގައި އިތުރަށް ބަޔާންކޮށްފައިވާ ގޮތުން ފާއިތުވި އެއް އަހަރު ދުވަހުގެ ތެރޭގައި 25 މިލިޔަން ޑޮލަރު ނުވަތަ އެއަށްވުރެ މައްޗަށް ބޭރު ފައިސާ ލިބޭ ފަރާތްތަކުން އެ ފައިސާ އެމްއެމްއޭ ލައިސަންސް ދީފައިވާ ބޭންކެއް މެދުވެރިކޮށް ޖަމާކުރުން ލާޒިމުކޮށްފައިވެއެވެ.

މީގެ އިތުރުން ކެޓަގަރީ އޭ ގެ ފަތުރުވެރިކަމުގެ ތަންތަނުން ކޮންމެ މަހަކު ލިބޭ ބޭރު ފައިސާގެ ޖުމްލަ އާމްދަނީގެ 40 އިންސައްތަ ދިވެހި ރުފިޔާއަށް ބަދަލުކުރަން ޖެހޭ ގޮތަށް ވެސް ކަނޑައަޅައިފައިވެއެވެ.