ސުރަބާޔާއިން ބަންޖަރްމާސިންއަށް 243 މީހުން ގޮވައިގެން ދަތުރުކުރި އިންޑޮނީޝިއާގެ ފަސިންޖަރު އުޅަނދަކާ ގުޅުން ކެނޑި އެ އުޅަނދު ގެއްލިއްޖެއެވެ.
އިންޑޮނޭޝިއާގެ ސާޗް އެންޑް ރެސްކިއު އެޖެންސީން ނެރުނު ބަޔާނެއްގައި ބުނެފައިވަނީ، "ވާގޯ ޓްރާންސްޕޯޓް 8" ނަމަކަށް ކިޔާ މި ބޯޓާ އޮތް ގުޅުން ކެނޑިފައިވަނީ އާދީއްތަ ދުވަހުގެ ފަތިހުގެ ވަގުތެއްގައި، މޫސުން ވަރަށް ބޮޑަށް ގޯސްވެފައި ވަނިކޮށް ކަމަށެވެ.
މި ބޯޓަކީ ހޮނިހިރު ދުވަހު އީސްޓް ޖާވާގެ ސުރަބާޔާ ސިޓީން ފުރައިގެން ސައުތު ކަލިމަންތާންގެ ބަންޖަރުމާސިން ސިޓީއަށް ދަތުރުކުރި ބޯޓެކެވެ.
އެ އެޖެންސީން އިތުރަށް ބުނެފައިވަނީ، މި ބަޔާން ނެރުނު ވަގުތާ ހަމައަށްވެސް ބޯޓާ އެއްވެސް މުއާސަލާތީ ގުޅުމެއް ގާއިމުކުރެވިފައި ނުވާ ކަމަށާއި، ބޯޓު އޮތް ތަނެއް އަދިވެސް ދެނެގަނެވިފައި ނުވާ ކަމަށެވެ. ނަމަވެސް ބޯޓާ އެންމެ ފަހުން ގުޅުނު ސަރަހައްދަށް ރެސްކިއު ޓީމުތައް މިހާރު ފޮނުވާފައިވާ ކަމަށާއި، ބޯޓު ހޯދުމުގެ އޮޕަރޭޝަން ވަރަށް ބާރަށް ކުރިއަށްދާ ކަމަށްވެސް އެ ބަޔާނުގައި ވެއެވެ.
17،000 އަށް ވުރެ ގިނަ ރަށްތަކުގެ މައްޗަށް އެކުލެވޭ އިންޑޮނޭޝިއާގައި ދަތުރުފަތުރު ކުރުމަށް އެންމެ ބޮޑަށް ބަރޯސާވަނީ ކަނޑުމަގުން ދަތުރުކުރާ މިފަދަ ފެރީތަކަށެވެ. އެއީ ވައިގެ މަގަށްވުރެ ކަނޑުމަގުން ދަތުރުކުރުމުގެ އަގު ހެޔޮވެފައި، ފަސޭހައިން ދަތުރުފަތުރު ކުރެވެން ހުންނާތީއެވެ.
އެހެންނަމަވެސް، ކަނޑުދަތުރުފަތުރުގެ ސަލާމަތީ މިންގަނޑުތައް އެންމެ އެކަށީގެންވާ ގޮތެއްގައި ބަލަހައްޓައި ތަންފީޒު ނުކުރެވޭތީ، އިންޑޮނޭޝިއާގައި މިފަދަ ނުރައްކާތެރި ހާދިސާތައް ހިނގާ މިންވަރު ނިސްބަތުން އިތުރެވެ.
Advertisement
This content is created and paid for by advertisers and does not involve Voice Journalists
