އދ. މަހިބަދޫގައި ހުންނަ ސަރުކާރުގެ މުއައްސަސާތަކާއި އޮފީސްތަކުގެ މެދުގައި އެކުވެރިކަން އާލާކުރުމުގެ މަޤްޞަދުގައި ބޭއްވި "ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތް"ގެ އަންހެން ޑިވިޝަނުގެ ޗެމްޕިއަންކަން ވޮރިއާޒް ޓީމުން ހޯދައިފިއެވެ.

ރޭ ކުޅުނު ފޯރިގަދަ ފައިނަލް މެޗުގައި ވޮރިއާޒް ވާދަކުރީ ހޮސްޕިޓަލް (އެލީޓް) އާއެވެ. މި މެޗު ވޮރިއާޒް އިން ކާމިޔާބުކުރީ 3 ސެޓު 1 ސެޓުންނެވެ.

މެޗުގެ ފުރަތަމަ ސެޓު ދެ ޓީމުގެ ފަރާތުން ވެސް ފެނިގެންދިޔައީ ވަރަށް ވާދަވެރި ކުޅުމެކެވެ. މި ސެޓު 27-25 އިން ކާމިޔާބުކުރީ ހޮސްޕިޓަލް (އެލީޓް) ޓީމެވެ. ނަމަވެސް ވިދިގެން އައި ދެވަނަ ސެޓުގައި ވޮރިއާޒް އިން ކުޅުން ވަރުގަދަކޮށް، ފަސޭހަކަމާއެކު 25-10 އިން ސެޓު ކާމިޔާބުކުރިއެވެ. އަދި ތިންވަނަ ސެޓު 25-20 އިން އަދި ފަހު ސެޓު 25-22 އިން ކާމިޔާބުކޮށް ވޮރިއާޒް ވަނީ މުބާރާތުގެ ތަށި އުފުލާލާފައެވެ.

ފައިނަލް މެޗުގެ މޮޅު ކުޅުންތެރިޔާގެ މަޤާމު ހޯދީ ވޮރިއާޒް ޓީމުގެ ޖާޒީ ނަންބަރު 9، ފާޠިމަތު ޝާރަތު އެވެ.

މި މުބާރާތުގެ އެންމެ މޮޅު 6 ކުޅުންތެރިންނަށް ހޮވިފައިވަނީ:

ފާޠިމަތު ޝާރަތު (ވޮރިއާޒް)

ސައުޝަން އާދަމް (ވޮރިއާޒް)

ޙައްވާ ޝާމަތު (އެލީޓް)

މަރިޔަމް ޢަރުޝާ (އެލީޓް)

ޢާއިޝަތު ޝާއިޤާ (ވައިކިންގްސް)

ޢާއިޝަތު ޢިލްމާ (އދ. އޭއީސީ)

މަހިބަދޫގައި ސަރުކާރުގެ މުއައްސަސާތަކާއި އޮފީސްތަކުގެ މެދުގައި ގުޅުން ބަދަހިކޮށް، އެކުވެރިކަން އާލާކުރުމުގެ މަޤްޞަދުގައި ސްޓެލްކޯ މަހިބަދޫ އިންޖީނުގެއިން މި މުބާރާތް ބޭއްވި މިއީ 3 ވަނަ އަހަރެވެ. ވޭތުވެދިޔަ ދެ އަހަރާ ޚިލާފަށް މިއަހަރުގެ މުބާރާތް ކުރިއަށް ގެންގޮސްފައިވަނީ ފިރިހެން އަދި އަންހެން ޑިވިޝަން ވެސް ހިމަނައިގެންނެވެ.

މިއަހަރުގެ މުބާރާތުގައި މަހިބަދޫގެ 14 މުއައްސަސާއަކުން ޖުމްލަ 19 ޓީމަކުން ވާދަކުރިއެވެ. އޭގެ ތެރޭގައި ހިމެނެނީ ފިރިހެން 10 ޓީމާއި އަންހެން 9 ޓީމެވެ. މި މުބާރާތުގައި 222 ކުޅުންތެރިންނާއި 86 އޮފިޝަލުންނާއެކު ޖުމްލަ 308 ފަރާތަކުން ވަނީ ބައިވެރިވެފައެވެ.