ސްޕެނިޝްލީގްގައި ރޭ ރެއާލް މެޑްރިޑާއި ރެއާލް ވަޔެކާނޯ ބައްދަލުކުރިމެޗް ރެއާލް ކާމިޔާބުކޮށްފިއެވެ.
ރެއާލްގެ ދަނޑުގައި ކުޅުނު މިމެޗް އެޓީމުން ކާމިޔާބުކުރީ 4-1 ގެ ނަތީޖާއިންނެވެ. މިމެޗްގައި ރެއާލްގެ ތަރިއަކަށްވީ އެމްބާޕޭ އެވެ. މިމެޗްގައި އެމްބާޕޭ ވަނީ ދެ ގޯލް ޖަހައި އިތުރު ލަނޑެއް ކާމިޔާބުކޮށްދިނުމަށް އެހީވެދީފައެވެ.
މެޗްގައި ރެއާލްއަށް ގޯލް ހުޅުވާލަދިނީ ލިބުނު ޕެނަލްޓީއަކުން 14 ވަނަ މިނެޓް ތެރޭގައި އެމްބާޕޭ އެވެ. އަދި އޭގެ ދެ މިނެޓް ފަހުން އެމްބަޕޭ ތަނަވަސްކޮށްދިން ފުރުސަތެއްގައި އަލްވާރޯ ކަރެރާސް ވަނީ އިތުރު ލަނޑެއް ޖަހައި ލީޑް ފުޅާކޮށްދީފައެވެ. މީގެ އިތުރުން ފުރަތަމަ ހާފް ނިމުމުގެ ކުރިން 35 ވަނަ މިނެޓް ތެރޭގައި ބެލިންހަމް ވަނީ ލަނޑެއް ޖަހައި މެޗްގެ ނަތީޖާ 3-0 ކަށް ބަދަލުކޮށްފައެވެ.
ދެވަނަ ހާފް ފެށިތާ މާ ގިނައިރުތަކެއް ނުވެ ވަޔެކާނޯގެ ކަމޭލޯ ވަނީ ލަނޑެއް ޖަހައި އެޓީމަށް އުއްމީދު އާކޮށްދީފައެވެ. ނަމަވެސް ރެއާލް މެޑްރިޑުން ވަނީ އިތުރު ހަމަލާތައް އުފައްދައި މެޗް ނިމުނުގެ ކުރިން އިތުރު ލަނޑެއް ޖަހައި މެޗްގެ ނަތީޖާ 4-1 ކަށް ބަދަލުކޮށްފައެވެ. މި ލަނޑު ޖަހައިދިނީ އެމްބާޕޭއެވެ.
ލަލީގާ ޕޮއިންޓް ތާވަލް މިހާރު އޮތްގޮތަށް ބަލާއިރު 12 ޕޮއިންޓާއެކު ރެއާލަށް ވުރެ އެއްމެޗް މަދުން ކުޅެ ތާވަލްގެ އެއްވަނާގައި އޮތީ ބާސެލޯނާއެވެ. ރެއާލް މެޑްރިޑް ތާވަލްގެ ދެވަނާގައި އޮތީ ހަމަ ބާސާއާ އެއްވަރަށް ޕޮއިންޓް ލިބިގެންނެވެ.
Advertisement
This content is created and paid for by advertisers and does not involve Voice Journalists
