ޕެސިފިކް ކަނޑުގައި އުފެދިފައިވާ "އެލް ނީނޯ" ގެ ބާރު އިތުރަށް ގަދަވަމުންދާއިރު، މީގެ ނޭދެވޭ އަސަރު ދިވެހިރާއްޖެއަށް ވެސް ވަރަށް ބޮޑަށް ކުރާނެކަމަށް ލަފާކުރެވޭތީ، ހުރިހާ ދާއިރާތަކަކުން ވެސް ދުރާލައި ރައްކާތެރިކަމުގެ ފިޔަވަޅުތައް އެޅުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފިއެވެ.

އެންޑީއެމްއޭ އިން ހާމަކޮށްފައިވާ ގޮތުގައި، މި މޫސުމީ ބަދަލުގެ ސަބަބުން ކުރިމަތިވެދާނެ ގެއްލުންތައް ދެނެގަނެ، ދުރާލައި ތައްޔާރުވުމަކީ ކޮންމެހެން މުހިންމު ކަމެއް ކަމަށެވެ. އެގޮތުން، އެކި ދާއިރާތަކުން ޚާއްޞަ ސަމާލުކަމެއް ދީގެން އަޅަންޖެހޭ މުހިންމު ފިޔަވަޅުތަކެއް އެ އިދާރާއިން ވަނީ ފާހަގަކޮށްފައެވެ.

މީގެ ތެރޭގައި ކާބޯތަކެއްޗާއި އެހެނިހެން ޒަރޫރީ މުދަލާއި ޚިދުމަތްތައް ރައްޔިތުންނަށް ފޯރުކޮށްދިނުމުގެ ނިޒާމު އިތުރަށް ހަރުދަނާކޮށް ބެލެހެއްޓުމާއި، ރަސްމީ އިދާރާތަކުން ނެރޭ މޫސުމީ ލަފާކުރުންތަކާއި އިންޒާރުތަކަށް ސަމާލުވެ، ދުރާލައި އަޅަންޖެހޭ ރައްކާތެރިކަމުގެ ފިޔަވަޅުތައް އަވަހަށް އެޅުން ހިމެނެއެވެ.

މީގެ އިތުރުން، މިފަދަ ކާރިސާތަކުން ލިބޭ ގެއްލުންތައް ކުޑަކުރުމަށް ބާރުއެޅުމުގެ ގޮތުން، އދ. ގެ ޑިޒާސްޓާ ރިސްކް ރިޑަކްޝަނާ ބެހޭ އިދާރާ (ޔޫ.އެން.ޑީ.އާރް.އާރް) އިން ވަނީ ބޮޑެތި ކުންފުނިތަކާއި ކުދި އަދި މެދުފަންތީގެ ވިޔަފާރިތަކަށް ޢަމަލީ ގޮތުން ތަންފީޒުކުރެވިދާނެ މުހިންމު އުޞޫލުތަކަކާއި އިރުޝާދުތަކެއް އެކުލަވާލައި ޢާންމުކޮށްފައެވެ.

އެހެންކަމުން، އެލް ނީނޯގެ ސަބަބުން ކުރިމަތިވެދާނެ ހޫނުގަދަވުމާއި، ވާރޭވެހުމުގެ ނިޒާމަށް އަންނަ ބަދަލުތަކުން ރައްކާތެރިވުމަށް ހުރިހާ މުއައްސަސާތަކަކާއި ޢާންމު ރައްޔިތުން ގުޅިގެން މަސައްކަތްކުރުމަކީ މި ދަނޑިވަޅުގައި ކޮންމެހެން މުހިންމު ކަމެއް ކަމުގައި އެންޑީއެމްއޭ އިން ވަނީ ފާހަގަކޮށްފައެވެ.

މޫސުމާ ބެހޭ އިދާރާއިންވެސް ވަނީ އެލް ނީނޯގެ ބާރު ގަދަވެ ހޫނު ގަދަވާނޭކަމަށް ލަފާކޮށް އެކަން ސަމާލުކަމަށް ގެނެސްފައެވެ.