ދިރާގުގެ ހިއްސާ ވިއްކާ ނުލި ނަމަ އިންޓަނެޓުގެ އަގު ހެޔޮ ނުކުރެވިގެން އުޅޭކަށް ނުޖެހުނީސް: ޢަލީ ޙުސައިން
ރާއްޖޭގައި ފުޅާދާއިރާއެއްގައި މުއާސަލާތީ ހިދުމަތް ދެމުން އަންނަ ދިރާގުގެ ހިއްސާ ރައީސް ނަޝީދުގެ ވެރިކަމުގައި އަމިއްލަ ފަރާތަކަށް ވިއްކާނުލި ނަމަ މިއަދު އިންޓަނެޓްގެ އަގު ހެޔޮ ނުކުރެވިގެން އުޅޭކަނަށް ނުޖެހުނީސްކަމަށް ރައްޔިތުންގެ މަޖިލިސްގެ ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ.
މެންބަރު ޢަލީ މިފަދައިން ވިދާޅުވެފައިވަނީ މިއަދު އޭނާ ކުރެއްވި ޓުވީޓެއްގައިއެވެ.
ރާއްޖޭގައި ކޮވިޑް-19 ގެ ނުރައްކާ ބޮޑުވެފައިވާ މިވަގުތުގައި ސިއްހީ މާހިރުންނާއި، ސަރުކާރުންވެސް އަންނަނީ ރައްޔިތުން ގޭގައި މަޑުކުރުމަށް އޮރުޝާދުދެމުންނެވެ. މިއާއެކު ގިނަ ބައެއްގެ ޝަކުވާއަކަށް ވެފައިވަނީ އިންޓެނެޓްގެ އަގު ބޮޑުވުމެވެ.
ޢަލީ ހުސައިން އިތުރަށް ވިދާޅުވެފައިވާގޮތުގައި އިންޓަނެޓުގެ މުހިންމުކަން އިންތިހާޔަށް ބޮޑުކަމާ އަދި ސަރުކާރުގެ ކޮންޓްރޯލް އޮންނަން ޖެހޭނެކަން މި ވިސްނެނީ މިކަހަލަ ދަނޑިވަޅެއްގައިކަމަށެވެ.
ދިރާގުގެ ހިއްސާއިން ބައެއް ބޭރުގެ ފަރާތަކަށް ވިއްކާލާފައިވަނީ، ރައީސް މުޙައްމަދު ނަޝީދުގެ ސަރުކާރުގައެވެ.
އިންޓަރނެޓް އަގު ހެޔޮ ކުރުމަކީ މިސަރުކާރުގެ ރިޔާސީ ވަޢުދެކެވެ. މިސަރުކާރުން މިހާރު ޢިއުލާން ކުރަށްވާފައިވަނީ 2022 ވަނަ އަހަރު އިންޓަރނެޓްގެ ޚިދުމަތުގެ އަގު ހެޔޮވެގެން ދާނެކަމަށެވެ.
Advertisement
This content is created and paid for by advertisers and does not involve Voice Journalists