މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކުރާ މަނީ އެކްސްޗޭންޖް ވިޔަފާރި ހިންގުމުގެ ލައިސަންސް ނެތި، ފުޅާ ދާއިރާއެއްގައި ގާނޫނާ ޚިލާފަށް ބޭރު ފައިސާ ވިއްކުމުގެ ވިޔަފާރި ކުރަމުންދާ ކަމަށް ތުހުމަތުކުރެވޭ މައްސަލައެއްގައި ނައިޑް އިންވެސްޓްމެންޓް ޕްރައިވެޓް ލިމިޓެޑްގެ ބޭންކު އެކައުންޓްތައް ފްރީޒްކޮށް، އެ ކުންފުނީގެ އޮފީސް ބަލައިފާސްކުރުމުގެ އޮޕަރޭޝަނެއް ކަމާބެހޭ އިދާރާތަކުން ފަށައިފިއެވެ.

ފުލުހުން ބުނިގޮތިގައުލި، ތަހުގީގަށް ބޭނުންވާ އިތުރު ހެއްކާއި ގަރީނާ ހޯދުމަށްޓަކައި، މ. ދަނބުގޯޅީގައި ހުންނަ ނައިޑް އިންވެސްޓްމެންޓުގެ އޮފީސް ބަލައިފާސްކުރުމުގެ މަސައްކަތް ފުލުހުންނާއި ކަމާބެހޭ އިދާރާތައް ގުޅިގެން މިހާރު ދަނީ ހިންގަމުންނެވެ.

އަދި މި އޮޕަރޭޝަން ކުރިއަށް ގެންދަނީ އެ ކުންފުނިން ބޭރު ފައިސާގެ މުއާމަލާތްތައް ކުރުމަށް ބޭނުންކުރަމުންދިޔަ ބޭންކު އެކައުންޓްތައް ފްރީޒްކުރުމަށް ފަހުގައި ކަމަށް ފުލުހުން ބުނެއެވެ.

ނައިޑް އިންވެސްޓްމެންޓް ޕްރައިވެޓް ލިމިޓެޑަކީ ރ. އަތޮޅުގައި އޮންނަ ފުރަވެރި މޯލްޑިވްސް ރިސޯޓު ހިންގާ ކުންފުންޏެވެ.

ކަޅު ބާޒާރުގައި ޑޮލަރުގެ އަގު މަތިވަމުންދާ މައްސަލަ ހައްލު ކުރުމަށް ކުރަމުންދާ މަސައްކަތުގެ ތެރެއިން އެފަދަ ތަންތަން ބަލައި، އެތަނުން އެއްތަން މިހާތަނަށް ބަންދު ކުރެވިފައިވާ ކަމަށް އެމްއެމްއޭގެ ގަވަރުނަރު މުނައްވަރު މީގެ ކުރިން ވަނީ ވިދާޅުވެފައެވެ.

އަދި އެފަދަ ފަރާތްތަކާ މެދު ގާނޫނީ ފިޔަވަޅު އެޅުމަށް ދައުލަތުގެ ކަމާގުޅޭ މުއައްސަސާތައް ގުޅިގެން އެކުލަވާލާފައިވާ ހާއްސަ ޓާސްކްފޯސްއިން މަސައްކަތް ފަށާފައިވާއިރު، ގަވާއިދާ ހިލާފަށް ބޭރު ފައިސާ ގަނެ ވިއްކި ހަ ބިދޭސީއަކު ވެސް، އެ ޓާސްކްފޯސްގެ އޮޕަރޭޝަނެއްގައި އިއްޔެ ވަނީ މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފަ އެވެ.