ވެނެޒުއެލާގައި އެމެރިކާއިން ޢަމަލުކުރި ގޮތަށް އީރާނުގައި ވެސް މަޑުކޮށް ތެޔޮ ނެގިދާނެ ކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް އާދީއްތަ ދުވަހު ދީފިއެވެ.
އަޔަލެންޑަށް ކުރި ދަތުރުގައި އައިރިޝް އޯޕަން ގޮލްފް މުބާރާތުގެ ތެރެއިން ނޫސްވެރިންނާ ވާހަކަ ދައްކަމުން ޓްރަމްޕް ބުނީ އީރާނާ ދެމެދު ހިނގާ ހަނގުރާމަ މި އަހަރު ނިމޭނެ ކަމަށް އޭނާ ޤަބޫލުކުރާ ކަމަށެވެ. ނޮވެމްބަރުގައި އެމެރިކާގައި ބާއްވާ މިޑްޓާމް އިންތިޚާބަށް ފަހު އެކަން ހަމަޖެހުމުގެ ފުރުސަތު ބޮޑު ކަމަށް ވެސް ބުންޏެވެ. ހަނގުރާމަ ނިމުމާ އެކު ޕެޓްރޯލުގެ އަގު ވަރަށް ބޮޑަށް ވެއްޓޭނެ ކަމަށް ޓްރަމްޕް ފާހަގަކޮށްފައިވެއެވެ.
ޓްރަމްޕް ބުނީ ސުލްޙައިގެ ވާހަކަތަކަށް އީރާނުން "މެދުނުކެނޑި" ގުޅާ ކަމަށެވެ. ނަމަވެސް ތެހެރާނުން ކުރިން ވެސް އެ ވާހަކަ ދޮގުކޮށްފައިވެއެވެ. "ރަނގަޅު" އެއްބަސްވުމެއް ނޫނީ ނުހަދާނެ ކަމަށާއި "ބޭކާރު" ޑީލެއް ނުހަދާނެ ކަމަށް ވެސް ބުންޏެވެ.
އެހެންނަމަވެސް އީރާނުގައި ދެމިތިބުމުގެ ޚިޔާލެއް ވެސް ޓްރަމްޕް ހުށަހެޅިއެވެ. އޮގަސްޓް މަހު އިޢުލާނު ކުރި ވެނެޒުއެލާ ޑީލަށް ޙަވާލާދީ ޓްރަމްޕް ބުނީ "ވެނެޒުއެލާ ގޮތަށް މަޑުކޮށް ތެޔޮ ނެގުމަށް ނިންމައިފައި ނޫނީ (އީރާނުން) ނުނުކުންނާނަން" ކަމަށެވެ. ވެނެޒުއެލާއިން ލިބޭ އާމްދަނީން ހަނގުރާމައިގެ ޚަރަދު "އެތައް ގުނައެއް ފޫބެއްދިފައިވާ" ކަމަށް ވެސް ބުންޏެވެ.
މެދުއިރުމަތީގެ ހަމަނުޖެހުންތަކުގެ ސަބަބުން ތެލުގެ ބާޒާރު ހަލަބޮލިވެފައި އޮތް މި ދަނޑިވަޅުގައި ސައޫދީ ޢަރަބިއްޔާގެ ތެޔޮ ހޮޅިއަކަށް ދިން ހަމަލާއާ ގުޅިގެން ހޯމަ ދުވަހު ތެލުގެ އަގު އަނެއްކާ ވެސް ވަނީ އުފުލިފައެވެ.
Advertisement
This content is created and paid for by advertisers and does not involve Voice Journalists
