އިނގިރޭސި ޕްރިމިއާލީގްގައި ރޭ ބްރައިޓަން އާއި އާސެނަލް ބައްދަލުކުރިމެޗް ބްރައިޓަން ކާމިޔާބުކޮށް ތާވަލްގެ ތިންވަނައަށް އެޓީމް ޖެހިލައިފިއެވެ.
މިމެޗް ބްރައިޓަން ކާމިޔާބުކުރުމާއެކު މި ސީޒަނުގައި އާސެނަލް މޮޅުވުމުގެ ސިލްސިލާ ވަނީ ނިމުމަކަށް އައިސްފައެވެ.
މި ސީޒަނުގެ ފުރަތަމަ އަށް މެޗުން ޖެހިޖެހިގެން މޮޅުވެ، ފާއިތުވި 123 އަހަރު ތެރޭގައި އެ ކްލަބުން ނުދައްކާ ފަދަ މޮޅު ފެށުމެއް ހޯދުމަށް އާސެނަލް އުންމީދު ކުރި ނަމަވެސް، ފަބިއަން ހޫޒެލާގެ އިރުޝާދުގެ ދަށުން ކުޅުނު ބްރައިޓަންއިން ވަނީ އާސެނަލް ސިއްސުވާލާފައެވެ. އެގޮތުން މެޗުގެ ފުރަތަމަ ހާފު ނިމުމުގެ ކުރިން ބްރައިޓަންގެ ޕާސްކަލް ގްރޮސް އަދި ޗަރަލަމްޕޯސް ކޮސްޓޫލަސް ވަނީ ދެ ލަނޑު ކާމިޔާބުކޮށް އެ ޓީމަށް ލީޑު ހޯދައިދީފައެވެ.
އާސެނަލަށް މެޗުގެ ތެރެއަށް އެނބުރި އައުމަށް ލިބުނު އެންމެ ރަނގަޅު ފުރުސަތު ބުކާޔޯ ސަކާ އަތުން ބޭކާރުވިއިރު، އޭގެ އެންމެ 15 ސިކުންތު ފަހުން ބްރައިޓަންއިން ކާމިޔާބުކުރި ދެވަނަ ލަނޑަކީ އާސެނަލްގެ ރޭވުންތައް މުޅިން ބަދަލުކޮށްލި ގޯލެކެވެ. ދެވަނަ ހާފު ފެށިގެން މާގިނަ އިރުތަކެއް ނުވަނީސް، ޗެމާ އެންޑްރޭސް ވަނީ ބްރައިޓަންގެ ތިންވަނަ ލަނޑު ކާމިޔާބުކޮށްދީފައެވެ.
މުޅި މެޗުގައި ވެސް އާސެނަލްގެ ފަރާތުން ފެނުނީ އާދައިގެ ކުޅުމެކެވެ. ބްރައިޓަންއިން އުފެއްދި ނުރައްކާތެރި ހަމަލާތަކުން ސަލާމަތްވުމަށް އާސެނަލްގެ ކީޕަރު ޑޭވިޑް ރާޔާއަށް ގިނަ މަސައްކަތްތަކެއް ކުރަން ޖެހުނެވެ. މި ނަތީޖާއާއެކު ބްރައިޓަން ވަނީ ތާވަލުގެ ތިންވަނައަށް ޖެހިލާފައެވެ. އެއީ ދެވަނައިގައި އޮތް އާސެނަލްއަށްވުރެ ދެ ޕޮއިންޓް ފަހަތުގައެވެ.
މެޗަށްފަހު ވާހަކަދައްކަމުން އާސެނަލްގެ ކޯޗް މިކެލް އަޓޭޓާ ބުނީ މެޗްގައި ހުރިހާ ގޮތަކުންވެސް އާސެނަލްގެ ކުޅުންތެރިންނަށް ވުރެ ބްރައިޓަން ކުޅުންތެރިން ތަފާތުކަމަށެވެ. އެގޮތުން އެޓީމްގެ ފަރާތުން މޮޅު ކުޅުމެއް ފެނިގެންދިޔައިރު، އޭނާގެ ޓީމްގެ ކުޅުންތެރިންނަށް ނުކުޅެވުނުކަން އަޓޭޓާ ވަނީ ފާހަގަކޮށްފައެވެ.
"މިކަން އަލުން ތަކުރާރުވިޔަ ނުދިނުމަށްޓަކައި، މި މެޗުން އަހަރެމެން ފިލާވަޅުތަކެއް ލިބިގަންނަން ޖެހޭނެ" އަޓޭޓާ ބުންޏެވެ.
Advertisement
This content is created and paid for by advertisers and does not involve Voice Journalists
