މާލެ އާއި ހުޅުމާލެ އަދި ހުޅުލެ ގުޅުވައިދޭ ޗައިނާ-މޯލްޑިވްސް ފްރެންޑްޝިޕް ބްރިޖް (ސިނަމާލެ ބްރިޖް) އަކީ ހަމައެކަނި އުމްރާނީ ބިނާއެއް ނޫން ކަމަށާއި، އެއީ ދެ ޤައުމުގެ ދެމެދުގައިވާ އިތުބާރާއި އެކުވެރިކަމުގެ ތެރެއިން ހާސިލުކުރެވޭނެ ކަންކަމުގެ ދެމިއޮންނާނެ ރަމްޒެއް ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވިދާޅުވެއްޖެއެވެ.
ސިނަމާލެ ބްރިޖަށް 8 އަހަރު ފުރުމާ ގުޅިގެން ރައީސް ޑރ މުހައްމަދު މުޢިއްޒު އެކްސްގައި ކުރެއްވި ޕޯސްޓް ރީޕޯސްޓް ކުރައްވައި ޗައިނާގެ ސަފީރު ކޮންގް ޝިއަންހުއާ ވިދާޅުވީ، ސިނަމާލެ ބްރިޖަކީ ޗައިނާގެ "ބެލްޓް އެންޑް ރޯޑް އިނިޝިއޭޓިވް" ގެ ދަށުން ކުރިއަށްގެންދިޔަ މުހިންމު ފްލެގްޝިޕް މަޝްރޫޢެއް ކަމަށެވެ. އަދި މި ބްރިޖަކީ ދެ ޤައުމުގެ ދެމެދުގައި އޮތް ބަދަހި އެކުވެރިކަމާއި ތަރައްޤީއަށް ކުރާ އުންމީދުތަކުގެ ވަރުގަދަ ހެއްކެއްގެ ގޮތުގައި ސަފީރު ސިފަކުރެއްވިއެވެ.
ސަފީރުގެ ޕޯސްޓުގައި ފާހަގަކުރައްވާފައިވާ ގޮތުގައި، ވޭތުވެދިޔަ އަހަރުތަކުގައި ޗައިނާ އާއި ރާއްޖެއިން ވަނީ އެއް ޤައުމު އަނެއް ޤައުމަށް އިޙްތިރާމްކޮށް، ދަތި އުނދަގޫ ދަނޑިވަޅުތަކުގައި ވެސް އެއްބާރުލުން ދީފައެވެ. އަދި މިއީ ޤައުމުގެ ކުޑަބޮޑުމިނަށް ބެލުމެއްނެތި، ހަމަހަމަކަމާއި ދެފަރާތަށް ފައިދާވާނެ ގޮތަށް ގުޅުން ބަދަހިކުރުމުގެ ފުރިހަމަ ނަމޫނާއެއް ކަމަށް ވިދާޅުވިއެވެ.
މީގެއިތުރުން، ދެ ޤައުމުގެ އިސް ވެރިންގެ ޙިކުމަތްތެރި އިރުޝާދުގެ ދަށުން، ބައިނަލްއަޤްވާމީ މަސްރަޙަށް އަންނަ ބަދަލުތަކާއެކު ވެސް ޗައިނާ-ރާއްޖޭގެ ގުޅުން ވަރުގަދަކަން ސާބިތުކޮށްދީ، ހަލުވި ދުވެއްޔެއްގައި ކުރިއަރަމުން އަންނަ ކަމަށް ވެސް ސަފީރު ވިދާޅުވިއެވެ.
ބްރިޖަށް 8 އަހަރު ފުރުން ފާހަގަކުރައްވަމުން ސަފީރު އެދިވަޑައިގަތީ، މި ބްރިޖަކީ ހަމައެކަނި ރަށްތައް ގުޅުވައިދޭ ފާލަމަކަށް ނުވެ، ދެ ޤައުމުގެ ރައްޔިތުންގެ ހިތްތަކާއި، އައު ފުރުޞަތުތަކާއި، މުސްތަޤްބަލް ގުޅުވައިދޭ ވަސީލަތެއްގެ ގޮތުގައި އަބަދުވެސް ދެމިއޮތުމަށެވެ. އަދި ދެ ޤައުމުގެ ގުޅުން އިތުރަށް ބަދަހިކޮށް، އެކުގައި އުޖާލާ މުސްތަޤްބަލެއް ބިނާކުރުމަށް މަސައްކަތް ކުރުމަށް ސަފީރު ވަނީ އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
