އޭއެފްސީ 20 އަހަރުން ދަށުގެ އޭޝިއަން ކަޕް ކޮލިފައިންގައި މިއަދު ސްރީލަންކާ އާ ދެކޮޅަށް ކުޅުނުމެޗް ތަފާތުބޮޑު ނަތީޖާއަކުން ރާއްޖެ ކާމިޔާބުކޮށްފިއެވެ.

މިމެޗް ރާއްޖޭގެ ޒުވާންޓީމް ކާމިޔާބުކުރީ 4-0 ގެ ނަތީޖާއިންނެވެ. މި މޮޅާއެކު، އަންނަ އޭއެފްސީ 20 އަހަރުން ދަށުގެ އޭޝިއަން ކަޕް ކޮލިފިކޭޝަން ބުރުން ރާއްޖެއަށް ވަނީ ފުރުސަތު ކަށަވަރުވެފައެވެ. ރާއްޖޭގެ ޒުވާން ޓީމުން މި މުބާރާތުގައި ދަނީ އާދަޔާ ހިލާފު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް ކުޅުނު ދެ މެޗުންވެސް މޮޅުވެފައިވާއިރު، އެއްވެސް މެޗެއްގައި ރާއްޖޭގެ ބައިކޮޅަށް ލަނޑެއް ވަދެފައި ނުވާކަން ފާހަގަކޮށްލެވެއެވެ.

މުބާރާތުގެ ފުރަތަމަ މެޗުގައި ބުރުނާއީއާ ބައްދަލުކޮށް ރާއްޖެ މޮޅުވީ 2-0 ގެ ނަތީޖާއަކުންނެވެ. އަދި މިއަދު ސްރީލަންކާއާ ދެކޮޅަށް ކުޅުނު މެޗުގައި ރާއްޖޭގެ ކުޅުންތެރިން ވަނީ މުޅި މެޗު ކޮންޓްރޯލްކޮށް، ހަތަރު ލަނޑުގެ ބޮޑު މޮޅެއް ހޯދާފައެވެ. މެޗްގައި ރާއްޖެއަށް ލަނޑުތައް ޖަހައިދިނީ އިލާން އިމްރާން، މުހައްމަދު ޝަމްހާން، އަދި ނައްސާހްއެވެ. މެޗްގައި ނައްސާހް ވަނީ ދެ ލަނޑު ޖަހާފައެވެ.

ކޮލިފައިންގައި ރާއްޖެއަށް ދެން އޮތީ މިޔަންމާއާ ދެކޮޅަށް ކުޅޭ މެޗެވެ.