ކުޑަކުއްޖަކަށް ޖިންސީ ގޯނާކުރިކަން ސާބިތުވެ ޢަބްދުއްނާފިޢު ޢީސާ ނަމަކަށް ކިޔާ މީހަކު 15 އަހަރުގެ މުއްދަތަށް ޖަލަށްލުމަށް ކޯޓުން ހުކުމްކޮށްފިއެވެ.

މި ހުކުމް އައީ ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ ނުވަ ވަނަ މާއްދާގެ (ހ) ގެ ދަށުންނެވެ. އެ މާއްދާގެ (ށ) އާ ހަވާލާދީ އުޤޫބާތެއްގެ ގޮތުގައި 15 އަހަރުގެ ޖަލު ހުކުމެއް ވަނީ ކަނޑައަޅައިފައެވެ.

ޖިންސީ ގޯނާގެ މައްސަލަތަކުގައި އަނިޔާ ލިބޭ ކުދިންގެ ރައްކާތެރިކަމާއި މަސްލަހަތު ހިމާޔަތްކުރުމުގެ ގޮތުން މައްސަލައިގެ އިތުރު ތަފްސީލުތައް ހާމަކޮށްފައެއް ނުވެއެވެ.

ފަހުގެ ތާރީޚުގައި މިފަދަ މައްސަލަތަކުގައި ކޯޓުތަކުން ބޮޑެތި އަދަބުތައް ކަނޑައަޅައިފައިވެއެވެ. އެގޮތުން 11 އަހަރުގެ އަންހެން ކުއްޖަކާ އެކު ޖިންސީ ޢަމަލު ހިންގި މީހަކު 16 އަހަރަށް ޖަލަށްލުމަށް ހުކުމްކޮށްފައިވާ އިރު އެ ފަދަ އެހެން މައްސަލައެއްގައި ކުށް ސާބިތުވި މީހަކު 12 އަހަރަށް ޖަލަށްލުމަށް ކްރިމިނަލް ކޯޓުން ނިންމައިފައިވެއެވެ. ހަމައެހެންމެ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގައި އިތުރު މީހަކު 10 އަހަރަށް ޖަލަށްލުމަށް ވެސް ހުކުމް އައިސްފައިވެއެވެ.

ކުޑަކުދިންނާ ދެކޮޅަށް ހިންގާ ޖިންސީ ކުށްތަކުގެ މައްސަލަތައް އަވަހަށް ބެލުމަށާއި އިންސާފު ޤާއިމުކުރުމަށް ދައުލަތުގެ ކަމާ ގުޅޭ މުއައްސަސާތަކުން ޚާއްޞަ އިސްކަމެއް ދެމުން ގެންދެއެވެ.