އދ. މަހިބަދޫގައި މިހާރު ކުރިއަށްދާ ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތުގައި ކުޅުނު ފޯރިގަދަ މެޗުތަކަށްފަހު، ހޮސްޕިޓަލް-އޭ އަދި ސްޓެލްކޯ ކޭ-38 އިން ގްރޫޕްގެ އެއްވަނައިގައި ހަމަޖެހިލައިފިއެވެ.

މުބާރާތުގެ 33 ވަނަ މެޗުގައި ބައްދަލުކުރީ ހޮސްޕިޓަލް-އޭ އަދި އެލް.ޖީ.އޭ އަތޮޅު ކައުންސިލް ގޮތްޕެވެ. މި މެޗު ސީދާ ދެ ސެޓުން ކާމިޔާބުކުރީ ހޮސްޕިޓަލް-އޭ ޓީމެވެ. މި މެޗުގެ ސެޓުތައް ހޮސްޕިޓަލް-އޭ އިން ގެންދިޔައީ 25-13 އަދި 25-18 އިންނެވެ.

މި މެޗުގެ މޮޅު ކުޅުންތެރިޔާ ނުވަތަ މޭން އޮފް ދަ މެޗަކަށް ހޮވުނީ ހޮސްޕިޓަލް-އޭ ޓީމުގެ ޖާޒީ ނަންބަރު 8، ޢަލީ ޝާލިމް އެވެ.

މުބާރާތުގެ 34 ވަނަ މެޗުގައި ބައްދަލުކުރީ ސްޓެލްކޯ ކޭ-38 އަދި ފެނަކަ އެވެ. މި މެޗުވެސް ސީދާ ދެ ސެޓުން ކާމިޔާބުކުރީ މޮޅު ކުޅުމެއް ދެއްކި ސްޓެލްކޯ ކޭ-38 ޓީމެވެ. އެ ޓީމުން ސެޓުތައް ކާމިޔާބުކުރީ 25-08 އަދި 25-14 ގެ ބޮޑު ތަފާތަކުންނެވެ.

މި މެޗުގެ މޭން އޮފް ދަ މެޗުގެ މަގާމު ހޯދީ ސްޓެލްކޯ ކޭ-38 ގެ ޖާޒީ ނަންބަރު 10، ޢަބްދުލް ބާސިތު އެވެ.

މި މެޗުތަކަށްފަހު މުބާރާތުގެ ޕޮއިންޓް ޓޭބަލްގެ ތަރުތީބަށް ބަލާއިރު، ގްރޫޕް އޭގެ އެއްވަނައިގައި އޮތީ މިހާތަނަށް ކުޅުނު އެއްވެސް މެޗަކުން ބަލިނުވެ ހޮސްޕިޓަލް-އޭ ޓީމެވެ. އަދި މި ގްރޫޕުގެ ދެވަނައިގައި އޮތީ ރޯޑް އެސްއެސްއޭ އެވެ.

ހަމައެއާއެކު، ގްރޫޕް ބީގެ އެއްވަނައިގައި އެއްވެސް މެޗަކުން ބަލިނުވެ ސްޓެލްކޯ ކޭ-38 އޮތްއިރު، މި ގްރޫޕުގެ ދެވަނައިގައި އޮތީ ފެނަކަ ޓީމެވެ. ފެނަކަ ޓީމު މިހާތަނަށް މުބާރާތުގައި ބަލިވެފައިވަނީ ހަމައެކަނި ސްޓެލްކޯ ކޭ-38 އަތުން ކުޅުނު މި މެޗުންނެވެ.

މަހިބަދޫގެ އޮފީސްތަކުގެ މެދުގައި އެކުވެރިކަން ބަދަހިކުރުމުގެ މަގުސަދުގައި ކުރިއަށްގެންދާ މި މުބާރާތުގެ ފޯރި މިހާރު ދަނީ ދުވަހެއް ދުވަހަކަށް ގަދަވަމުންނެވެ.