އިނގިރޭސި ޕްރިމިއާ ލީގުގައި ވެސްޓް ހަމް ޔުނައިޓެޑް އަދި މެންޗެސްޓާ ޔުނައިޓެޑް ކުޅުނު މެޗް ވެސްޓް ހަމް ކާމިޔާބު ކޮށްފިއެވެ.

ޔުނައިޓެޑްގެ ފަރާތުން އާދަޔާހިލާފު ދަށް ކުޅުމެއް ފެނިގެން ދިޔަ މި މެޗުގައި އެޓީމް ފެނުނީ އެއްވެސް މިސްރާބެއް ނެތި ކުޅެމުން ދިޔަ މަންޒަރެވެ. ކުޅުންތެރިންގެ ފަރާތުން މޮޅުވުމުގެ ރޫހު އެއްވެސްވަރަކަށް ފެނިފައިނުވާއިރު މުޅި މެޗުގައިވެސް އެޓީމުގެ ކޯޗް ޝޯލްޝާގެ މޫނުމަތިން ފެނިފައިވަނީ މާޔޫސްކަންވެރިވެފައިވާ މަންޒަރެވެ.

ވެސްޓް ހަމްގެ ފަރާތުންވެސް މޮޅު ކުޅުމެއް ފެނިގެން ގޮސްފައިނުވި ނަމަވެސް އެޓީމް ވަނީ ލިބުނު މަދު ފުރުސަތުތަކުގެ ބޭނުން އެންމެ ރަނގަޅަށް ހިފާފައެވެ. އެގޮތުން ޔުނައިޓެޑުގެ ގޯލަށް އަމާޒުކޮށް ފޮނުވާލި ތިން ހަމަލާވެސް ޓާގެޓަށް ފޮނުވާލިއިރު އޭގެތެރެއިން ދެ ހަމަލާގައި ވެސްޓް ހަމް ވަނީ ކާމިޔާބުކަމާއެކު ބޯޅަ ޔުނައިޓެޑުގެ ގޯލު ދާގަނޑަށް ވައްދާލާފައެވެ.

ފުރަތަމަ ހާފް ނިމެން ކުޑަ ވަގުތު ކޮޅަކަށް ވެފައިވަނިކޮށް ޔޮމަލެންކޯ ވެސްޓް ހަމްއަށް މެޗުގެ ކުރި ހޯދަދިން އިރު އެޓީމުގެ ދެވަނަ ގޯލް، ލިބުނު ހިލޭ ޖެހުމަކުން 84 ވަނަ މިނެޓުގައި ކާމިޔާބު ކޮށްދިނީ ކްރެސްވެލްއެވެ. މި މެޗުގައި ޔުނައިޓެޑުގެ ފޯވަޑް ރަޝްފޯޑަށް އަނިޔާވެ އޭނާ ވަނީ މެޗުގެ މެދުތެރެއިން ކުޅުމައި ވަކިވާން ޖެހިފައެވެ.

މި ނަތީޖާއާއެކު ޔުނައިޓެޑް އޮތީ ކުޅުނު ހަ މެޗުން ލިބުނު ލިބުނު އަށް ޕޮއިންޓާއެކު ތާވަލުގެ ހަތް ވަނައިގައެވެ.

ލީގުގައި ދެން ކުޅެވުނު މެޗުގައި ކްރިސްޓަލް ޕެލަސް އަދި ވުލްވްސް ބައްދަލުކުރި މެޗް ނިމުނީ 1-1 ކުން އެއްވަރުވެގެންނެވެ.