ކުޑަކުދިންނަށް އަނިޔާވާ މީހުންގެ ތެރޭގައި އެމީހުންނަށް އެންމެ ބޮޑަށް އަޅާލަންޖެހޭ މައިންބަފައިންވެސް ހިމެނޭ ކަމަށާ، އެފަދަ ފަރާތްތަކަށް ހަރުކަށި އަދަބު ދޭންޖެހޭ ކަމަށް މިއަދުގެ ހުކުރު ޚުތުބާގައި ބުނެފިއެވެ.

"ކުޑަކުދީންގެ ޙައްޤުތައް" މި މައުޟޫޢަށް މިއަދު ރާއްޖޭގެ މިސްކިތްތަކުގައި އިއްވި ހުކުރު ޚުތުބާގައި ބަޔާންކުރައްވާފައިވަނީ، ކުޑަކުދީންނަކީ މާތް الله މައިންބަފައިންނާ ޙަވާލުކުރައްވާފައިވާ އަގުހުރި އަމާނާތެއް ކަމަށާއި، ކޮންމެ ހާލަތެއްގައި ވެސް އެ އަމާނާތަށް ރައްކާތެރިވުން މައިންބަފައިންނާއި މުޖުތަމަޢުގެ މައްޗަށް ލާޒިމުވެގެންވާ ކަމަށެވެ.

އެގޮތުން، ކުދިން ތަރުބިއްޔަތު ކުރުމުގައި ޢިލްމާއި އަޚުލާޤުގެ އިތުރުން ރޫޙާނީ ގޮތުން الله އާ އޮންނަ ގުޅުން ވަރުގަދަކުރުމުގެ މުހިންމުކަން ޚުތުބާގައި ފާހަގަކޮށްފައިވެއެވެ. ކީރިތި ރަސޫލާ ﷺ ގެ ޙަދީޘްފުޅާ ޙަވާލާދެއްވައި ޚުތުބާގައި ބުނީ، ދަރީންނަށް ހަތް އަހަރު ފުރުމުން ނަމާދުކުރުމަށް އަމުރުކުރުމަށާއި، ދިހަ އަހަރުވުމުން ނަމާދު ނުކުރާނަމަ އަނިޔާނުވާ ގޮތަށް އަދަބުދީގެން ވެސް ނަމާދަށް އަހުލުވެރިކުރުވަން ޖެހޭނެ ކަމަށެވެ.

މީގެއިތުރުން، ޚުތުބާގައި ބުނީ އަމިއްލަ ނަފުސާއި އަހުލުވެރިން ނަރަކައިން ސަލާމަތްކުރުމަށް އަމުރުކުރައްވާފައިވާއިރު، ކުޑަކުދިންނަކީ އެ އަހުލުވެރިންގެ ތެރޭގައި ހިމެނޭ ބައެއްކަމަށެވެ. ދުނިޔޭގެ މުޢާހަދާތަކުގެ މާ ކުރިން އިސްލާމްދީން ވަނީ ކުޑަކުދިންގެ ޙައްޤުތައް އެންމެ ފުރިހަމައަށް ރައްކާތެރިކޮށްދީފައިކަން ފާހަގަކޮށް، ކުއްޖާއަށް ރިވެތި ނަމެއް ކިޔުމާއި، އިސްލާމީ ޝަޚުޞިއްޔަތު ބިނާކުރުމަކީ އެ ކުދިންގެ ޙައްޤެއް ކަމުގައި ޚުތުބާގައި ބުންޏެވެ

ހަމައެއާއެކު، އަނިޔާވެރިކަމާއި ތަފާތުކުރުންތަކާއި ގަނާކުރުން ފަދަ ކަންކަމުން ކުޑަކުދިން ރައްކާތެރިކުރުމަކީ ކޮންމެހެން ކުރަންޖެހޭ ކަމެއް ކަމަށް ޚުތުބާގައި ބުންޏެވެ.

މާތް ނަބިއްޔާ ﷺ ޙަދީޘްކުރައްވައިފައި ވެއެވެ. (لَيْسَ مِنَّا مَنْ لَمْ يَرْحَمْ صَغِيْرَنَا) މާނައީ: "އަހަރެމެންގެ ތެރެއިން ކުޑަކުދީންނަށް އޯގާތެރިނުވާ މީހާއީ، އަހަރެމެން މުސްލިމުންގެ ތެރެއިންވާ މީހެއް ނޫނެވެ."

ޚުތުބާ ނިންމަވާލަމުން ވަނީ، ކުޑަކުދީންނަށް އިހުމާލުވެ އަނިޔާވެރިވާ އެފަދަ އެންމެހައި ފަރާތްތަކަށް އިސްލާމީ ޝަރީޢަތާއި ރާއްޖޭގެ ޤާނޫނުތަކުގައިވާ އެންމެ ހަރުކަށި އަދަބު ދިނުމަށް ކަމާބެހޭ އެންމެހައި މުއައްސަސާތަކަށް ގޮވާލާފައެވެ.