ރާއްޖޭގެ އެކި ސަރަޙައްދުތަކުގައި ހުމާއި ރޯގާ އަދި ބޭރަށްހިންގުން ފެތުރެމުންދާތީ ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ޢާންމުންނަށް އިލްތިމާސްކޮށްފިއެވެ.

އެޗްޕީއޭއިން ބުނީ ހުމާއި ރޯގާ ޖެހިގެން މިދުވަސްވަރު ޑޮކްޓަރަށް ދައްކާ މީހުންގެ ޢަދަދު އިތުރުވެފައިވާ ކަމަށެވެ. އެ އިދާރާއިން ބުނީ، ރޯގާގެ އެއްވެސް ޢަލާމާތެއް ފެނިއްޖެ ނަމަ ލަސްނުކޮށް ޑޮކްޓަރަށް ދެއްކުމަށާއި ނޭފަތާއި އަނގަ ނިވާވާ ގޮތަށް މާސްކު އެޅުމަށާއި މީހުން ގިނައިން އެއްވެ އުޅޭ ތަންތަނަށް ނުދިއުމަށް އެޗްޕީއޭއިން އެދިފައިވެއެވެ.

ހަމައެއާއެކު ކެއްސައި ކިނބިހި އަޅާއިރު އަނގަޔާއި ނޭފަތް ނިވާކުރުމާއި ސައިބޯނި ލައިގެން ގިނަގިނައިން އަތްދޮވުމާއި ގައިދުރުކަން ބެހެއްޓުމާއި ޚާއްޞަކޮށް ކުޑަކުދިން މީހުން އެއްވާ ތަންތަނަށް ނުގެންދިއުމަށާއި ދުންފަތުގެ އިސްތިޢުމާލުނުކުރުމަށް ވެސް އެ އެޖެންސީން އިރުޝާދު ދީފައިވެއެވެ.

ބޭސް ބޭނުންކުރުމާ ގުޅޭ ގޮތުން އެޗްޕީއޭއިން ބުނެފައި ވަނީ ޕެރެސެޓަމޯލް ފިޔަވައި އެހެން ބޭހެއް އަމިއްލައަށް ބޭނުންނުކުރުމަށެވެ. ތިން ދުވަހަށް ވުރެ ގިނައިން ހުން ދެމިހުންނަ ނަމަ ޑޮކްޓަރެއްގެ ލަފާ ހޯދުމަށް ވެސް އެދިފައިވެއެވެ. ބޭރަށްހިންގުމުން ރައްކާތެރިވުމަށް ސާފު ބޯފެން ބޭނުންކުރުމަށާއި ކާބޯތަކެތި ރަނގަޅަށް ކައްކައިގެން ބޭނުންކުރުމަށާއި ރޯކޮށް ކެވޭ ކާނާ ރަނގަޅަށް ދޮވެގެން ބޭނުންކުރުމަށް ވެސް އެ އެޖެންސީން އިލްތިމާސްކޮށްފައިވެއެވެ.

ބޭރަށް ހިންގުން ޖެހިއްޖެ ނަމަ ގިނައިން ދިޔާ އެއްޗެހި ބޭނުންކޮށް ލޮނުޕެކެޓް ބޭނުންކުރުމަށާއި ދިޔާ އެއްޗެހި ބޭނުންނުކުރެވޭ ނަމަ ނުވަތަ މާބޮޑަށް ވަރުދެރަވާ ނަމަ ޑޮކްޓަރެއްގެ ލަފާ ހޯދުމަށް ވެސް އެޗްޕީއޭއިން އިރުޝާދު ދީފައިވެއެވެ.

ސްކޫލް ޗުއްޓީ ދުވަސްވަރަކީ ރާއްޖެއިން ބޭރަށާއި އަތޮޅުތަކަށް ދަތުރުކުރުމާއި ގޭގެއަށް ޒިޔާރަތްކުރުން އިތުރުވާ ދުވަސްވަރެއް މިދުވަސްވަރު ހުމާއި ރޯގާ ފެތުރޭ މިންވަރު އިތުރެވެ. މި ދުވަސްވަރަކީ ދަތުރުފަތުރު ކުރުން ގިނަ ދުވަސްވަރަކަށް ވާތީ ރައްކާތެރި ފިޔަވަޅުތައް އެޅުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.