ފާއިތުވެދިޔަ ދުވަސްތަކުގެ ތެރޭގައި ދިވެހިރާއްޖޭގެ ސުޕްރީމް ކޯޓުން މަސައްކަތްކޮށްފައިވަނީ އެއްވެސް ފަރާތަކަށް ބުރަވުމެއް ނެތި، ދައްކަފާނެ ބިރަކަށް ޖެހިލުމެއް ނެތިކަމަށް އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.
މިހެން އެމަނިކުފާނު ވިދާޅުވީ ދިވެހިރާއްޖޭގެ ސުޕްރީމް ކޯޓަށް ދިހަ އަހަރު ފުރުނު މުނާސަބަތު ފާހަގަކުރުމަށް ރޭ ބޭއްވި ޚާއްސަ ހަފްލާގައި ވާހަކަފުޅު ދައްކަވަމުންނެވެ.
އުއްތަމަ ފަނޑިޔާރު ވިދާޅުވީ ސުޕްރީމް ކޯޓުން މަސައްކަތް ކުރަމުން އައީ ވަކި ފަރާތަކަށް ބުރަވުމެއް ނެތި އަދި ދައްކަފާނެ ބިރަކަށް ޖެހިލުން ވުމެއް ވެސް ނެތިކަމަށެވެ. އަދި ގާނޫނުގެ ހުކުމް ދަމަހައްޓައި، އިސްލާމީ ޝަރީއަތުގެ އުސޫލުތަކާ އެއްގޮތަށް މަސައްކަތް ކޮށްފަައިވާނެކަަމަށްވެސް އެމަނިކުފާނު ވަނީ ވިދާޅުވެފައެވެ.
އަދި މިގޮތުގެ މަތީގައި ދެމިއޮތުމަށް މަސައްކަތް ކުރައްވާނެކަމަށްވެސް އެމަނިކުފާނު ވަނީ ވިދާޅުވެފައެވެ.
ރޭ އިތުރަށް ވާހަކަފުޅު ދައްކަވަމުން އެމަނިކުފާނު ވިދާޅުވީ އަދުލްއިންސާފުގެ ނިޒާމު ހަރުދަނާ ކުރުމަށް އިތުރު މަސައްކަތްތަކެއް ކުރަންޖެހިފައިވާ ކަމަށާއި، އެގޮތުން އެކަންކަން ކުރެވެން އޮތީ ދައުލަތުގެ އިދާރާތަކުގެއާއި މާލީ އެހީތެރިކަންވެސް ލިބިގެންކަމަށް ވަނީ ވިދާޅުވެފައެވެ.
ރޭގެ ހަފްލާގައި ވަނީ ސުޕްރީމް ކޯޓުގެ އާ ވެބްސައިޓެއް ތައާރަފްކޮށް، ކޯޓާއި ގުޅުންހުރި ފޮތަކާއި ސުޕްރީމް ކޯޓަށް ގިނަ ދުވަހަށް ހިދުމަތްކޮށްދިން ފަރާތްތަކުގެ އަގު ވަޒަންކޮށްފައެވެ.
Advertisement
This content is created and paid for by advertisers and does not involve Voice Journalists
