ޔަމަނުގެ ހޫތީން އޮމާންގައި އެމެރިކާގެ އޮފިޝަލުންނާ މިދިޔަ ހަފުތާ ބަންދުގައި ބައްދަލުކޮށް، އެމެރިކާއާއި އިސްރާއީލުގެ އުޅަނދުތަކަށް ހަމަލާނުދޭނެ ކަމުގެ ޔަގީންކަން ދީފައިވާ ކަމަށް މިކަމުގެ މައުލޫމާތު އެނގޭ ފަސް މަސްދަރަކުން ހާމަކޮށްފިއެވެ.

މި ބައްދަލުވުން ބާއްވާފައި މިވަނީ، ސައުދީގެ އެހީތެރިކަން ލިބޭ ފައުޖުތައް ފަހަތަށް ޖައްސައި، ރަތްކަނޑުގެ އައްސޭރިފަށުގެ މުހިންމު ސަރަހައްދުތަކެއް ހޫތީންގެ ބާރުގެ ދަށަށް ގެންދިޔަތާ މަދު ދުވަސްކޮޅެއްގެ ތެރޭގައެވެ.

ކުރިން ހާމަކޮށްފައިނުވާ މި ބައްދަލުވުން ބާއްވާފައިވަނީ މަސްކަޓްގައި ހުންނަ އެމެރިކާގެ އެމްބަސީގައެވެ. އަދި މި ބައްދަލުވުން އިންތިޒާމުކުރުމުގައި މެދުވެރިއެއްގެ ދައުރު އަދާކުރީ އޮމާން ސަރުކާރުންނެވެ.

މި ބައްދަލުވުމުގައި ހޫތީން ވަނީ އެމެރިކާގެ އުޅަނދުތަކަށް ހަމަލާދިނުމުގެ އެއްވެސް ނިޔަތެއް ނެތް ކަމަށާއި، 2025 ވަނަ އަހަރު އެމެރިކާއާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުމަށް އިހުތިރާމްކުރާނެ ކަމަށް ބުނެފައެވެ. މީގެއިތުރުން، ސައުދީ އަރަބިއްޔާގެ އުޅަނދުތައް ފިޔަވައި، އިސްރާއީލުގެ އުޅަނދުތަކަށާއި އެހެނިހެން ވިޔަފާރި އުޅަނދުތަކަށް ވެސް ހަމަލާނުދޭނެ ކަމަށް ހޫތީން ބުނެފައިވާ ކަމަށް މަސްދަރުތަކުން ބުނެއެވެ.

މި ބައްދަލުވުމުގައި ހޫތީންގެ ފަރާތުން ބައިވެރިވީ އެމެރިކާގެ ދަތިކުރުމުގެ ފިޔަވަޅުތައް އަޅާފައިވާ މުހައްމަދު އަބްދުއްސަލާމް އަދި އަބްދުލްމަލިކް އަލް-އަޖީރީއެވެ. އެމެރިކާގެ ފަރާތުން ބައިވެރިވީ އެމްބަސީގެ އިސް އޮފިޝަލުންނެވެ.

އެމެރިކާގެ ސްޓޭޓް ޑިޕާޓްމަންޓުން މި ބައްދަލުވުން ސީދާ ކަށަވަރުކޮށްދީފައި ނުވި ނަމަވެސް، ރަތްކަނޑުގެ ދަތުރުފަތުރުގެ ރައްކާތެރިކަން ކަށަވަރުކުރުމަކީ އެމެރިކާގެ މުހިންމު މަސްލަހަތެއް ކަމަށް ވަނީ ބުނެފައެވެ. ރައީސް ޑޮނަލްޑް ޓްރަމްޕް އަދި ނައިބު ރައީސް ޖޭޑީ ވެންސް ވެސް ވަނީ އެމެރިކާއާއި ހޫޘީންނާ ދެމެދު ސީދާ މުއާމަލާތްތަކެއް ހިނގަމުންދާ ކަން ކުރިން ހާމަކުރައްވާފައެވެ.

ހޫތީން ވަނީ މިދިޔަ ހަފުތާގައި ޔަމަނުގެ ރަތްކަނޑުގެ މުޅި އައްސޭރިފަށާއި، މުހިންމު ބަނދަރެއް ކަމަށްވާ މޯޚާ އަދި ބާބުލް މަންދަބް ކަނޑުއޮޅީގައިވާ ޕެރިމް އައިލެންޑް ހިފާފައެވެ. މިއާއެކު ސައުދީ ވަލީއަހުދު މުހައްމަދު ބިން ސަލްމާން ވަނީ އެމެރިކާގެ އަސްކަރީ އެހީތެރިކަމަށް އެދިވަޑައިގެންފައެވެ. ނަމަވެސް، އެމެރިކާއިން ސީދާ މި ހަނގުރާމައިގެ ތެރެއަށް ނުވަންނާނެ ކަމަށް ރޮއިޓާސް އިން ރިޕޯޓްކޮށްފައިވެއެވެ.

އެމެރިކާއާއެކު މަޝްވަރާތައް ކުރިއަށްދިޔަ ނަމަވެސް، ހޫތީން ވަނީ ސައުދީ އަރަބިއްޔާއަށް އަމާޒުކޮށް ވަރުގަދަ ހަމަލާތަކެއް ދީފައެވެ. އެގޮތުން ޔަންބުއުގައި ހުންނަ އަރާމްކޯގެ ތެޔޮ މަރުކަޒަކަށާއި، ދެކުނުގެ ޚަމީސް މުޝައިތުގައިވާ ވައިގެ މަރުކަޒަކަށް ޑްރޯން އަދި މިސައިލް ހަމަލާތައް ދީފައިވާ ކަމަށް ހޫތީންގެ އަސްކަރީ ތަރުޖަމާނު ޔަހްޔާ ސަރީ ވިދާޅުވިއެވެ. އަދި ސައުދީގެ އެފް-15 މަރުކާގެ ހަނގުރާމަމަތީ ބޯޓެއް ވައްޓާލާފައިވާ ކަމަށް ވެސް ހޫތީން ދައުވާކުރެއެވެ.

މީގެއިތުރުން، އިސްލާމްދީނުގެ އެންމެ މުގައްދަސް ބިން ކަމަށްވާ މައްކާއަށް އަމާޒުކޮށް ހޫތީން ޑްރޯން ހަމަލާއެއް ފޮނުވާލި ކަމަށް ބުނެ ސައުދީ އިސްވެ އޮންނަ ކޯލިޝަނުން ވަނީ ތުހުމަތުކޮށްފައެވެ. ސައުދީގެ ވައިގެ ދިފާއީ ބާރުތަކުން އެ ޑްރޯން ވައްޓާލާފައިވަނީ މައްކާގެ ދެކުނުންނެވެ. ހޫތީން މި ތުހުމަތު ދޮގުކުރި ނަމަވެސް، ސައުދީ އަރަބިއްޔާއިންނާއި، އަރަބި ލީގުން އަދި ގަތަރުން ވަނީ މުގައްދަސް ބިންތަކުގެ ރައްކާތެރިކަމަށް ނުރައްކާވާ ގޮތަށް ދިން މި ހަމަލާ ހަރުކަށި އިބާރާތުން ކުށްވެރިކޮށްފައެވެ.