އިންޑިއާގެ ހުޅަނގު ބެންގާލްގެ މާލްދާ ޑިސްޓްރިކްޓަށް ކުރިމަތިވެފައިވާ ފެންބޮޑުވުމާއި ކޯރުގެ އައްސޭރިފަސް ގިރުމުގެ ހާދިސާތަކުގައި، ރަތުއާ ސަރަޙައްދުގައި ހުރި 175 އަހަރުވީ ޒަމާންވީ ފައްޅިއެއް އާދީއްތަ ދުވަހު ގަންގާ ކޯރުގެ ތެރެއަށް ވެއްޓި ފެތިއްޖެއެވެ.

މުނީރާމްތޯލާ ސަރަޙައްދުގައި ހުރި މި ފައްޅިއަކީ ޒަމާނުއްސުރެ ގިނަ އަދަދެއްގެ މީހުން ޒިޔާރަތްކުރަމުން އައި، އަދި ހަފްތާއަކު އެއްފަހަރު ބޮޑު ބާޒާރެއްވެސް ބާއްވަމުން ދިޔަ ތަނެކެވެ. އެ ސަރަޙައްދުގެ އުމުރުން ދުވަސްވީ މީހުން ބުނާ ގޮތުގައި އެމީހުންގެ ކުޑައިރު ކޯރު އޮންނަނީ ފައްޅިއާ 15 ކިލޯމީޓަރު ދުރުގައެވެ. ނަމަވެސް، ފާއިތުވި އަހަރުން ފެށިގެން މި ސަރަޙައްދު ގިރަމުން ގޮސް، ހޮނިހިރު ދުވަހު އައްސޭރިން ބޮޑު ބައެއް ކަނޑައިގެން ދިއުމަށްފަހު، އާދީއްތަ ދުވަހުގެ ހަވީރު މުޅި އިމާރާތް ވަނީ ކޯރުގެ ތެރެއަށް ޣަރަޤުވެފައެވެ.

މި ހާދިސާ ހިނގާފައިވަނީ ބިހާރުން އަންނަ ފެނުގެ ސަބަބުން ކޯރުގެ ލެވެލް މައްޗަށް ދިއުމާ ގުޅިގެންނެވެ. މާހިރުން އިންޒާރު ދޭ ގޮތުގައި ސެޕްޓެމްބަރު 9 އާ ހަމައަށް ފެންބޮޑުވުމުގެ ހާލަތު އިތުރަށް ގޯސްވާނެއެވެ.

މި ކާރިސާގައި އެންމެ ބޮޑު ގެއްލުމެއް ލިބިފައިވަނީ މަނިކްޗަކް ބްލޮކްގެ ދަށުގައިވާ ބޫތުނީ ރަށަށެވެ. އެ ރަށުގެ ހުރި ހަމައެކަނި ހޮސްޕިޓަލް ބަންދުކުރަން ޖެހިފައިވާއިރު، ޞިއްޙީ ފަރުވާ މިހާރު ދެމުންދަނީ ޕަންޗާޔަތު އޮފީހުގައެވެ. އަދި ބަލިވެއިނދެފައިވާ އަންހެނުން ވަނީ ރައްކާތެރި ތަންތަނަށް ބަދަލުކޮށްފައެވެ. ސެޕްޓެމްބަރު 2 ވަނަ ދުވަހުގެ ރޭ، ފެންބޮޑުވުމުން ރައްކާތެރިވުމަށް ހަދާފައިވާ ތޮށިގަނޑު ފަޅައިގެން ދިއުމާ ގުޅިގެން ބޫތުނީގެ 62 އަވަށަކާއި ޕޮލިސް ސްޓޭޝަން ވަނީ ފެނުއަޑީގައެވެ.

ރަތުއާ އަދި މަނިކްޗަކްގެ އިތުރުން އިންގްލިޝް ބާޒާރު ސަރަޙައްދަށްވެސް ބޮޑެތި ގެއްލުންތަކެއް ލިބި، ޚާސްކޯލްގެ ބޮޑެތި ބިންތަކާއި އަނބު ދަނޑުތައް ވަނީ ގިރައިގެން ގޮސްފައެވެ.

ހާލަތު ގޯސްވަމުންދާތީ، ސްޓޭޓްގެ ވަޒީރުން އެ ސަރަޙައްދުގައި ހަރަކާތްތެރިވަމުން އަންނައިރު، ސަރުކާރުގެ އިދާރާތަކުން ދަނީ ކުއްލި ހާލަތުގައި ރައްޔިތުންނަށް އެހީތެރިކަން ފޯރުކޮށްދިނުމުގެ މަސައްކަތް ހަލުވިކަމާއެކު ކުރަމުންނެވެ.