ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި ސްރީލަންކާގެ ސިނެކް ކެމްޕަސް ޕްރައިވެޓް ލިމިޓެޑާ ދެމެދު މެރިޓައިމް ދާއިރާއިން ތަޢުލީމާއި ތަމްރީނު އަދި ދިރާސާތައް ކުރުމަށްޓަކައި އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް އާއި ސިނެކް ކެމްޕަހުގެ އިސްވެރިން ބައިވެރިވެވަޑައިގެންނެވިއެވެ. އޭގެ ތެރޭގައި އެ ކެމްޕަހުގެ ފެކަލްޓީ އޮފް މެރިޓައިމް ސްޓަޑީޒްގެ ޑީން ޑރ. ސުޖާތާ ވަލްޕޯލާ އާއި ކެޕްޓަން މުޙައްމަދު ޒައިދުގެ އިތުރުން ޝަރަފުވެރި މެހެމާނުންނާއި އެމްއެންޔޫގެ އިސްވެރިން ބައިވެރިވެވަޑައިގެންނެވިއެވެ.

އެމްއެންޔޫގެ ނޫސް ބަޔާނުގައި ބުނީ، މި އެއްބަސްވުމުގެ މައިގަނޑު މަޤްޞަދަކީ ދެ މުއައްސަސާ ގުޅިގެން ތަޢުލީމީ އަދި ޕްރޮފެޝަނަލް ދިރާސާތައް ކުރުމާއި، ތަމްރީނު ޕްރޮގްރާމްތައް ހިންގުމާއި، މަޢުލޫމާތާއި ތަޖުރިބާ ޙިއްޞާކުރުން ކަމަށެވެ. އަދި މި ޕާޓްނަރޝިޕްގެ ސަބަބުން މެރިޓައިމް ދާއިރާއިން ދެ ފަރާތުގެ ފަންނީ ޤާބިލުކަން އިތުރުވެގެންދާނެ ކަމަށްވެސް ބަޔާނުގައި ފާހަގަކޮށްފައިވެއެވެ.

މި އެއްބަސްވުމުގައި ސޮއިކޮށްފައިވަނީ އެމްއެންޔޫގެ ސެންޓަރ ފޯ މެރިޓައިމް ސްޓަޑީޒް (ސީއެމްއެސް)، "ފެކަލްޓީ އޮފް މެރިޓައިމް ސްޓަޑީޒް" ގެ ނަމަށް ބަދަލުކޮށް، އެ ދާއިރާ ފުޅާކުރުމަށް ޔުނިވަރސިޓީން ކުރަމުންދާ މަސައްކަތްތަކުގެ ތެރެއިންނެވެ. ފެކަލްޓީއަކަށް ބަދަލުވުމުން، މެރިޓައިމް ދާއިރާއިން މަތީ ތަޢުލީމާއި ޕްރޮފެޝަނަލް ފުރުޞަތުތައް ފަހިކޮށްދިނުމަށް އިތުރު ބާރަކަށް ވެގެންދާނެއެވެ.

މި ރަސްމިއްޔާތުގައި ވާހަކަދައްކަވަމުން ކެޕްޓަން މުޙައްމަދު ޒައިދު ވިދާޅުވީ، ސިނެކް ކެމްޕަހަކީ މެރިޓައިމް ތަޢުލީމާއި ތަމްރީނުގައި 36 އަހަރުގެ ތަޖުރިބާ ލިބިފައިވާ، އަދި ދިވެހި ފަންނުވެރިން ތަމްރީނުކުރުމުގައި ގިނަގުނަ ޚިދުމަތްތަކެއް ކޮށްދީފައިވާ ތަނެއް ކަމަށެވެ. އަދި އެމްއެންޔޫގެ ތަޢުލީމީ ފެންވަރު މަތިކުރުމަށް ސަރަޙައްދީ އަދި ބައިނަލްއަޤްވާމީ ގުޅުންތަކުގެ މުހިންމުކަން އޭނާ ފާހަގަކުރެއްވިއެވެ.

ކެޕްޓަން ޒައިދު އިތުރަށް ފާހަގަކުރެއްވި ގޮތުގައި، ޑިޖިޓަލައިޒޭޝަނާއި، ތިމާވެއްޓާ ރައްޓެހި އައު ތެލުގެ ބާވަތްތަކާއި، ދެމެހެއްޓެނިވި އޮޕަރޭޝަންތަކުގެ އިތުރުން ބައިނަލްއަޤްވާމީ މިންގަނޑުތަކަށް އަންނަ ބަދަލުތަކާއެކު މުޅި މެރިޓައިމް އިންޑަސްޓްރީއަށް ބޮޑެތި ބަދަލުތަކެއް އަންނަމުންދާ މި ދަނޑިވަޅުގައި، މިފަދަ އެއްބަސްވުމެއް ޤާއިމުކުރެވުމަކީ ވަރަށް މުހިންމު ކަމެކެވެ. ޚާއްޞަކޮށް އެސްޓީސީޑަބްލިއު (STCW) ކޮންވެންޝަން މުރާޖަޢާ ކުރެވެމުންދާއިރު، ދާއިރާގެ ތަޢުލީމާއި ތަމްރީނުތައް މި ބަދަލުތަކާ އެއްގޮތަށް ބައްޓަންކުރުމަކީ ކޮންމެހެން ބޭނުންތެރި ކަމެއް ކަމަށް އޭނާ ވިދާޅުވިއެވެ.

މި އެއްބަސްވުމުގެ ދަށުން، 30 އަހަރަށްވުރެ ގިނަ ދުވަހުގެ މެދުކެނޑުމަކަށްފަހު، ރާއްޖޭގައި މަތީ ފެންވަރުގެ މެރިޓައިމް ކޯސްތައް ވަރަށް އަވަހަށް އެމްއެންޔޫގައި ފެށުމަށް ވަނީ ހަމަޖެހިފައެވެ. މި ކޯސްތަކުގެ ސަބަބުން ދިވެހި މެރިޓައިމް ޕްރޮފެޝަނަލުންނަށް ރާއްޖޭގައި ތިބެގެން މަތީ ތަޢުލީމާއި ތަމްރީނު ހޯދުމުގެ ފުރުޞަތު ފަހިވެ، ޤައުމުގެ މި ދާއިރާގެ މަސައްކަތްތެރިންގެ ޤާބިލުކަން އިތުރުވެގެންދާނެއެވެ.

އެމްއެންޔޫގެ ނޫސް ބަޔާނުގައި ބުނީ، މިއީ ސަރަޙައްދީ އަދި ބައިނަލްއަޤްވާމީ ފެންވަރުގައި ސްޓްރެޓީޖިކް ގުޅުންތައް ބަދަހިކޮށް، ދިރާސާތަކާއި ތަޢުލީމީ ފުރުޞަތުތައް ފުޅާކުރުމަށް ޔުނިވަރސިޓީން ކުރަމުންދާ މަސައްކަތްތަކުގެ ހެއްކެއް ކަމަށެވެ. އަދި ސިނެކް ކެމްޕަހާއެކު ވެވުނު މި އެއްބަސްވުމުގެ ސަބަބުން އެމްއެންޔޫގެ ފެކަލްޓީ އޮފް މެރިޓައިމް ސްޓަޑީޒް އިތުރަށް ހަރުދަނާވެ، ރާއްޖޭގެ މެރިޓައިމް ދާއިރާގެ ކުރިއެރުމަށް ބޮޑު އެހީތެރިކަމެއް ލިބިގެންދާނެ ކަމަށްވެސް ވަނީ ބުނެފައެވެ.