އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު، އަދާލަތު ޕާޓީ ދޫކުރައްވައި ވެރިކަންކުރާ މައި ޕާޓީ ކަމަށްވާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ސޮއިކުރައްވައިފިއެވެ.

އިލެކްޝަންސް ކޮމިޝަން (އީސީ) ގެ ދަފްތަރުން ދައްކާ ގޮތުގައި ޑރ. ޝަހީމް ޕީއެންސީގެ މެންބަރެއްގެ ގޮތުގައި ރަޖިސްޓްރީވެވަޑައިގެންފައިވަނީ އިއްޔެއެވެ. އޭގެ ކުރިން، 1 މެއި 2025 އިން ފެށިގެން އެމަނިކުފާނު ހުންނެވީ އަދާލަތު ޕާޓީގެ ދަފްތަރުގައެވެ.

އަދާލަތު ޕާޓީއަށް އަލުން ގުޅިވަޑައިގަތުމަށްފަހު، އެ ޕާޓީގެ ރައީސްކަމުގެ މަގާމަށް ވާދަކުރައްވާނެކަން ޑރ. ޝަހީމް ކުރިން ވަނީ ރަސްމީކޮށް އިއުލާނު ކުރައްވާފައެވެ. އެގޮތުން 30 އޭޕްރީލް 2025 ގައި ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވެފައިވަނީ، އަދާލަތު ޕާޓީގެ އިސް މުއައްސިސެއްގެ ހައިސިއްޔަތުން އެ ޕާޓީއަށް ގިނަ ދުވަސްތަކެއް ވަންދެން ޚިދުމަތް ކުރައްވާފައިވާތީ، ޕާޓީގެ ލީޑަޝިޕާ ހަވާލުވުމަށް އެތެރޭގެ އިންތިހާބުގައި ވާދަކުރައްވަން ނިންމަވާފައިވާ ކަމަށެވެ.

އެހެންނަމަވެސް، އަދާލަތު ޕާޓީގެ އެތެރޭގެ އިންތިހާބަށް ކުރިމަތިލުމުގެ މުއްދަތު ހަމަވެގެން ދިޔައިރުވެސް ޑރ. ޝަހީމް އެ މަގާމަށް ކުރިމައްޗެއް ނުލައްވައެވެ. އަދި އޭގެ ފަހަތުގައިވާ ސަބަބެއް މިހާތަނަށްވެސް ސާފުކޮށްދެއްވާފައެއް ނުވެއެވެ.

ޑރ. ޝަހީމަކީ އަދާލަތު ޕާޓީ އުފެއްދުމުގައްޔާއި، އެ ޕާޓީގެ ސިޔާސީ ހަޔާތުގެ އެންމެ ކާމިޔާބު އަދި ރަން ދުވަސްވަރު ޕާޓީ ހިންގެވުމުގައި އެންމެ އިސް ދައުރެއް އަދާކުރެއްވި އެއް ބޭފުޅާއެވެ. ނަމަވެސް، ޕާޓީގެ ކުރީގެ ރައީސް އިމްރާން އަބްދުالله ލީޑަޝިޕާ ހަވާލުވެވަޑައިގަތް ފަހުން ޕާޓީގެ މިސްރާބު ބަދަލުވެ، އާންމުންގެ އިތުބާރު ކުޑަވެގެން ގޮސްފައިވާ ކަމަށް ގިނަ ބަޔަކު ފާހަގަކުރެއެވެ.