އިންޑިއާގެ އުތުރުގައި އޮންނަ އުއްތަރް ޕްރަދޭޝް ސްޓޭޓުގެ ބަޑިބޭސް އުފައްދާ ކާރުޚާނާއެއް ގޮވައި ތިން ބޮޑު މީހަކާއި އަށް ކުޑަކުދިންނާ އެކު ޖުމްލަ 11 މީހަކު މަރުވެއްޖެއެވެ.
މި ހާދިސާގައި މަރުވި ކުދިންގެ ތެރޭގައި އެންމެ ހަތަރު އަހަރުގެ ކުއްޖަކު ވެސް ހިމެނޭ ކަމަށް އެ ސަރަހައްދުގެ ފުލުހުން ބުނެފައިވެއެވެ. ގޮވުމުގެ ސަބަބުން ގިނަ ބަޔަކަށް އެކިވަރުގެ އަނިޔާ ލިބި ޒަޚަމްވި ފަރާތްތައް ހޮސްޕިޓަލުގައި ފަރުވާ ހޯދަމުންދާ ކަމަށް ރިޕޯޓުތައް ބުނެއެވެ.
ސޯޝަލް މީޑިއާގައި ދައުރުވި ވީޑިއޯތަކުން ފެންނަ ގޮތުގައި ގޮވި ހިސާބުގެ ކައިރީގައި ހުރި ގެތައް ވަނީ ބިމާ ހަމަވެފައެވެ. ބައެއް ވީޑިއޯތަކުން ސަލާމަތްވި މީހުންގެ ގައިގައި ކުނިބުނީގެ އަސަރު ފެނެއެވެ. ސަލާމަތީ ޓީމުތަކުން ތާށިވެފައި ތިބި މީހުން ހޯދުމަށް އެކްސްކެވޭޓަރު ފަދަ ވެހިކަލްތައް ބޭނުންކޮށްފައިވާއިރު ޢާންމު ރައްޔިތުން ވެސް ހިލައާއި އެ ނޫން ވެސް ތަކެތި ބޭނުންކޮށްގެން ސަލާމަތްކުރުމުގެ މަސައްކަތުގައި ބައިވެރިވެފައިވެއެވެ.
ގޮވުން ހިނގަން މެދުވެރިވި ސީދާ ސަބަބު އަދި ހޯދިފައެއް ނުވެއެވެ. އުއްތަރް ޕްރަދޭޝްގެ ޗީފް މިނިސްޓަރު ޔޯގީ އާދީއްތިޔާނާތު ސޯޝަލް މީޑިއާގައި ބުނީ ޒަޚަމްވި ފަރާތްތަކަށް އެކަށީގެންވާ ފަރުވާ ކަށަވަރުކުރުމަށާއި އަސަރު ފޯރި ޢާއިލާތަކަށް ވެވެން ހުރި ހުރިހާ އެހީތެރިކަމެއް ފޯރުކޮށްދިނުމަށް ކަމާބެހޭ ފަރާތްތައް ހާދިސާ ހިނގި ތަނަށް ފޮނުވާފައިވާ ކަމަށެވެ.
ބައިނަލްއަޤުވާމީ މަސައްކަތްތެރިންގެ ޖަމިއްޔާ (އައިއެލްއޯ) ބުނާ ގޮތުން އިންޑިއާގެ ބަޑިބޭސް ސިނާޢަތުގައި އެތައް ލައްކަ ބަޔަކު ވަޒީފާ އަދާކުރެއެވެ. މި ދާއިރާގައި ދުނިޔޭގެ ފެންވަރުގައި ވެސް އިންޑިއާ ބޮޑު ދައުރެއް އަދާކުރާ އިރު ގިނަ ކާރުޚާނާތައް ހިންގަނީ ގެދޮރުގެ ތެރޭގައި ރައްކާތެރިކަމުގެ މިންގަނޑުތައް ދަށް ހާލަތެއްގައެވެ. އެފަދަ ތަންތާގައި ކުޑަކުދިން ލައްވައި މަސައްކަތް ކުރުވާ ކަމަށް ވެސް އައިއެލްއޯއިން ފާހަގަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
