ޗައިނާގެ ރައީސް ޝީ ޖިންޕިންގް މިއަދު ނިއު ދެއްލީއަށް ވަޑައިގެން 18 ވަނަ ބްރިކްސް ސަމިޓުގައި ބައިވެރިވެވަޑައިގެންފިއެވެ.

މިއީ ޝީ ޖިންޕިންގް ގާތްގަނޑަކަށް ހަތް އަހަރު ތެރޭ އިންޑިއާއަށް ކުރެއްވި ފުރަތަމަ ދަތުރުފުޅެވެ. އެ މަނިކުފާނު އެންމެ ފަހުން އިންޑިއާއަށް ވަޑައިގެންފައިވަނީ 2019 ވަނަ އަހަރު ޓެމިލް ނާޑޫގެ މާމައްލަޕޫރަމްގައި ބޭއްވި ނުރަސްމީ އިންޑިއާ-ޗައިނާ ސަމިޓަށެވެ. 2023 ވަނަ އަހަރު އިންޑިއާއިން ބޭއްވި ޖީ20 ސަމިޓަށް ޝީ ވަޑައިގެންފައެއް ނުވެއެވެ.

ބެއިޖިންގުން ފުރާވަޑައިގެންނެވީ ބޮޑުވަޒީރު ނަރެންދުރަ މޯދީގެ ދައުވަތަކަށް ކަމަށް ޗައިނާގެ ރަސްމީ ނޫސް ޝިންހުއާއިން ރިޕޯޓުކޮށްފައިވެއެވެ.

ޝީ ޖިންޕިންގެ ވަފުދުގައި 67 މެންބަރުން ހިމެނެއެވެ. އެ ވަފުދުގައި ޗައިނާ ކޮމިއުނިސްޓް ޕާޓީ (ސީޕީސީ)ގެ ޕޮލިޓް ބިއުރޯ ސްޓޭންޑިންގ ކޮމިޓީގެ މެންބަރު އަދި ސީޕީސީ ސެންޓްރަލް ކޮމިޓީގެ ޖެނެރަލް އޮފީހުގެ ޑައިރެކްޓަރު ސައި ޗީ އާއި ޚާރިޖީ ވަޒީރު ވާންގް ޔީ ހިމެނިވަޑައިގަންނަވައެވެ. ސައި ޗީ އަކީ ސީޕީސީގެ އެންމެ ބާރުގަދަ ހަތް މެންބަރުންގެ ޕޮލިޓް ބިއުރޯ ސްޓޭންޑިންގ ކޮމިޓީގައި ފަސް ވަނައަށް ހުންނެވި ބޭފުޅާއެވެ.

ބޮޑުވަޒީރު މޯދީ އާއި ޝީ ޖިންޕިންގެ ބައިލެޓެރަލް ބައްދަލުވުން ހަމަޖެހިފައި އޮތީ މިއަދު ހަވީރު 5:45 ގައެވެ. އެ ބައްދަލުވުމުގައި ދެ ޤައުމުގެ ގުޅުންތަކާއި ލައިން އޮފް އެކްޗުއަލް ކޮންޓްރޯލް (އެލްއޭސީ) ގެ ހާލަތާއި ވިޔަފާރީގެ ގުޅުންތަކާ ބެހޭ ގޮތުން މަޝްވަރާ ކުރައްވާނެ ކަމަށް ޑިޕްލޮމެޓިކް މަސްދަރުތައް ބުނެއެވެ. ޗައިނާގެ ޚާރިޖީ ވުޒާރާގެ ތަރުޖަމާނު މައޯ ނިންގް ވިދާޅުވީ މިއީ ކަޒާން އާއި ޓިއެންޖިންގެ ބައްދަލުވުންތަކަށް ފަހު ޖެހިޖެހިގެން ތިން ވަނަ އަހަރު ދެ ލީޑަރުން ބައްދަލުކުރައްވާ ފަހަރު ކަމަށެވެ.

2020 ވަނަ އަހަރު ގަލްވާން ވާދީގައި ހިނގި ހަމަނުޖެހުމުގައި އިންޑިއާ އާއި ޗައިނާގެ މަދުވެގެން 24 ސިފައިން މަރުވެ ދެ ޤައުމުގެ ގުޅުން ވަރަށް ބޮޑަށް ހީނަރުވިއެވެ. 2024 ވަނަ އަހަރު ރަޝިއާގައި ބޭއްވި 16 ވަނަ ބްރިކްސް ސަމިޓުގެ ހަވާސާގައި މޯދީ އާއި ޝީ ބައްދަލުކުރެއްވި ފަހުން ދެ ޤައުމުގެ ގުޅުން މަޑުމަޑުން ރަނގަޅުވަމުން ދިޔައެވެ.

ޝީ ޖިންޕިންގެ އިންޑިއާ ދަތުރުފުޅު އައީ ބޮޑެތި ޑިޕްލޮމެޓިކް ދަތުރުތަކެއްގެ ތެރެއިންނެވެ. އޭގެ ތެރޭގައި ކިރްގިސްތާނުގައި ބޭއްވި ޝެންހައި ކޯޕަރޭޝަން އޯގެނައިޒޭޝަން (އެސްސީއޯ)ގެ ސަމިޓާއި ދިހަ ވަރަކަށް އަހަރު ތެރޭ ފުރަތަމަ ފަހަރަށް މިސުރަށް ކުރެއްވި ދައުލަތުގެ ދަތުރުފުޅު ހިމެނެއެވެ.

މި ސަމިޓުގެ ޝިއާރަކީ "ދެމެހެއްޓެނިވި ކެތްތެރިކަމާއި އީޖާދީ ހައްލުތަކާއި އެއްބާރުލުމާއި ދެމެހެއްޓެނިވި ތަރައްޤީ ބިނާކުރުން" އެވެ. ބްރިކްސް ލީޑަރުން ނިއު ދެއްލީގައި ސެޕްޓެމްބަރު 12 އިން 13 އަށް ބައްދަލުކުރައްވާ އިރު މި ބައްދަލުވުން ބާއްވަނީ ވިޔަފާރީގެ ނުތަނަވަސްކަމާއި ހުޅަނގު އޭޝިއާ އާއި ޔޫކްރެއިނުގެ ހަނގުރާމައިގެ ހާލަތު ހޫނުވެފައި އޮތް ދަނޑިވަޅެއްގައެވެ.

ބްރިކްސް ޖަމާޢަތުގައި މިހާރު 11 ފުރިހަމަ މެންބަރު ޤައުމު ހިމެނެއެވެ. ނިއު ދެއްލީ ސަމިޓު ނިމުމުން ބްރިކްސްގެ ރިޔާސަތު ދެން ލިބޭނީ ޗައިނާއަށެވެ.