އެމްޑީޕީގެ ސަރުކާރުގައި ވިއްކާލާފައިވާ ދިރާގު އަދި އެމްޑަބްލިއުއެސްސީގެ ހިއްސާ އަނބުރާ ހޯދައި، ދިރާގުގައި ސަރުކާރުގެ އޮންނަ ހިއްސާ %51 އަށް ބޮޑު ކުރުމަށް ނިންމައިފިއެވެ.

ވަޒީރުންގެ މަޖިލީހުން މި ނިންމުން ނިންމަވާފައިވާކަން ރައީސް ޑރ. މުހައްމަދު މުއިއްޒު މިއަދު ބޭއްވި ނޫސްވެރިންގެ ބައްދަލުވުމުގައި ވަނީ އިއުލާން ކުރައްވާފައެވެ.

އެގޮތުން ރައީސް ވިދާޅުވީ، ނިމިދިޔަ އެމްޑީޕީ ސަރުކާރުގައި އެމްޑަބްލިޔުއެސްސީގެ ހިއްސާ ބޭރު ކުންފުންޏަކަށް ވިއްކާފައިވާ ކަމަށާ، އެ ހޯދުމުގެ މަސައްކަތް މި ސަރުކާރުން ފަށާފައިވާ ކަމަށެވެ. ރައީސް ވިދާޅުވީ، އެއީ ރައްޔިތުންނަށް ޚިދުމަތްދިނުމަށާއި، އެމްޑަބްލިޔުއެސްސީ އިތުރަށް ހަރުދަނާ ކުރުމަށް ކުރަންޖެހޭ ކަމެއް ކަމަށެވެ. 

މީގެ އިތުރުން ރައީސް ވިދާޅުވީ، ދިރާގުގައި ސަރުކާރުގެ މެޖޯރިޓީ ޝެއާ އޮއްވައި، ކުރީގެ ރައީސް މުޙައްމަދު ނަޝީދުގެ ވެރިކަމުގައި އެ ޝެއާ ބޭރު ބަޔަކަށް ވިއްކާލާފައިވާ ކަމަށެވެ.

ދިރާގުގެ މިހާރު އޮންނަނީ ސަރުކާރުގެ %41.8 އެވެ. ދެން ދިރާގުގައި ދެން ހިއްސާ އޮންނަނީ، ބަހުރައިންގެ، ބިޔޯންގެ %52 ހިއްސާ އާއި އާންމު ރައްޔިތުންގެ %6.2 ހިއްސާއެވެ. 

އަދި އެމްޑަބްލިއުއެސްސީގައި މިހާރު އޮންނަނީ ސަރުކާރުގެ %80 ހިއްސާ އެވެ. ބާކީ %20 ހިއްސާ އޮންނަނީ ޖަޕާންގެ ހިޓާޗީ ކުންފުނީގެއެވެ.