ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސްކަމުގެ މަގާމަށް ހަ ބޭފުޅަކު އިންތިޚާބުކޮށްފިއެވެ. މި އިންތިޚާބުގައި ވާދަކުރެއްވި ބޭފުޅުންގެ ތެރެއިން ނާކާމިޔާބީއާ ކުރިމަތިލައްވަން ޖެހިވަޑައިގަތީ މަޖިލިސް މެންބަރު އަސްމާ ރަޝީދު އަދި މުހައްމަދު ނިމާލަށެވެ.

ޕީއެންސީގެ މަތީ މަޖިލީހުގައި ކުރިއަށްދިޔަ މި އިންތިޚާބުގައި ޖުމްލަ 1،095 މެންބަރުން ވަނީ ވޯޓު ލައްވާފައެވެ.

ނައިބު ރައީސް ކަމުގެ މަގާމަށް އިންތިޚާބުވެވަޑައިގެންނެވި ބޭފުޅުންގެ ތެރެއިން އެންމެ ގިނަ ވޯޓު ހޯއްދަވައިގެން ކުރި ހޯއްދެވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިޢުއެވެ. އޭނާއަށް 968 ވޯޓު ލިބިވަޑައިގެންނެވިއެވެ.

ދެވަނައަށް އެންމެ ގިނަ ވޯޓު ހޯއްދެވީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ. ޝިޔާމަށް 964 ވޯޓު ލިބިވަޑައިގެންނެވިއިރު، ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާޠިމަތު ސަޢުދާ ވަނީ 923 ވޯޓު ހޯއްދަވާފައެވެ.

މީގެ އިތުރުން މި މަގާމަށް އިންތިޚާބުވެވަޑައިގެންނެވި ބޭފުޅުންނާއި ލިބިވަޑައިގެންނެވި ވޯޓުގެ އަދަދުތަކަކީ:

ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު - 862 ވޯޓު

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު - 833 ވޯޓު

ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) - 780 ވޯޓު

މި އިންތިޚާބުގައި ނާކާމިޔާބުވެވަޑައިގެންނެވި މާފަންނު މެދު ދާއިރާގެ މެންބަރު އަސްމާ ރަޝީދަށް 288 ވޯޓު ލިބިވަޑައިގެންނެވި އިރު، މުހައްމަދު ނިމާލަށް ލިބިވަޑައިގަތީ 301 ވޯޓެވެ.